પાછલા બજેટમાં મહાનગરપાલિકાએ આપેલી યોજનાઓ `લોલીપોપ’ સાબિત
RMCનું બજેટ કે લોકોને `મામું’ બનાવવાનો કીમિયો!?
૨૦૨૩-૨૪ના બજેટમાં જાહેર કરાયેલી અનેક યોજનાઓ હજુ સુધી અધ્ધરતાલ, અનેકના ટેન્ડર સુદ્ધા નથી થયા તો અનેકનું ગોકળગાય ગતિએ ચાલતું કામ
૨૦૨૪-૨૫ના બજેટમાં `હથેળીમાં ચાંદ’ કેવી રીતે બતાવાય છે તેના પર સૌની નજર
રાજકોટ મહાપાલિકા દ્વારા નાણાકીય વર્ષ ૨૦૨૪-૨૫ની આવક-જાવકનું અંદાજપત્ર (બજેટ) આજે રજૂ કરાનાર છે ત્યારે ચૂંટણીને ધ્યાનમાં રાખી સ્વાભાવિક રીતે તેમાં લોકોને આકર્ષે તેવી યોજનાઓ સામેલ કરવામાં આવશે જ પરંતુ જ્યારે ૨૦૨૩-૨૪ મતલબ કે પાછલા બજેટની વાત કરીએ ત્યારે તેમાં સામેલ અનેક યોજનાઓ એવી છે જે લોકો માટે લોલીપોપ' જ સાબિત થઈ છે. એકંદરે લોકો હવે એવું કહેવા લાગ્યા છે કે આ મહાપાલિકાનું બજેટ છે કે પછી પ્રજાનેમામું’ બનાવવાનો નવતર કીમિયો ?!! લોકોના આ કડવા શબ્દો વ્યાજબી પણ લાગી રહ્યા છે કેમ કે પાછલા બજેટમાં જાહેર કરવામાં આવેલી અનેક યોજનાઓ હજુ સુધી અધ્ધરતાલ જ રહી છે એટલે કે તે કાગળ પરથી નીકળી જ નથી તો અનેક યોજનાઓ એવી છે જેના ટેન્ડર સુદ્ધા થયા નથી તો અનેકના ટેન્ડર આ વખતનું બજેટ આવ્યું ત્યારે કરવામાં આવ્યા છે. આવી જ અમુક યોજના એવી છે જેનું કામ ગોકળગાય ગતિએ ચાલી રહ્યું છે. હવે આ વખતના બજેટમાં તંત્રવાહકો દ્વારા લોકોને કેવી રીતે `હથેળીમાં ચાંદ’ બતાવાય છે તે જોવું રસપ્રદ બની રહેશે!
પાછલા બજેટમાં જાહેર કરાયેલી યોજનાઓની શું છે સ્થિતિ
- સાંઢિયા પુલ ફોર-લેન – ત્યારે ખર્ચ ૬૦ કરોડ, હવે ૬૨ કરોડ, હજુ ટેન્ડર નહીં
- પીડીએમ રેલવે ફાટક બ્રિજ – હજુ ટેન્ડર નહીં
- દસ્તુર માર્ગ પર નવું નાલું – કામ અટકેલું
- રસ્તા પર વરસાદી પાણી ન ભરાય તે માટે
- પોલ્યુમરાઈઝ બ્યુટીમિન મટિરિયલનો ઉપયોગ – માત્ર રેસકોર્સ પરનું કામ પૂરું
- અટલ સરોવર – લોકાર્પણની તારીખ નિશ્ચિત નહીં
- વોંકળા સફાઈ – સર્વેશ્વર ચોકમાં વોંકળા પરનો સ્લેબ તૂટી પડ્યો
- એનિમલ સ્મશાન – હજુ ઠેકાણા નહીં
- રામનાથ મહાદેવ મંદિર – ડેવલપમેન્ટ હજુ ઠેકાણા નહીં
- રામવનમાં હેલ્ધી ફૂડઝોન – હજુ ઠેકાણા નહીં
- વોર્ડ નં.૫માં શાળાનું નવું બિલ્ડિંગ – ૨૪ જાન્યુ.૨૦૨૪માં ટેન્ડર ફાઈનલ કરાયું
- વેસ્ટ ઝોનમાં ૨૨ કરોડના ખર્ચે સ્પોર્ટસ કોમ્પલેક્સ – હજુ ઠેકાણા નહીં
- મોટામવાથી ન્યારી ડેમ સુધીનો રોડ પહોળો કરવો – મામલો સરકારમાં
- ત્રિકોણબાગથી માલવિયા ચોક સુધીનો રસ્તો પહોળો કરવો – હજુ ટેન્ડર નહીં
- કનક રોડ પર નવું ફાયર સ્ટેશન – હજુ ઠેકાણા નહીં
- મોટામવા સ્મશાન પાસે વાહન પાર્કિંગની સુવિધા – હજુ ઠેકાણા નહીં
- રાજકોટ દર્શન માટે ૧ કરોડની ફાળવણી – ધારણા પ્રમાણેનો પ્રતિસાદ નહીં
- બોક્સ ટેનિસ ક્રિકેટ – હજુ ઠેકાણા નહીં
શા માટે બજેટમાં જાહેર કરાયેલી યોજનાઓ સાકાર નથી થતી?
મહાપાલિકાના સૂત્રો પાસેથી જાણવા મળેલી વિગતો પ્રમાણે બજેટમાં જાહેર કરવામાં આવતી યોજનાઓ સાકાર થઈ શકે કે કેમ તેનો અભ્યાસ કર્યા બાદ જ નક્કી કરવામાં આવતી હોય છે પરંતુ ઘણી વખત પદાધિકારીઓના વલણને કારણે કામ ખોરંભે ચડી જાય છે તો ઘણી વખત યોજનાનો ખર્ચ વધી જતો હોવાને કારણે ઓછા ભાવે કામ આપી શકાય તેવો આશય રાખીને ઉંચા ભાવે કામ અપાતું નથી. જો કે પાછલી અનેક સ્ટેન્ડિંગ કમિટી બેઠકોમાં જોવા મળ્યું છે કે તંત્ર દ્વારા `ઓન’ મતલબ કે ઉંચા ભાવ ચૂકવીને કોન્ટ્રાક્ટર એજન્સીને કામ અપાઈ રહ્યું છે ત્યારે આવો જ ખર્ચ લોકોપયોગી સુવિધાઓ પાછળ કરાય તો ઘણો જ ફાયદો થાય તેમ છે.
