ઈંગ્લેન્ડ સામે ટક્કર પહેલાં ભારતને ઝટકો: હાર્દિક `આઉટ’
હજુ પગની ઈજા સરખી થઈ નથી: રવિવારે ભારત-ઈંગ્લેન્ડ વચ્ચે મુકાબલો
વર્લ્ડકપમાં રવિવારે ભારત-ઈંગ્લેન્ડ વચ્ચે ટક્કર થાય તે પહેલાં જ ભારતીય ટીમને મોટો ઝટકો લાગ્યો છે. ભારતના ઑલરાઉન્ડર હાર્દિક પંડ્યા આ મેચમાં રમી શકશે નહીં. તેને પાછલા સપ્તાહે પૂનામાં બાંગ્લાદેશ મેચ દરમિયાન ઈજા પહોંચી હતી. આ પછી પંડ્યા બોલિંગ કરી શકતો ન્હોતો. હાલ મેડિકલ ટીમ બેંગ્લોરમાં હાર્દિકની સારવાર કરી રહી છે. જો કે આફિઽકા અને નેધરલેન્ડ સામેની અંતિમ બે મેચમાં હાર્દિક ટીમમાં વાપસી કરી શકે છે.
હાર્દિકને બાંગ્લાદેશ સામેની મેચમાં પગમાં ઈજા પહોંચી હતી. તે ફિલ્ડિંગ કરી રહ્યો હતો ત્યારે દડો રોકવાની કોશિશમાં તેનો પગ વળી ગયો હતો. તેણે મેદાન પર જ મેડિકલ હેલ્પ લીધી પરંતુ આગળ રમી શક્યો ન્હોતો. આ પછી ભારતીય ચાહકોના મનમાં ચિંતા પેદા થઈ ગઈ હતી. પંડ્યા ન્યુઝીલેન્ડ સામે મેચ રમી શક્યો ન્હોતો ત્યારે હવે ઈંગ્લેન્ડ સામે પણ રમી શકશે નહીં.
દરમિયાન પોઈન્ટ ટેબલમાં ભારત નંબર વન છે. ભારતે ન્યુઝીલેન્ડને હરાવીને પોતાનો વિજયરથ જાળવી રાખ્યો છે. આ રવિવારે ભારત વર્લ્ડકપનો છઠ્ઠો મુકાબલો રમવા માટે મેદાન પર ઉતરશે.
