દુનિયાના સૌથી ધનવાન બિઝનેસમેન કોણ બન્યા ? વાંચો

અંબાણીનો નંબર કેટલો ?

દુનિયાના અમીરો વચ્ચે નંબર 1 ની હરીફાઈ થતી જ રહે છે અને ઉતર -ચડનો ખેલ ચાલતો રહે છે. હવે ફરીવાર આ યાદીમાં મોટો ફેરફાર બહાર આવ્યો હતો. ટેસ્લાના સીઈઓ અને સ્પેસએક્સના માલિક ઈલોન મસ્કે લાંબા સમયથી વિશ્વના સૌથી ધનવાન વ્યક્તિનું સ્થાન મેળવ્યુ હતુ. જોકે હવે તેઓ પછડાઈ ગયા છે. એમેઝોનના ફાઉન્ડર જેફ બેઝોસ આ ધનવાનોની લિસ્ટમાં પહેલા સ્થાને આવી ગયા છે અને તેમણે ઈલોન મસ્કને બીજા સ્થાન પર ધકેલી દીધા છે. મુકેશ અંબાણી 11 માં અને ગૌતમ અદાણી 12 માં સ્થાને છે. બ્લૂમબર્ગના બિલિયોનર ઇન્ડેક્સની વિગતો બહાર આવી હતી.

અહેવાલમાં જણાવ્યા મુજબ જેફ બેઝોસની પાસે અત્યારે 200 અબજ ડોલરની સંપત્તિ છે અને આ સાથે જ તેઓ વિશ્વના સૌથી ધનવાન બિઝનેસમેન અને ધનવાન વ્યક્તિ બની ગયા છે. જોકે જેફ બેઝોસની સંપત્તિમાં પણ 500 મિલિયન ડોલરનો ઘટાડો આવ્યો છે પરંતુ તેમની કુલ નેટવર્થ 200 બિલિયન ડોલર પર છે જે ઈલોન મસ્કની કુલ સંપત્તિ કરતા વધુ છે. આ વર્ષે અત્યાર સુધીમાં જેફ બેઝોસે પોતાની સંપત્તિ 23.4 બિલિયન ડોલર વધારી દીધી છે જ્યારે ઈલોન મસ્કની નેટવર્થ આ વર્ષે 31.3 બિલિયન ડોલર ઘટી છે.

ભારતના ટોચના ઉદ્યોગપતિ મુકેશ અંબાણી બ્લૂમબર્ગ બિલિયોનેર ઈન્ડેક્સમાં 11માં સ્થાને છે અને 115 બિલિયન ડોલર છે. મુકેશ અંબાણી આ વર્ષે અત્યાર સુધી 18.2 બિલિયન ડોલરની પોતાની નેટવર્થમાં જોડાઈ ચૂક્યા છે. ગૌતમ અદાણી આ લિસ્ટમાં 12માં નંબરે છે અને તેમની પાસે હાલ 104 બિલિયન ડોલરની નેટવર્થ છે. આ વર્ષે ગૌતમ અદાણીએ પોતાની નેટવર્થમાં 19.2 બિલિયન ડોલરનો વધારો કર્યો છે.