આજથી શાળાઓમાં વેકેશન શૈક્ષણિક કાર્યનો છેલ્લો દિવસ
રાજ્ય સરકારના શિક્ષણ વિભાગના પરિપત્રનો ખાનગી શાળાઓ કરશે ઉલાળિયો: ૧૧ દિવસનું જ વેકેશન જાહેર
શહેરના અનેક પ્લે હાઉસ, LKG, HKGમાં પણ વેકેશનના દિવસો ઘટાડતા વાલીઓમાં રોષ
જાહેર રજામાં શિક્ષકોને શાળામા ફરજ માટે કરાય છે દબાણ: વિદ્યાર્થી સગઠન જરૂર પડ્યે શાળા બંદ કરાવશે
આજે શાળામા અભ્યાસ કર્યા બાદ વિદ્યાર્થીઓને ૨૧ દિવસના દિવાળી વેકેશનના પગલે મોજે-મોજ રહેશે. તા.૯ થી ૨૯ નવેમ્બર સુધી શાળાઓમા વેકેશન જાહેર કરવામા આવ્યુ છે. બીજી તરફ આજે રાજકોટ સહિત રાજ્યની તમામ સરકારી, ગ્રાન્ટેડ શાળાઓમા શૈક્ષિણીક કામગીરીનો છેલ્લો દિવસ છે. ગુરુવારથી તા.૨૯ સુધી શાળામા શૈક્ષણિક કાર્ય બધ રહેશે. જો કે, રાજકોટની અમુક સ્વનિર્ભર શાળાઓએ ફક્ત ૧૧ દિવસનું વેકેશન જાહેર કરતા વાલીઓમાં રોષ જોવા મળે છે.
આ ઉપરાત શહેરના જાણીતા એલ.કે.જી, એચ. કે. જી અને પ્લે હાઉસમાં પણ ૮ થી ૧૦ દિવસનું શિક્ષકોને તહેવારને ધ્યાનમા રાખીને વેકેશન જાહેર કરવામા આવ્યુ છે. બીજી તરફ બાળકોને પણ ૧૦ દિવસ બાદ શાળામા બોલાવવા માટે સંચાલકો દ્વારા વાલીઓને સૂચના આપવામા આવી છે. શહેરના કાલાવાડ રોડ પરના આવા અનેક ખાનગી પ્લે હાઉસ, એલ.કે.જી, એચ. કે. જીમાં બાળકોને અભ્યાસ કરાવતી અનેક શૈક્ષણિક સંસ્થાઓએ વેકેશનને ટૂકાવી સત્ર વહેલું શરૂ કરવાની જાહેરાત કરી દીધી છે.
રાજકોટ શહેરમા ગ્રાન્ટેડ,સરકારી સહિતની શાળાઓમા આજે શૈક્ષણિક કાર્યનો છેલ્લો દિવસ છે. સાથોસાથ મધ્યાહન ભોજનના સચાલકોને પણ ૨૧ દિવસનું વેકેશન જાહેર કરવામા આવ્યુ છે. દરમિયાન અમુક ખાનગી શાળાઓ દ્વારા રજાના દિવસોમા શિક્ષકોને બોલાવવામા આવતા હોવાથી આ બાબતે જરૂર પડ્યે વાલી સગઠનો મેદાનમા ઉતરે તેવી શક્યતા છે. અમુક પ્લે હાઉસમાં સવારના ૭:૩૦ થી ૧:૩૦ માટે શિક્ષકોને વેકેશન દરમિયાન ફરજ પર આવવા માટે સંચાલકોએ તાકીદ કરી હોવાનુ સૂત્રોમાંથી જાણવા મળ્યુ છે.
