ઘરઆંગણે સૌરાષ્ટ્રનો શરમજનક દેખાવ: રેસ્ટ ઑફ ઈન્ડિયા સામે ૧૭૫ રને પરાજય
૨૫૪ રનના લક્ષ્યાંક સામે આખી ટીમ ૭૯ રનમાં તંબુ ભેગી: સૌરાષ્ટ્ર પ્રિમીયર લીગમાં ચોગ્ગા-છગ્ગા ફટકારનારા ખેલાડીઓ સદંતર ફ્લોપ: ચેતેશ્વર પણ ન ચાલ્યો
સૌરાષ્ટ્ર ક્રિકેટ એસોસિએશન સ્ટેડિયમ પર ઈરાની ટ્રોફીની સૌરાષ્ટ્ર-રેસ્ટ ઑફ ઈન્ડિયા વચ્ચેની મેચમાં ઘરઆંગણે જ ટીમ સૌરાષ્ટે્ર અત્યંત શરમજનક રમતનું પ્રદર્શન કરતાં તેનો ૧૭૫ રને કારમો પરાજય થયો છે. આ મેચમાં સૌરાષ્ટ્રને જીત માટે ૨૫૪ રનનો લક્ષ્યાંક મળ્યો હતો જેની સામે આખી ટીમ માત્ર ૭૯ રન બનાવીને તંબુ ભેગી થઈ જતાં પરાજયનો સ્વાદ ચાખવો પડ્યો છે. એકંદરે તાજેતરમાં જ પૂર્ણ થયેલી સૌરાષ્ટ્ર પ્રિમીયર લીગમાં ચોગ્ગા-છગ્ગા લગાવનારા ખેલાડીઓને આ મુકાબલા માટે સૌરાષ્ટ્રની ટીમમાં સામેલ કરાયા હતા પરંતુ તેઓ સદંતર નિષ્ફળ રહ્યા હતા. આ ઉપરાંત ચેતેશ્વર પુજારાનું બેટ પણ શાંત રહ્યું હોય તેવી રીતે તે પણ બન્ને ઈનિંગના મળી માત્ર ૩૬ રન બનાવી શક્યો હતો. આ મેચમાં સૌરાષ્ટ્ર વતી એકમાત્ર ઉમદા દેખાવ બોલર પાર્થ ભૂતે કર્યો હતો જેણે પહેલી ઈનિંગમાં પાંચ અને બીજી ઈનિંગમાં સાત વિકેટ ખેડવી હતી.
