રાજકોટમાં ભણતરના ભારથી કંટાળી કોલેજીયન યુવકનો ફાંસો ખાઈ આપઘાત

ડી.એચ કોલેજમાં બી.સી.એના બીજા વર્ષમાં અભ્યાસ કરતાં યુવકે ગળેફાંસો ખાઈ જીવન ટૂંકાવી લીધું : બે બહેનોના એકલોતા ભાઈના મોતથી પરિવારમાં કલ્પાંત

આજની એકવીશમી સદીમાં યુવાવર્ગમાં અપઘાતનું પ્રમાણ વધી રહ્યું છે. નજીવી બાબતે અને અભ્યાસના ભારથી કંટાળી આપઘાતનો માર્ગ અપનાવી રહ્યા છે. જેમાં વધુ એક બનાવ ગઇકાલે સામે આવ્યો હતો.40 ફૂટ રોડ પર રહેતા અને ડી.એચ કોલેજમાં બી.સી.એના બીજા વર્ષમાં અભ્યાસ યુવકે ભણતરના ભારથી કંટાળી ફાંસો ખાઈ જીવન ટૂંકાવી લેતા પરિવારમાં અરેરાટી પ્રસરી જવા પામી છે.

આ કરૂણ બનાવની મળતી માહિતી મુજબ 40 ફૂટ રોડ પર સ્વામિનારાયણ પાર્કમાં આકાશદીપ સોસાયટી-4માં રહેતા અને ડી.એચ કોલેજમાં બી.સી.એના બીજા વર્ષમાં અભ્યાસ કરતાં યશપાલભાઈ વનરાજભાઇ પઢિયાર નામના 20 વર્ષીય યુવકે ગઇકાલે પોતાના ઘરે ગળેફાંસો ખાઈ આપઘાત કરી જીવન ટૂંકાવી લીધું હતું બનાવની જાણ તાલુકા પોલીસને થતાં પોલીસ સ્ટાફ ઘટના સ્થળે દોડી આવ્યો હતો અને તેના મૃતદેહને પીએમ અર્થે ખસેડ્યો હતો જ્યારે આ મામલે મૃતકના પરિવારજનોએ વિગતો આપતા જણાવ્યું હતું કે, યશપાલભાઈ  ડી.એચ કોલેજમાં બી.સી.એના બીજા વર્ષમાં અભ્યાસ કરતાં હતા અને થોડા સમયથી તેમને ભણતરનું ભાર વધારે હતો.જેથી યશપાલભાઈએ કંટાળી આ પગલું ભર્યું હતું. યશપાલભાઈના મોતથી બે બહેનોએ એકલોતો ભાઇ ગુમાવતાં પરિવાર શોકમાં ગળકાવ થયો છે.