રાજકોટ જિલ્લામાં વાવણી લાયક વરસાદ બાદ વાવેતરે વેગ પકડ્યો
જિલ્લામાં કુલ ૨૦૫૪૩૭ હેકટરમાં નોંધાયું વાવેતર: સૌથી મગફળીનું ૧૦૫૪૦૨ જ્યારે કપાસનું ૮૯૪૬૭ હેકટરમાં વાવેતર કરતાં ખેડૂતો
રાજકોટ જિલ્લામાં થયેલા વાવણી લાયક સાર્વત્રિક વરસાદ બાદ વાવેતરે વેગ પડક્યો છે. જિલ્લામાં સૌથી વધુ મગફળી અને કપાસનું વાવેતર થયું છે. જ્યારે જિલ્લામાં ૨૦૫૪૩૭ હેકટરમાં વાવેતર નોંધાયુ છે.
સૌરાષ્ટ્રમાં મેઘરાજા મહેરબાન થયા છે અને સાર્વત્રિક વરસાદ વરસ્યો છે. સાર્વત્રિક વાવણી લાયક વરસાદને કારણે ધરતીપુત્રોમાં પણ આનંદ છવાઈ ગયો છે. રાજકોટ જિલ્લામાં અગાઉ પિયાતની સિંચાઇ ધરાવતા ખેડૂતોએ આગોતરું વાવેતર કર્યું હતું. જો કે હવે વાવણીલાયક વરસાદ થતાં વાવેતર વધ્યું છે. રાજકોટ જિલ્લા પંચાયતના ખેતીવાડી વિભાગમાંથી મળતી માહિતી પ્રમાણે ચાલુ વર્ષે ખરીફ પાકની સિઝનમાં તા.૨૮/૬/૨૦૨૪ની સ્થિતિએ જિલ્લામાં કુલ ૨૦૫૪૩૭ હેક્ટર વિસ્તારમાં વાવેતર નોંધાયું છે.
ચાલુ વર્ષે જિલ્લામાં કપાસ અને મગફળીનું વાવેતર મુખ્ય રહ્યું છે. આ ઉપરાંત સોયાબીનનું પણ વાવેતર ખેડૂતો દ્વારા કરવામાં આવ્યું છે. મગફળીના વાવેતરની વાત કરવામાં આવે તો જિલ્લાના ગોંડલ તાલુકામાં ૧૯૧૨૦ હેકટરમાં, જસદણમાં ૧૪૫૯૨, રાજકોટમાં ૧૦૩૮૯ ઉપલેટામાં ૯૦૦૦, લોધિકામાં ૯૧૦૦, કોટડાસાંગાણીમાં ૯૩૦૦ સહિતના તાલુકા મળી કુલ ૧૦૪૫૦૨ હેકટરમાં નોંધાયું છે. જ્યારે કપાસમાં સૌથી વધુ ગોંડલમાં ૧૨૨૦૦, જસદણમાં ૧૧૫૩૮, ઉપલેટામાં ૧૦૬૦૦, પડધરીમાં ૧૦૨૧, રાજકોટમાં ૯૫૯૩ જ્યારે ધોરાજીમાં ૯૬૦૦ સહિતના મળી કુલ ૮૯૪૬૭ હેકટરમાં વાવેતર થયું છે.
આ ઉપરાંત જિલ્લામાં સોયાબીનનું કુલ ૨૩૫૧ હેકટરમાં વાવેતર નોંધાયું છે. તેમજ શાકભાજીનું ૩૫૬૯ અને ઘાસચરાનું ૪૬૩૩ હેકટરમાં વાવેતર નોંધાયું છે. મહત્વનું છે કે, રાજકોટ જિલ્લામાં વાવણી લાયક વરસાદ બાદ વાવેતરે વેગ પકડ્યો છે અને જિલ્લાના ૧૧ તાલુકામાં કુલ ૨૦૫૪૩૭ હેક્ટર વિસ્તારમાં વાવેતર નોંધાયું છે.
