અમેરિકાના ન્યાયતંત્રના ઇતિહાસનો સૌથી મોટો ચુકાદો શું આવ્યો… વાંચો

હિરાના ગુજરાતી વેપારીએ ભાઈઓને 20,000 કરોડ ચૂકવવા પડશે

લોસ એન્જલસની કોર્ટે પાંચ ગુજરાતી ભાઈઓના સંપત્તિ વિવાદમાં ઐતિહાસિક ચુકાદો આપ્યો
જોગાણી પરિવારની મિલકતોમાં ૧૭,૦૦૦ એપાર્ટમેન્ટ પણ સામેલ

અમેરિકામાં લોસ એન્જલસની કોર્ટે પાંચ ગુજરાતી ભાઈઓના સંપત્તિ વિવાદમાં ઐતિહાસિક ચુકાદો આપ્યો છે જે વિવાદ બે દાયકા કરતા વધારે જૂનો છે.આ ચુકાદા પ્રમાણે હીરાના વેપારી અને રીયલ એસ્ટેટ ટાયકુન હરેશ જોગાણીએ પોતાના ચાર ભાઈઓ- શશિકાંત, રાજેશ, ચેતન અને શૈલેષ જોગાણીને વળતર તરીકે 2.50 અબજ ડોલર, એટલે કે લગભગ 20,000 કરોડ રૂપિયા ચૂકવવા પડશે. કાનૂની જાણકારોનું કહેવું છે કે અમેરિકાના કોર્ટ ઈતિહાસમાં આ સૌથી મોટા અને મહત્ત્વના ચુકાદા પૈકી એક છે.

હરેશ જોગાણીએ અમેરિકામાં જુદા જુદા વ્યવસાયમાંથી જંગી કમાણી કરી છે. તેઓ ડાયમંડ અને રિયલ એસ્ટેટના બિઝનેસ સાથે સંકળાયેલા છે. લોસ એન્જલસની કોર્ટે સાઉથ કેલિફોર્નિયાની મિલ્કતોના શેર પરસ્પર વહેંચી લેવા માટે પણ હરેશ જોગાણીને હુકમ કર્યો છે. તેમની કુલ મિલ્કતોમાં લગભગ 17,000 એપાર્ટમેન્ટ સામેલ છે. હરેશ જોગાણીએ તેમના ચાર ભાઈઓ સાથે ભાગીદારીમાં વ્યવસાય કરતા હતા, પરંતુ પછી તેમણે પાર્ટનરશિપ તોડી નાખી હોવાનો આરોપ મૂકાયો હતો અને ત્યારથી આ કેસ ચાલતો હતો.

જોગાણી પરિવાર મૂળ ગુજરાતી છે અને તેમણે યુરોપ, આફ્રિકા, અમેરિકા અને મિડલ ઈસ્ટ સુધી પોતાનો બિઝનેસ ફેલાવ્યો હતો. ત્યાર પછી તેમણે અમેરિકામાં પોતાનો બેઝ બનાવ્યો હતો. શશી જોગાણી 1969માં 22 વર્ષની વયે કેલિફોર્નિયા આવ્યા હતા અને ડાયમંડ તથા રિયલ એસ્ટેટનો કારોબાર શરૂ કર્યો હતો. 1990ના દાયકાની શરૂઆતમાં તેમને ભારે નુકસાન થયું અને 1994 પછી તેમની સ્થિતિ ખરાબ થઈ હતી. ત્યાર પછી તેમણે પોતાના ભાઈઓને કંપનીમાં પાર્ટનર બનાવ્યા હતા. ત્યાર બાદ એક ભાઈ હરેશ જોગાણીએ ધીમે ધીમે ખરીદી શરૂ કરી અને 17,000 એપાર્ટમેન્ટ ખરીદ્યા હતા.

થોડા દિવસ પછી તેમણે શશિ સહિત પોતાના ચારેય ભાઈઓને મેનેજમેન્ટમાંથી કાઢી મૂક્યા અને તેમનો હિસ્સો પણ ન આપ્યો. હરેશ જોગાણીએ એવી દલીલ કરી કે તેમણે ભાઈઓ સાથે કોઈ લેખિતમાં એગ્રીમેન્ટ કર્યા ન હતા. તેથી તેઓ તેમના ભાગીદાર સાબિત થઈ શકે નહીં. જોકે, કોર્ટમાં આ દલીલ ચાલી નથી. તેથી તેમણે પોતાના ભાઈઓને હવે અઢી અબજ ડોલર ચૂકવવા પડશે. આ ચુકાદા પ્રમાણે શશી જોગાણીને સંપત્તિમાં 50 ટકા હિસ્સો મળશે જ્યારે હરેશ જોગાણીને 24 ટકા હિસ્સો મળશે. બાકીનો હિસ્સો બાકીના ત્રણ ભાઈઓને મળશે.

અમેરિકામાં કોઈ બિઝનેસ ગ્રૂપ પાસે 17,000 એપાર્ટમેન્ટ હોય તે નાની સૂની વાત નથી. આ ગ્રૂપની નાણાકીય તાકાત અને પરિવારના પાંચ સભ્યો વચ્ચેના વિવાદના કારણે અમેરિકન મીડિયામાં આ કેસ ભારે ચમક્યો હતો.