કચ્છ-સૌરાષ્ટ્ર ઉપર બેવડી આફત આજે વાવાઝોડાનો ખતરો

રવિવારે વહેલી સવારથી સમગ્ર સૌરાષ્ટ્ર અને ગુજરાત ઉપર કહેર વરસાવી રહેલા મેઘરાજાનું જોર થોડું ઓછું થયું છે અને લોકોએ રાહતનો શ્વાસ લીધો છે ત્યાં ફરી એક વખત વાવાઝોડાના સ્વરૂપે આફત આવી છે. ગુજરાત ઉપર જે ડીપ ડીપ્રેશન સર્જાયુ હતુ તે શુક્રવારે વાવાઝોડામાં પરિવર્તિત થવાની ભીતિ છે. આ વાવાઝોડાને આશના નામ આપવામાં આવ્યુ છે અને તે મહદઅંશે કચ્છ ઉપરાંત સૌરાષ્ટ્રના કાંઠાના વિસ્તારો અને દક્ષિણ ગુજરાતમાં અસર દેખાડે તેવી સંભાવના વ્યક્ત કરવામાં આવી છે. હવામાન ખાતાના સુત્રોએ જણાવ્યું છે કે, આ આશના વાવાઝોડાને લીધે ૭૦ થી ૮૦ કિલોમીટરની ઝડપે પવન ફૂંકાય તેવી સંભાવના છે. આ વાવાઝોડાની સૌથી વધુ અસર નલિયા, માંડવી અને લખપત આસપાસ રહેશે તેવું લાગી રહ્યુ છે.

ગત ૨૫ ઓગષ્ટે મધ્યપ્રદેશમાં લો પ્રેશર સર્જાયું હતું અને ત્યારબાદ તે ડીપ ડિપ્રેશનમાં ફેરવાયું હતું. ડીપ ડિપ્રેશન ધીમે ધીમે સરકીને ડીસા અને સાબરકાંઠા થઇને ગુજરાતમાં પ્રવેશ્યું હતું. આ ડીપ્રેશનના કારણે સમગ્ર રાજ્યમાં છેલ્લા ૪ દિવસથી અનરાધાર વરસાદ વરસવાનો શરુ થયો હતો.

ડિપ્રેશનના કારણે સમગ્ર ગુજરાતમાં ૫થી ૨૫ ઇંચ વરસાદ ખાબક્યો હતો જેના કારણે સર્વત્ર જળબંબાકારની સ્થિતી જોવા મળી હતી. છેલ્લા ૪ દિવસમાં લગભગ આખા ગુજરાતમાં ડીપ્રેશનના કારણે ભારેથી અતિ ભારે વરસાદ વરસ્યો હતો જેથી જનજીવન અસ્તવ્યસ્ત બની ગયું હતું.

હવામાન વિભાગે જણાવ્યું છે કે ગુજરાત પરથી પસાર થઇ ચુકેલું આ ડીપ્રેશન હવે કચ્છ તરફ છે અને તે અરબી સમુદ્ર તરફ વળી ગયું છે. જો કે ગુજરાત પરથી પસાર થયેલી આ સિસ્ટમ શુક્રવારે વાવાઝોડું બનશે.આ વાવાઝોડાને આશના નામ આપવામાં આવ્યું છે. હવામાન વિભાગે પણ સંભવિત વાવાઝોડાનું એલર્ટ આપ્યું છે.

વરસાદની પેટર્ન બદલાતા ગુજરાતમાં વધુ વરસાદ

છેલ્લા એક અઠવાડિયાથી સૌરાષ્ટ્રમાં ધોધમાર વરસાદ વરસી રહ્યો છે ત્યારે દક્ષિણ ગુજરાત અને સૌરાષ્ટ્રમાં વધુ માત્રામાં વરસી રહેલા વરસાદ પાછળ બદલાયેલી વરસાદી પેટર્ન જવાબદાર હોવાનું હવામાન તજજ્ઞો જણાવી રહ્યા છે. બંગાળની ખાડીમાં લો પ્રેશર સિસ્ટમ પશ્ચિમ તરફ આગળ વધી રહી છે. સામાન્ય રીતે બંગાળની ખાડીમાં બનેલું લો પ્રેશર ઉત્તર પશ્ચિમ દિશા તરફ આગળ વધે છે. તેનો રુટ ઉત્તર પ્રદેશ, બિહાર, હરિયાણા અને પંજાબ છે અને આ દિશામાં તે આગળ વધે છે. આ રાજ્યોમાં ભારે વરસાદ થાય છે. પરંતુ આ વર્ષે આ રૂટ બદલાયો છે. તે મધ્યપ્રદેશ, મહારાષ્ટ્ર, ગુજરાત અને રાજસ્થાન થઈને પશ્ચિમ તરફ આગળ વધી રહ્યું છે.

