કરવેરાની જમાવટ: ઈંધણ પરના ટેક્સથી ગુજરાત સરકારને થઈ 1 વર્ષમાં 21,992 કરોડની બંપર કમાણી

ગુજરાતમાં પેટ્રોલ અને ડિઝલના વેચાણ પર વસૂલવામાં આવતા વિવિધ કરવેરા રાજ્ય સરકાર માટે રેવન્યુનો સૌથી મોટો સ્ત્રોત સાબિત થઈ રહ્યા છે. નાણાકીય વર્ષ ૨૦૨૫-૨૬ દરમિયાન સરકારને ઈંધણ પરના ટેક્સમાંથી જંગી કમાણી થઈ હોવાના સત્તાવાર આંકડાઓ સામે આવ્યા છે.

૨૧,૯૯૨ કરોડની જંગી આવક અને વેરાની વિગતો

રાજ્ય સરકાર દ્વારા નાણાકીય વર્ષ ૨૦૨૫-૨૬માં પેટ્રોલ અને ડઝિલ પરના વેટ, સી.એસ.ટી. અને સેસ મારફતે કુલ રૂપિયા ૨૧,૯૯૨ કરોડ ની કમાણી કરવામાં આવી છે. ગુજરાતમાં હાલ પેટ્રોલ પર ૧૩.૭ ટકા અને ડીઝલ પર ૧૪.૯ ટકા વેટ વસૂલવામાં આવે છે, આ ઉપરાંત ૪ ટકાનો સેસ પણ લેવામાં આવે છે.

પેટ્રોલની આવક: પેટ્રોલ પરના વેટ પેટે રૂ. ૪,૪૨૩ કરોડ, સી.એસ.ટી.માંથી રૂ. ૧,૦૪૦ કરોડ અને સેસમાંથી રૂ. ૧,૩૨૮ કરોડની આવક થઈ હતી.

ડિઝલની આવક: વેટમાંથી રૂ. ૮,૬૭૫ કરોડ, સી.એસ.ટી.માંથી રૂ. ૨,૪૨૭ કરોડ અને સેસમાંથી રૂ. ૩,૦૯૯ કરોડ પ્રાપ્ત થયા હતા.

આ પણ વાંચો: મધ્ય પૂર્વ અને દક્ષિણ એશિયાના સમીકરણો બદલાયા: સાઉદી અરેબિયાએ પાકિસ્તાનને દરવાજો બતાવી અફઘાનિસ્તાન સાથે કરી કરોડોની ડીલ

ડીઝલ બન્યું સરકારની આવકનું મુખ્ય સાધન

આવકની દ્રષ્ટિએ ડીઝલ પેટ્રોલ કરતા ઘણું આગળ રહ્યું છે. સરકારને થયેલી કુલ આવકમાં ડીઝલનો હિસ્સો ૬૯.૧૦ ટકા અને પેટ્રોલનો હિસ્સો ૩૦.૯૦ ટકા જેટલો છે. આ આંકડાઓનું વિશ્લેષણ કરીએ તો ગુજરાત સરકારને માત્ર પેટ્રોલ-ડીઝલ પરના ટેક્સ થકી દરરોજ સરેરાશ રૂપિયા ૬૦.૨૫ કરોડ ની કમાણી થાય છે.

સારરૂપે કહીએ તો, આમ જનતા પર મોંઘવારીનો માર ભલે રહેતો હોય, પરંતુ ઈંધણ પર લાગતા ઊંચા કરવેરાઓને કારણે સરકારની તિજોરી સતત છલકાઈ રહી છે. રાજ્યના વિકાસ કાર્યો માટે આ જંગી આવક અત્યંત મહત્વપૂર્ણ ભૂમિકા ભજવે છે.