પંજાબની LPUમાં હિંસક વિરોધ વચ્ચે ‘યુનિ મોલ’માં લૂંટના વીડિયો વાયરલ: હાઈવે બ્લોક, પોલીસ વાહનોમાં આગચંપી

પંજાબના ફગવાડા સ્થિત લવલી પ્રોફેશનલ યુનિવર્સિટી (LPU) કેમ્પસમાં વિદ્યાર્થીઓનો રોષ હિંસક આંદોલનમાં ફેરવાઈ ગયો છે. સોશિયલ મીડિયા પર ફેલાયેલી ગંભીર બાબતોના વિરોધથી શરૂ થયેલું પ્રદર્શન જોતજોતામાં નિયંત્રણ બહાર જતાં પરિસ્થિતિ અત્યંત તંગ બની હતી. કેમ્પસની આંતરિક મિલકતોને નુકસાન પહોંચાડવાની સાથે જાહેર માર્ગો પર સર્જાયેલી અંધાધૂંધીએ કાયદો અને વ્યવસ્થા સામે ગંભીર સવાલો ઊભા કર્યા છે.

વાયરલ વીડિયો અને મોલમાં કથિત લૂંટના દ્રશ્યો

કેમ્પસ પરિસરમાં આવેલા ‘યુનિ મોલ’ના કેટલાક વાયરલ વીડિયો સામે આવ્યા છે, જેમાં લોકો દુકાનોમાંથી ખાદ્યસામગ્રી, ગેજેટ્સ અને અન્ય સામાન ઉઠાવી જતાં દેખાય છે. વીડિયોમાં “મફતમાં શોપિંગ” જેવા અવાજો અને “ઓર્ડર આપો, બધું ફ્રીમાં મળશે” તેવી ટિપ્પણીઓ સંભળાઈ રહી છે. જોકે, આ વીડિયોની સત્તાવાર પુષ્ટિ થઈ નથી અને તોડફોડ કે લૂંટ કરનારા તમામ લોકો યુનિવર્સિટીના જ વિદ્યાર્થીઓ હતા કે બહારના તત્વો, તે અંગે તપાસ ચાલુ છે.

હાઈવે બ્લોકેજ, પથ્થરમારો અને વાહનોમાં આગચંપી

વિદ્યાર્થીઓએ રવિવારે NH-44 (નેશનલ હાઈવે-44) કલાકો સુધી બ્લોક કરી દીધો હતો. વાટાઘાટો નિષ્ફળ રહેતાં પોલીસે રસ્તો ખાલી કરાવવા લાઠીચાર્જ કરવો પડ્યો હતો, જેના વળતા જવાબમાં પોલીસ દળ પર ભારે પથ્થરમારો થયો હતો. પ્રદર્શનકારીઓએ બે પોલીસ વાહનોને આગ ચાંપી દીધી હતી તથા અન્ય સરકારી વાહનોમાં તોડફોડ કરી હતી, જેમાં અનેક પોલીસકર્મીઓ ઈજાગ્રસ્ત થયા હતા. હિંસા દરમિયાન પ્રદર્શનકારીઓ કેમ્પસમાં પ્રદર્શિત MiG-23 વિમાન અને લશ્કરી ટેન્ક પર પણ ચઢી ગયા હતા.

આ પણ વાંચો: SIR વિવાદ પર જે.પી. નડ્ડાનો વિપક્ષ પર વળતો પ્રહાર: કહ્યું- “સો વાર જૂઠું બોલવાથી સત્ય નથી બની જતું”, ચૂંટણી પંચનું કર્યું સમર્થન

વિરોધ ભડકવા પાછળના કારણો અને યુનિવર્સિટીનું વલણ

શનિવારે રાત્રે સોશિયલ મીડિયા પર એક વિદ્યાર્થિની પર કથિત બળાત્કાર અને આત્મહત્યાની અફવાઓ ફેલાયા બાદ હોસ્ટેલ બહાર વિદ્યાર્થીઓ એકઠા થયા હતા. આ અગાઉ લગભગ 2 અઠવાડિયા પહેલાં તેલંગાણાના એક વિદ્યાર્થીએ કરેલી આત્મહત્યાને લઈને પણ રોષ પ્રવર્તતો હતો. આ મામલે પોલીસે કથિત ફરિયાદના આધારે FIR નોંધી SITની રચના કરી છે. બીજી તરફ યુનિવર્સિટી તંત્રએ આ તમામ આરોપોને પાયાવિહોણી અફવાઓ ગણાવી નકારી કાઢ્યા છે અને સંપૂર્ણ તપાસમાં સહકાર આપવાની ખાતરી આપી છે.

બહારના તત્વોની સંડોવણીની આશંકા

એક વિદ્યાર્થીના જણાવ્યા અનુસાર વિરોધ પ્રદર્શન સામાન્ય વિદ્યાર્થીઓના હાથમાંથી નીકળી ગયું હતું અને બહારના કેટલાક અસામાજિક તત્વો કેમ્પસમાં ઘૂસી આવ્યા હતા. તેમણે CS બિલ્ડિંગમાં આગ લગાડવા, એડમિશન બ્લોક અને હોલમાં તોડફોડ કરવાનો આરોપ મૂક્યો હતો. પોલીસે પણ પુષ્ટિ કરી છે કે હિંસા કરનારા ઘણા લોકોએ પોતાના ચહેરા ઢાંકેલા હતા, જેથી તેમની ઓળખ માટે સીસીટીવી ફૂટેજની બારીકાઈથી તપાસ કરવામાં આવી રહી છે.

અફવાઓ અને આક્રોશ વચ્ચે ભડકેલી આ હિંસાએ શૈક્ષણિક સંસ્થાની શાંતિ ડહોળી નાખી છે. વહીવટીતંત્રે આગામી 10 દિવસ માટે વર્ગો સ્થગિત કરી પરીક્ષાઓ પાછી ઠેલવી પડી છે. SIT દ્વારા હાથ ધરાયેલી ફોરેન્સિક અને ડિજિટલ પુરાવાઓની તપાસ પૂર્ણ થયા બાદ જ હિંસા, આગચંપી અને કથિત અફવાઓ પાછળનું સાચું સત્ય સામે આવશે.