ગુજરાતને જળબંબાકાર કરી નાખનાર ડીપ ડિપ્રેશન વાવાઝોડામાં પરિવર્તિત થઇ અને કાંઠાના વિસ્તારોમાં તબાહી મચાવે તેવી ભીતિ

માંડવીમાં ૧૧ ઇંચથી વધુ વરસાદ ખાબક્યો

રાજકોટ : બંગાળની ખાડીમાં થોડા દિવસ અગાઉ સર્જાયેલ લો પ્રેશર ડિપ્રેશનમાં ફેરવાતા સૌરાષ્ટ્રમાં ધોધમાર વરસાદ વરસી રહ્યો છે અને હવે આ લો પ્રેસર ડીપ ડિપ્રેશનમાં ફેરવાઈ ગુજરાતના દરિયાકાંઠે કચ્છ નજીક સ્થિર થઇ જતા આજે વાવાઝોડામાં પરિવર્તિત થાય તેવી શક્યતા છે, બીજી તરફ કચ્છ અને દ્વારકા નજીક મજબૂત બની સ્થિર થયેલા ડીપ ડિપ્રેશનને કારણે માંડવીમાં ધોધમાર ૧૧ ઈંચ વરસાદ વરસ્યો હતો ઉપરાંત રાજ્યના ૨૧૦ તાલુકામાં વરસાદ નોંધાયો હતો. હવામાન વિભાગના સૂત્રોના જણાવ્યા મુજબ બંગાળની ખાડીમાં ઉદ્ભવેલ લો પ્રેસર હાલમાં મજબૂત બની જતા રાજ્યના દરિયાકાંઠાના વિસ્તાર અને ખાસ કરીને કચ્છનાના દરિયાકાંઠે વાવાઝોડામાં ફેરવાઈ શકે છે, ડીપ ડિપ્રેશનની અસરને કારણે ગુરુવારે કચ્છના માંડવીમાં ૧૧ ઈંચ અને મુન્દ્રામાં સાડા સાત ઈંચથી વધુ વરસાદ વરસ્યો હતો. ઉલ્લેખનીય છે કે, હજુ ડીપ ડિપ્રેશનનો ખતરો ટળ્યો નથી ત્યાં જ બંગાળની ખાડીમાં વધુ એક સિસ્ટમ બની રહી હોવાનું પણ હવામાન વિભાગના સૂત્રો જણાવી રહ્યા છે.

દરમિયાન ગુરુવારે કચ્છ અને દેવભૂમિ દ્વારકા જિલ્લાને બાદ કરતા સૌરાષ્ટ્રના અન્ય જિલ્લામાં વરસાદમાં રાહત અનુભવાઈ હતી. સ્ટેટ ઇમરજન્સી ઓપરેશન સેન્ટરના સત્તાવાર આંકડા મુજબ સવારના ૬થી સાંજના ૬ વાગ્યા સુધીમાં રાજ્યના કચ્છના માંડવીમાં ૨૮૭ મીમી, અને મુન્દ્રામાં ૧૮૮ મીમી, દ્વારકામાં ૧૪૦ મીમી, અબડાસામાં ૧૨૯ મીમી, અંજારમાં ૬૩ મીમી, ગાંધીધામમાં ૫૦ મીમી, લખપતમાં ૪૯ મીમી, જૂનાગઢના ભેસાણામાં ૪૪ મીમી, લોધીકામાં ૪૪ મીમી, ભુજમાં ૪૧ મીમી, ભચાઉમાં ૩૬ મીમી, ખંભાળિયામાં ૩૪ મીમી, ચુડામાં ૩૨ મીમી, અમદાવાદના ધોલેરામાં ૩૧ મીમી, નખત્રાણામાં ૩૦ મીમી, ચોટીલામાં ૩૦ મીમી, જોડિયામાં ૩૦ મીમી સહીત રાજ્યના ૨૧૦ તાલુકાઓમાં વરસાદ વરસ્યો હતો.