માઇક્રોસોફ્ટની Outlook અને Microsoft 365 સેવા 10 કલાકથી ઠપ: ભારત સહિત વિશ્વભરમાં ઈમેલ વ્યવહાર ખોરવાયો, 1 લાખથી વધુ ફરિયાદો

વિશ્વની અગ્રણી ટેકનોલોજી કંપની માઇક્રોસોફ્ટની લોકપ્રિય ઇમેઇલ સેવા Outlook અને ક્લાઉડ આધારિત Microsoft 365 ના સર્વરમાં ગુરુવારે મોડી રાતથી ગંભીર ટેકનિકલ ખામી સર્જાઈ છે. સતત 10 કલાકથી વધુ સમયથી સેવાઓ ખોરવાયેલી રહેતાં ભારત સહિત દુનિયાભરના કરોડો યુઝર્સ અને કોર્પોરેટ કંપનીઓ ભારે મુશ્કેલીમાં મુકાઈ ગઈ છે. ઇનબોક્સ ન ખુલવા તેમજ મહત્વપૂર્ણ ઇમેઇલ મોકલવા કે મેળવવામાં અવરોધ ઊભો થતાં આઈટી સેક્ટર, બેન્કિંગ અને ઓફિસોનું દૈનિક કામકાજ ખોરવાઈ ગયું છે.

Outlook અને Microsoft 365 માં શું સમસ્યા સર્જાઈ?

સર્વરમાં ઊભી થયેલી કનેક્ટિવિટીની ખામીને કારણે યુઝર્સને પોતાના એકાઉન્ટમાં લોગિન કરવામાં ભારે મુશ્કેલી પડી રહી છે. મોટાભાગના યુઝર્સનું મેઇલબોક્સ એક્સેસ થઈ રહ્યું નથી, જ્યારે ઘણા યુઝર્સના ઇનકમિંગ અને આઉટગોઇંગ ઇમેઇલ અટવાઈ પડ્યા છે. કોર્પોરેટ જગતનું મોટાભાગનું સંચાર માધ્યમ આઉટલુક પર નિર્ભર હોવાથી વૈશ્વિક સ્તરે કામકાજની ગતિ પર બ્રેક લાગી ગઈ છે.

DownDetector પર 1 લાખથી વધુ ફરિયાદો નોંધાઈ

આઉટેજ ટ્રેકિંગ પ્લેટફોર્મ DownDetector ના આંકડા અનુસાર, અમેરિકન સમય મુજબ બપોરે આશરે 1 વાગ્યાથી આ સમસ્યાની શરૂઆત થઈ હતી અને જોતજોતામાં ફરિયાદોનો ધોધ વછૂટ્યો હતો. અત્યાર સુધીમાં એકલા Outlook અંગે જ 1,00,000 થી વધુ યુઝર્સે ફરિયાદ નોંધાવી છે, જ્યારે Microsoft 365 ના હજારો ગ્રાહકોએ પણ સેવા બંધ હોવાની જાણ કરી છે.

આ પણ વાંચો: વાયદા બજારમાં સોના-ચાંદીની ચમક વધી: સોનું ₹1,362 ઉછળી ₹1.37 લાખને પાર, ચાંદી ₹1.80 લાખની સપાટી કુદાવી ગઈ

શરૂઆતમાં અમેરિકા પૂરતી સમસ્યા મનાઈ, પછી વૈશ્વિક અસર દેખાઈ

માઇક્રોસોફ્ટે સોશિયલ મીડિયા પ્લેટફોર્મ ‘X’ (અગાઉ ટ્વિટર) પર સત્તાવાર નિવેદન જારી કરીને કનેક્ટિવિટીમાં ખામી હોવાનું સ્વીકાર્યું છે. કંપનીને શરૂઆતમાં લાગ્યું હતું કે આ ટેકનિકલ ખામી માત્ર અમેરિકા પૂરતી મર્યાદિત છે, પરંતુ થોડા જ સમયમાં ભારત, યુરોપ અને એશિયાના અન્ય દેશોમાં પણ તેની વ્યાપક અસર જોવા મળી હતી. માઇક્રોસોફ્ટની એન્જિનિયરિંગ ટીમ ખામીનું મૂળ કારણ શોધી સેવા પુનઃસ્થાપિત કરવા કાર્યરત છે, પરંતુ સંપૂર્ણ ઉકેલ ક્યારે આવશે તેની કોઈ ચોક્કસ સમયમર્યાદા જાહેર કરાઈ નથી.

2024 ના CrowdStrike આઉટેજની યાદ તાજી થઈ

માઇક્રોસોફ્ટની સેવાઓમાં મોટા પાયે વિક્ષેપ પડવાની આ પ્રથમ ઘટના નથી. અગાઉ વર્ષ 2024 માં પણ વિશ્વભરના Windows યુઝર્સને ઐતિહાસિક ટેકનિકલ સંકટનો સામનો કરવો પડ્યો હતો, જ્યારે સાયબર સિક્યોરિટી કંપની CrowdStrike ના ખામીયુક્ત અપડેટને કારણે લાખો કમ્પ્યુટર્સમાં ‘બ્લુ સ્ક્રીન એરર’ આવી હતી અને એરલાઇન્સથી લઈને બેન્કિંગ સેવાઓ ઠપ થઈ ગઈ હતી. હવે ફરી એકવાર ઇમેઇલ સર્વર ઠપ થતાં ડિજિટલ નિર્ભરતા સામે સવાલો ઊભા થયા છે.

માઇક્રોસોફ્ટ સર્વર આઉટેજની મુખ્ય વિગતો

આજના ડિજિટલ યુગમાં જ્યાં નાના-મોટા તમામ વ્યવસાયો અને સરકારી-ખાનગી કચેરીઓ ઇમેઇલ અને ક્લાઉડ સેવાઓ પર આધારિત છે, ત્યાં માઇક્રોસોફ્ટ જેવી દિગ્ગજ કંપનીનું સર્વર 10 કલાકથી વધુ સમય સુધી ઠપ રહેવું એ મોટી આર્થિક અને વહીવટી અડચણ ઊભી કરે છે. હાલ કરોડો યુઝર્સ અને આઈટી પ્રોફેશનલ્સ કંપની તરફથી સેવાઓ પૂર્વવત થવાની સત્તાવાર જાહેરાતની આતુરતાપૂર્વક રાહ જોઈ રહ્યા છે.