શેરબજારમાં ‘ મોદી મેજિક’: રોકાણકારો આટલા લાખ કરોડ કમાયા…વાંચો
સેન્સેક્સમાં – નિફ્ટી ઓલટાઈમ હાઈ
એક્ઝિટ પોલમાં ફરી મોદી સરકાર બની રહી હોવાના દાવાઓથી શેરબજારમાં ધૂમ તેજી જોવા મળી રહી છે. આજે સેન્સેક્સ અને નિફ્ટીમાં ઐતિહાસિક ઉછાળો આવ્યો હતો અને તે રોકાણકારો માટે લાભદાયી સાબિત થયો હતો. આજે રોકાણકારોની સંપતિમાં ૧૨ લાખ કરોડ રૂપિયાનો વધારો થયાનો અંદાજ છે. આજે મંગળવારે મત ગણતરી છે અને આજે પણ મોદી સરકાર રચાશે તેવા સેન્ટીમેન્ટના આધારે તેજી જોવા મળશે તેવી ધારણા રાખવામાં આવી રહી છે.
આજે સેન્સેક્સ એક તબક્કે 2777 પોઈન્ટ વધીને 76738 પહોંચી ગયો હતો અને નિફ્ટી 808 પોઈન્ટ ઉછળીને 23338 પહોંચી ગયો હતો. જોકે, બાદમાં બજાર તેના ઉપલા સ્તરોથી થોડું નીચે આવ્યું હતું અને સેન્સેક્સ 2,507 પોઈન્ટના વધારા સાથે 76,468 પર બંધ થયો હતો . જ્યારે નિફ્ટી 733 પોઈન્ટ વધીને 23,263ની સપાટીએ બંધ રહ્યો હતો.
શેરબજારમાં આવેલી આ તેજી દરમિયાન રોકાણકારોની સંપત્તિમાં લગભગ 12 લાખ કરોડ રૂપિયાનો વધારો થયો છે. શુક્રવારે BSEનું માર્કેટ કેપ રૂ. 4,12,12,881 કરોડ હતું, જે આજે એટલે કે 3 જૂને ટ્રેડિંગ દરમિયાન વધીને રૂ. 4,23,71,233 કરોડ થયું છે.
રિલાયન્સનાં શેરોએ આજે રૂ. 3,025ની સર્વકાલીન ઊંચી સપાટી બનાવી છે. આજે તેના શેરમાં 5% થી વધુનો વધારો થયો છે. આ વર્ષે રિલાયન્સના શેર 16 ટકાથી વધુ વધ્યા છે. આ વધારા સાથે રિલાયન્સનું માર્કેટ કેપ વધીને 20.42 લાખ કરોડ રૂપિયા થઈ ગયું છે.
આજે તમામ સેક્ટર ગ્રીન ઝોનમાં બંધ રહ્યા હતા. સૌથી વધુ ઉછાળો નિફ્ટી પીએસયુ બેંકમાં જોવા મળ્યો હતો. તે 8.40% વધીને બંધ રહ્યો હતો. નિફ્ટી ઓઈલ એન્ડ ગેસ 6.81% વધ્યો. રિયલ્ટી સેક્ટરમાં પણ 5.95%ની વૃદ્ધિ જોવા મળી છે. મેટલ અને મીડિયા સેક્ટર 3% થી વધુ વધ્યા. નિફ્ટી ઓટો 2.45% વધ્યો હતો.