અમદાવાદમાં વાયુ પ્રદૂષણ બેકાબૂ: 17 વિસ્તારોમાં AQI 200ને પાર, 276 સાથે થલતેજ સૌથી વધુ ઝેરી હવામાં

દેશની રાજધાની દિલ્હીમાં પ્રદૂષણના કહેર બાદ હવે ગુજરાતનું આર્થિક પાટનગર અમદાવાદ પણ ઝેરી સ્મોગના ભરડામાં સપડાયું છે. દિવાળી પર્વ નિમિત્તે થયેલી ભવ્ય આતશબાજી, ફટાકડાના ઝેરી ધુમાડા અને વાતાવરણમાં આવેલા પલટાના પરિણામે શહેરની હવાની ગુણવત્તા જોખમી હદે કથળી છે. શહેરના 17 થી વધુ મુખ્ય વિસ્તારોમાં એર ક્વોલિટી ઇન્ડેક્સ (AQI) 200 નો આંકડો પાર કરી ‘ગંભીર’ શ્રેણીમાં પહોંચી ગયો છે, જેના કારણે નાગરિકોમાં શ્વાસ લેવામાં તકલીફ, આંખોમાં બળતરા અને ગળાના ઇન્ફેક્શન જેવી ફરિયાદો વધી રહી છે.

પશ્ચિમ અમદાવાદ ગેસ ચેમ્બર બન્યું: થલતેજ, હેબતપુર અને સોલા સૌથી પ્રભાવિત

તાજેતરના મોનિટરિંગ આંકડા અનુસાર, પશ્ચિમ અમદાવાદના પોશ વિસ્તારો પ્રદૂષણની સૌથી વધુ ઝપેટમાં આવ્યા છે. શહેરમાં સર્વાધિક 276 AQI સાથે થલતેજ વિસ્તાર સૌથી વધુ પ્રદૂષિત નોંધાયો છે. આ ઉપરાંત હેબતપુરમાં 264 અને સોલા સ્ટેશન-2 પર 262 AQI નોંધાતાં સ્થાનિક રહીશો માટે ખુલ્લી હવામાં શ્વાસ લેવો પણ જોખમી બન્યો છે. વાતાવરણમાં ધુમાડો અને ઠંડી ભેજવાળી હવા સ્થિર થઈ જતાં ઝેરી રજકણો જમીનની સપાટી નજીક જમા થઈ ગયા છે.

બોપલથી ચાંદખેડા સુધી 17 વિસ્તારોમાં ઝેરી હવાનું સામ્રાજ્ય

શહેરના નવા અને વિકસિત રહેણાંક વિસ્તારોમાં પણ પ્રદૂષણનું પ્રમાણ ચિંતાજનક સ્તરે પહોંચ્યું છે. બોપલ 220 અને ઘુમા 217 AQI સાથે રેડ ઝોનમાં મુકાયા છે, જ્યારે સાઉથ બોપલના વિવિધ સ્ટેશનો પર AQI 202 થી 240 ની વચ્ચે નોંધાયો છે. શિવાલિક લેક વ્યુ (234), વસંતનગર (228), ચાંદખેડા (203), નિગમનગર (203), રામનગર (202) અને સરખેજ (201) જેવા વિસ્તારોમાં પણ હવાની ગુણવત્તા અત્યંત ખરાબ સ્થિતિમાં પહોંચી ગઈ છે.

આ પણ વાંચો: ચાઈનીઝ જાસૂસી વિવાદ વચ્ચે જેન્સન હુઆંગના સમર્થનમાં ડોનાલ્ડ ટ્રમ્પ: ‘તેઓ સન્માનિત વ્યક્તિ, દેશ માટે અદ્ભુત કામ કર્યું’

તબીબોની ચેતવણી: શ્વાસના દર્દીઓ અને બાળકોને સાવચેત રહેવા અપીલ

હવામાં PM 2.5 અને PM 10 સહિતના હાનિકારક ઝેરી કણોનું પ્રમાણ વધતાં આરોગ્ય નિષ્ણાતોએ ગંભીર ચેતવણી ઉચ્ચારી છે. ખાસ કરીને નાના બાળકો, વૃદ્ધો, સગર્ભા મહિલાઓ અને અસ્થમા કે શ્વસનતંત્રની બીમારી ધરાવતા દર્દીઓને વહેલી સવારે મોર્નિંગ વોક ટાળવા તેમજ બિનજરૂરી બહાર ન નીકળવા તાકીદ કરવામાં આવી છે. તબીબોએ લોકોને ઘરની બહાર નીકળતી વખતે N-95 માસ્કનો ઉપયોગ કરવા અને પૂરતી માત્રામાં પ્રવાહી લેવા અનુરોધ કર્યો છે.

અમદાવાદના મુખ્ય વિસ્તારોમાં નોંધાયેલ એર ક્વોલિટી ઇન્ડેક્સ (AQI)

તહેવારોની ઉજવણી બાદ અમદાવાદમાં સર્જાયેલી આ ઝેરી સ્મોગની સ્થિતિ સ્પષ્ટ સંકેત આપે છે કે શહેરમાં વાયુ પ્રદૂષણનું સંકટ હવે માત્ર દિલ્હી પૂરતું સીમિત નથી રહ્યું. વાહનોનું ઉત્સર્જન, કન્સ્ટ્રક્શન ડસ્ટ અને ફટાકડાના ધુમાડાના ત્રિવેણી સંગમથી ઊભી થયેલી આ ગંભીર કટોકટી સામે મ્યુનિસિપલ તંત્ર દ્વારા સ્પ્રિંકલિંગ અને નિયંત્રણના તાત્કાલિક પગલાં લેવા તેમજ નાગરિકો દ્વારા વ્યક્તિગત સાવચેતી રાખવી અનિવાર્ય બની ગઈ છે.