રાહુલ બાદ મેચ અંગે મમતાએ શું મમરો મૂક્યો ? વાંચો
વર્લ્ડકપના ફાઇનલમાં ભારતની હાર થઈ અને તેના પર હવે રાજકીય મેચ શરૂ થયો છે જે બંધ થવાનું નામ લેતો નથી. રાહુલ ગાંધીએ પનોતીએ હરાવ્યા તેમ કહીને વડાપ્રધાન પર કટાક્ષ કર્યા બાદ પશ્ચિમ બંગાળના મુખ્યમંત્રી મમતા બેનરજીએ પણ મમરો મૂક્યો છે અને એમ કહ્યું કે અમદાવાદમાં મેચ રમાઈ એટલે ભારત હારી ગયું !
એમણે કહ્યું હતું કે જો મુંબઈ અથવા કોલકાતામાં ફાઇનલ મેચ રમાઈ હોત તો ભારતની ટીમ જીતી જાત. ભારતે બધા જ મેચ જીતી લીધા હતા પણ જે મેચમાં પાપીઓએ ભાગ લીધો તેમાં ટીમ હારી ગઈ. ફાઇનલ અમદાવાદમાં રમાયો તેની સામે પણ મમતાને વાંધો હોય તેવી રીતે એમણે નિવેદન આપ્યું છે.
આ પહેલા પણ મમતાએ ક્રિકેટનું ભગવાકરણ કરવાનો કેન્દ્ર પર આરોપ મૂક્યો હતો. એમણે ખેલાડીઓને ભગવા રંગની જર્સી આપવામાં આવી છે તેમ કહીને વિરોધ કર્યો હતો. મમતાએ કહ્યું હતું કે સરકાર દેશભરને ભગવા રંગે રંગી નાખવાનો પ્રયાસ કરી રહી છે.
