રાજકોટ જ નહીં આખા ગુજરાતની આતૂરતાનો અંત…હવેથી એઈમ્સ આપણી’

૨૫૦ બેડની IPDનું મોદીના હસ્તે લોકાર્પણ: વડાપ્રધાને ઈમરજન્સી વિભાગ, ઓપરેશન થિયેટર સહિતનું કર્યું નિરીક્ષણ

મોદીએ એઈમ્સ નિર્માણની કામગીરીના કર્યા ભરપેટ વખાણ પેટા: માર્ચ મહિનાથી દર્દીઓ દાખલ થઈ શકશે: ચાલું વર્ષે વધુ બે બિલ્ડિંગ તૈયાર કરી લેવાનો લક્ષ્યાંક

રાજકોટ જ નહીં બલ્કે આખું ગુજરાત જેની આતૂરતાથી રાહ જોઈ રહ્યું હતું તે રાજ્યની સૌપ્રથમ એઈમ્સનું વડાપ્રધાન નરેન્દ્રભાઈ મોદીના હસ્તે લોકાર્પણ થઈ ચૂક્યું છે. એકંદરેઆજથી એઈમ્સ આપણી’નું વાક્ય ચરિતાર્થ થઈ ચૂક્યું છે. ત્રણ વર્ષ જ્યાં ઓપીડી (આઉટડોર પેશન્ટ ડિપાર્ટમેન્ટ) કાર્યરત હતી તે એઈમ્સ-રાજકોટમાં હવે આઈપીડી (ઈનડોર પેશન્ટ ડિપાર્ટમેન્ટ) ટૂંક સમયમાં જ શરૂ થઈ જશે.

વડાપ્રધાન મોદીના હસ્તે એઈમ્સ-રાજકોટમાં ૨૫૦ બેડની આઈપીડીનું લોકાર્પણ કર્યું હતું જ્યાં માર્ચ મહિનાથી દર્દીઓને દાખલ કરવાનું શરૂ કરવામાં આવશે. એઈમ્સ-રાજકોટનું લોકાર્પણ કર્યા બાદ મોદીએ ઈમરજન્સી વિભાગ, ઓપરેશન થિયેટર સહિતના વિભાગોનું બારિકાઈથી નિરીક્ષણ કર્યા બાદ ઝડપથી કામગીરી કરવા બદલ ટીમને અભિનંદન પાઠવ્યા હતા. બીજી બાજુ ચાલું વર્ષે વધુ બે બિલ્ડિંગ તૈયાર કરવાનો લક્ષ્યાંક પણ સેવાઈ રહ્યાનું જાણવા મળી રહ્યું છે.

વડાપ્રધાન દ્વારકાથી સીધા રાજકોટ એઈમ્સ હોસ્પિટલ પહોંચ્યા હતા. અહીં તેમણે ઓપીડી સહિતના વિવિધ વિભાગો તેમજ સમગ્ર પરિસરનું નિરીક્ષણ કર્યું હતું. ત્યારબાદ તેમણે આઈપીડી બિલ્ડિંગમાં એઈમ્સની તક્તી અનાવરણ કર્યા બાદ રિબીન કાપીને ગુજરાતની પ્રથમ એઈમ્સ લોકોને સમર્પિત કરી હતી.

આ ઉપરાંત તેમણે એઈમ્સના ભવિષ્યના વિકાસની બ્લુપ્રિન્ટ એવા મોડેલનું અને ગુજરાતની ભાતીગળ સંસ્કૃતિની તેમજ ભારતની પ્રાચીન ચિકિત્સા પરંપરાથી લઈને જીનેટિક ટેક્નોલોજી સુધીની સફરની ઝાંખી કરાવતી ટેપેસ્ટ્રીનું નિરીક્ષણ કર્યું હતું. આ વેળાએ તેમની સાથે એઈમ્સ એક્ઝિક્યુટિવ ડિરેક્ટર ડૉ.સી.ડી.એસ.કટોચ સાથે રહ્યા હતા. આ ઉપરાંત મુખ્યમંત્રી ભૂપેન્દ્ર પટેલ, કેન્દ્રીય આરોગ્ય મંત્રી મનસુખ માંડવિયા, નવસારીના સાંસદ-પ્રદેશ ભાજપ પ્રમુખ સી.આર.પાટીલ, મુખ્ય સચિવ રાજકુમાર, સ્વાસ્થ્ય અને પરિવાર કલ્યાણ વિભાગના સચિવ અપૂર્વા ચંદ્રા, રાજકોટ એઈમ્સના ડેપ્યુટી ડાયરેક્ટર પુનિત અરોરા સહિતના ઉપસ્થિત રહ્યા હતા.

મલ્ટી સ્પેશ્યાલિટી બાદ ટૂંક સમયમાં જ સુપર સ્પેશ્યાલિટી સુવિધા મળશે
૨૦૧ એકર જગ્યામાં ૧૧૯૫ કરોડના ખર્ચે નિર્માણ પામેલી એઈમ્સમાં લોકોને મલ્ટી સ્પેશ્યાલિટી સારવાર મળી રહી છે અને ટૂંક સમયમાં જ સુપર સ્પેશ્યાલિટી સુવિધા મળવા લાગશે. અહીં ૨૦ મેજર તેમજ ૩ માઈનર મળી ૨૩ અદ્યતન ઓપરેશન થિયેટર બનાવાશે.

એઈમ્સમાં કયા ટેસ્ટ કેટલા રૂપિયામાં થશે

• ટેસ્ટ એઈમ્સનો દર ખાનગી લેબનો દર

• સીબીસી ૨૫ ૨૦૦

• બાયોપ્સી ૩૭૪ ૧૨૦૦

• લિપિડ પ્રોફાઈલ ૨૭૫ ૬૦૦

• લીવર ફંક્શન ટેસ્ટ ૨૨૫ ૭૦૦

• કીડની ફંક્શન ૨૨૫ ૬૦૦

ડેંગ્યુ સહિતના ટેસ્ટ ૨૫ રૂપિયામાં થશે
ટેસ્ટ દર
સીરમ ૭૫
ડેંગ્યુ ૨૫
ચિકનગુનિયા ૨૫
મેલેરિયા ૫૦
ટાઈફોઈડ ૮૦
સ્ટુલ રૂટિન ૩૫
એક્સ-રે છાતી ૭૦
ખભ્ભો ૧૫૦
ગોઠણ-પગ-કોણી ૧૫૦
કરોડરજ્જુ-હથેળી-આંગળી ૧૫૦
શરીરના બહારના અંગ ૧૫૦