AMCમાં નિયમો નેવે મુકાયા: 180 પટ્ટાવાળા રાખવા ટેન્ડર વગર 5 કરોડનું કામ આપવાની તૈયારી

અમદાવાદ મ્યુનિસિપલ કોર્પોરેશન (AMC) માં વધુ એક વખત ટેન્ડર પ્રક્રિયાને બાયપાસ કરીને માનીતી એજન્સીઓ પર મહેરબાની વરસાવવાની હિલચાલ સામે આવતાં વહીવટી વર્તુળોમાં ભારે ચકચાર મચી છે. તંત્રમાં 15,000 થી વધુ કાયમી-હંગામી કર્મચારીઓનો કાફલો કાર્યરત હોવા છતાં, પટ્ટાવાળાની ઘટનું કારણ આગળ ધરીને કરોડો રૂપિયાનું આઉટસોર્સિંગ કામ નિયમોનું પાલન કર્યા વિના સીધું સોંપવાની તજવીજ હાથ ધરાઈ છે. આ સમગ્ર વ્યવહારમાં કોઈ નવી જાહેર ટેન્ડર પ્રક્રિયા હાથ ધર્યા વિના, જૂના ઠરાવોની આડ લઈને એજન્સીઓને ડિપોઝિટ અને કરારપત્રમાંથી પણ મુક્તિ આપવાની દરખાસ્ત લાવવામાં આવી રહી છે, જેને પગલે પારદર્શિતા સામે ગંભીર સવાલો ઊભા થયા છે.

આઉટસોર્સિંગ દરખાસ્તની મુખ્ય રૂપરેખા

સ્થાયી સમિતિમાં ટેન્ડર વગર કામ સોંપવાની સીધી દરખાસ્ત

અમદાવાદ મ્યુનિસિપલ કોર્પોરેશન દ્વારા 180 પટ્ટાવાળા મેળવવા માટે આશરે ₹5 કરોડનું કામ નવી ટેન્ડર પ્રક્રિયા કર્યા વગર ત્રણ ચોક્કસ એજન્સીઓને સોંપવાની યોજના તૈયાર કરાઈ છે. બુધવારે મળનારી સ્થાયી સમિતિની બેઠકમાં આ અંગેની સીધી દરખાસ્ત મંજૂરી અર્થે રજૂ કરવામાં આવનાર છે. નવાઈની વાત એ છે કે સામાન્ય વહીવટી નિયમોથી વિપરીત આ એજન્સીઓને કરારપત્ર ભરવા તેમજ નિયત ડિપોઝિટ જમા કરાવવામાંથી પણ મુક્તિ આપવાની જોગવાઈ આ દરખાસ્તમાં સામેલ કરવામાં આવી છે.

આ પણ વાંચો: ગુજરાતમાં ઘેરાયું વીજ સંકટ: ઉદ્યોગોમાં 8 કલાક કાપ, શહેરો અને ખેતી પર ખતરો

22 ઓગસ્ટ 2025ના જૂના ઠરાવનો આધાર

નવી સ્પર્ધાત્મક બોલી મંગાવવાને બદલે 22 August 2025 ના રોજ હેલ્થ એન્ડ સોલિડ વેસ્ટ મેનેજમેન્ટ કમિટી દ્વારા મંજૂર કરાયેલા જૂના ઠરાવને આગળ ધરવામાં આવ્યો છે. તે સમયે બે અલગ દરખાસ્તો પૈકી એકમાં ₹6.13 કરોડના ખર્ચે 164 પટ્ટાવાળા અને બીજી દરખાસ્તમાં ₹16 કરોડના ખર્ચે 288 પટ્ટાવાળા બે વર્ષ માટે આઉટસોર્સિંગથી લેવાની મંજૂરી અપાઈ હતી. તે ગણતરી મુજબ વાર્ષિક એક પટ્ટાવાળા પાછળ એજન્સીને ₹2.77 લાખ ચૂકવવાનું નક્કી કરાયું હતું. એ જ દરોનો હવાલો આપીને હાલ 180 પટ્ટાવાળા માટે ₹5 કરોડનો બોજ તિજોરી પર નાખવામાં આવી રહ્યો છે.

ત્રણ એજન્સીઓ વચ્ચે 60-60 કર્મીઓની વહેંચણી

હાલની યોજના મુજબ ત્રણ એજન્સીઓ—અલ્ટ્રામોર્ડન એજન્સી, ક્લીન ઇન્ડિયા અને શાશ્વત સાફલ્ય પ્રા. લિ. પાસેથી 60-60 પટ્ટાવાળા લેવાશે. આ પૈકી પ્રત્યેક એજન્સીમાંથી 9 પટ્ટાવાળા સેક્રેટરી ઓફિસમાં અને બાકીના 51 પટ્ટાવાળા મ્યુનિસિપલ કોર્પોરેશનના અન્ય વિવિધ ખાતાઓમાં નિયુક્ત કરવામાં આવશે. 30 November 2027 સુધી લેવાનારી આ સેવાઓ પેટેનો વર્ક ઓર્ડર અને નાણાકીય ચૂકવણી જે-તે સંબંધિત ખાતા દ્વારા કરવામાં આવશે.

કાગળ પર ₹23,150 નો પગાર અને વાસ્તવિકતા વચ્ચે મોટો તફાવત

તંત્રની ગણતરી મુજબ પ્રત્યેક પટ્ટાવાળા પેટે વાર્ષિક ₹2.77 લાખ એટલે કે દર મહિને આશરે ₹23,150 નો ખર્ચ દર્શાવવામાં આવ્યો છે. જોકે વાસ્તવિકતામાં ગ્રાઉન્ડ લેવલ પર કામ કરતા શ્રમિકોને ₹12,000 થી ₹15,000 જેટલું જ વેતન ચૂકવાતું હોવાની વ્યાપક ચર્ચા છે. બાકીની મોટી રકમ એજન્સીઓના નફા અને કમિશનમાં જતી રહેતી હોવાના ગંભીર આક્ષેપો ઉઠી રહ્યા છે, જેના કારણે પ્રજાના પરસેવાની કમાણીમાંથી અપાતા નાણાંનો દુરુપયોગ થતો હોવાનો મુદ્દો ગરમાયો છે.

પારદર્શક વહીવટના દાવાઓ વચ્ચે નિયમોને બાજુ પર મૂકીને ટેન્ડર, એગ્રીમેન્ટ અને સિક્યોરિટી ડિપોઝિટ વિના કરોડો રૂપિયાનું આઉટસોર્સિંગ કામ ખાનગી એજન્સીઓને પધરાવી દેવાની આ તજવીજ વહીવટી શુદ્ધતા સામે મોટો સવાલ ઊભો કરે છે. હવે આ વિવાદાસ્પદ દરખાસ્ત પર સ્થાયી સમિતિ મંજૂરીની મહોર મારે છે કે પ્રજાના ટેક્સના નાણાંની સુરક્ષા માટે તેને પરત મોકલે છે, તેના પર સહુની નજર ટકેલી છે.