ગૌતમ ગંભીર-એસ.શ્રીસંથને `નિવૃત્ત’ થયા પછી પણ શાંતિ નથી !!
લેજન્ડસ લીગ ક્રિકેટમાં બન્ને વચ્ચે જોરદાર ઝઘડો: ગંભીરે શ્રીસંથને `ફિક્સર’ કહીને બેફામ ગાળો ભાંડ્યાનો આક્ષેપ
વૉઈસ ઑફ ડે, નવીદિલ્હી
એસ.શ્રીસંથ અને ગૌતમ ગંભીર વચ્ચે જોરદાર વિવાદ થયો છે. ભારતીય ક્રિકેટ ટીમના બે દિગ્ગજ ખેલાડીઓ લેજન્ડસ લીગ ક્રિકેટમાં રમાયેલા એક મુકાબલામાં બાખડી પડ્યા હતા. બન્ને વચ્ચે જોરદાર તું તું મેં મેં થઈ હતી. હવે શ્રીસંથે સનસનીખેજ ખુલાસો કરતા ગૌતમ ગંભીર પર અનેક ગંભીર આરોપ લગાવ્યા છે. શ્રીસંથે વીડિયો શેયર કરીને જણાવ્યું કે આખરે ગૌતમ ગંભીરે તેને એવું શું કહી દીધું કે માથાકૂટ વકરી ગઈ હતી ? શ્રીસંથના આક્ષેપ પ્રમાણે ગંભીરના માથાકૂટ કરવાના સ્વભાવને કારણે જ આ બધું બન્યું છે. ગંભીર તેને મેચ દરમિયાન વારંવાર ફિક્સર કહી રહ્યો હતો સાથે સાથે ગાળો પણ ભાંડી રહ્યો હતો !
ઈન્સ્ટાગ્રામ વીડિયોમાં શ્રીસંથે કહ્યું કે મેં ગંભીર માટે એક પણ અપમાનજનક શબ્દનો ઉપયોગ કર્યો નથી. મેં માત્ર એટલું જ કહ્યું કે તમે શું કહી રહ્યા છો ? હું વ્યંગાત્મક રીતે હસતો રહ્યો કેમ કે તેઓ મને કહી રહ્યા હતા કે તું ફિક્સર છો !
મેચ બાદ તુરંત શ્રીસંથે વીડિયો પોસ્ટ કરતા કહ્યું કે ગંભીર હંમેશા પોતાના સાથી ખેલાડી સાથે ઝઘડો કરતા રહે છે અને તે ટૂંક સમયમાં ખુલાસો કરશે કે ભારતીય ક્રિકેટ ટીમના પૂર્વ ઓપનિંગ બેટરે તેને ખરેખર કહ્યું શું હતું ?
ઉલ્લેખનીય છે કે શ્રીસંથને ૨૦૧૩ આઈપીએલમાં સ્પોટ ફિક્સિંગમાં સામેલ હોવાના આરોપમાં પકડવામાં આવ્યો હતો. તેણે લાંબા સમય સુધી પ્રતિબંધ ખમ્યો હતો અને પછી ૨૦૨૧માં ઘરેલું ક્રિકેટથી વાપસી કરી હતી.
