સેન્સેક્સ ઓલટાઈમ હાઈ : નિફ્ટી ૨૩ હજારની નજીક સેન્સેક્સ ૧૨૭૧ પોઈન્ટ ઉછળ્યો : રોકાણકારો ધૂમ કમાયા
રિઝર્વ બેન્કે કેન્દ્ર સરકારને ૨.૧૧ લાખ કરોડના બમ્પર ડિવિડન્ડની લ્હાણી કર્યાની જાહેરાત બાદ
શેરબજારમાં આગઝરતી તેજી જોવા મળી છે અને સેન્સેક્સ અને નિફ્ટીએ ઓલટાઈમ હાઈની સપાટી બનાવી લીધી છે. ફેડરલ રિઝર્વની મિનિટ્સમાં દર્શાવેલ ફુગાવાના પ્રમાણ અને તેના પરના અંકુશ અંગે ફેડરલના અધિકારીઓએ વ્યક્ત કરેલી ચિંતાઓને અવગણીને તેજીવાળાઓએ રિઝર્વ બેંક દ્વારા સરકાર માટે જાહેર કરવામાં આવેલું રૂ. ૨.૧૧ લાખ કરોડના બમ્પર ડિવિડન્ડને ધ્યાનમાં લેતા આજે ઇન્ટ્રાડે જોરદાર તેજી જોવા મળી હતી અને સેન્સેક્સે ૭૫ હજારની સપાટી ક્રોસ કરી લીધી હતી.
આજે સેન્સેક્સ ૧૨૭૧ પોઈન્ટ ઉછળ્યો હતો અને નિફ્ટી પણ ૩૯૩ પોઈન્ટ ઉછળ્યો હતો. કલોઝિંગ સમયે સેન્સેક્સ ૧૧૯૬ પોઈન્ટ વધીને ૭૫,૪૧૮ અને નિફ્ટી ૩૬૯ પોઈન્ટ વધીને ૨૨૯૬૭ ઉપર હતો. આજના ઉછાળાએ રોકાણકારો ધૂમ કમાયા હતા.
છેલ્લા ત્રણ ટ્રેડિંગ દિવસોથી શેરબજારમાં મંદી જોવા મળી હતી, પરંતુ ગુરુવારે ફરી એકવાર બજારમાં ઉછાળો આવ્યો હતો. ધીમી શરૂઆત બાદ અચાનક બોમ્બે સ્ટોક એક્સચેન્જના સેન્સેક્સ અને નેશનલ સ્ટોક એક્સચેન્જના નિફ્ટીમાં જોરદાર ઉછાળો આવ્યો છે. બીએસઈના ટોચના 30 શેરોમાંથી 27 શેરમાં તેજી જોવા મળી છે. એક્સિસ બેન્કે લગભગ 4 ટકાનો ઉછાળો નોંધાવ્યો છે.
નિફ્ટી 50માં અદાણી એન્ટરપ્રાઇઝના શેરમાં સૌથી વધુ 5 ટકાનો વધારો જોવા મળ્યો હતો. એક્સિસ બેંક અને એલએન્ડટીના શેરમાં લગભગ 3 ટકાનો ઉછાળો હતો . જ્યારે મિડકેપ સેગમેન્ટમાં રેલ્વે શેરોના દબદબો જોવા મળ્યો હતો. RVNLના શેરમાં 8 ટકાનો ઉછાળો થયો હતો.
