અમેરિકાના નવા ઇમિગ્રેશન પ્રસ્તાવથી ભારતીય IT પ્રોફેશનલ્સમાં ફફડાટ: નોકરી છૂટતા જ દેશ છોડવાનો આવશે વારો

અમેરિકામાં વિદેશી પ્રોફેશનલ્સ માટે કામ કરવાની પરિસ્થિતિઓ વધુ કઠિન બની રહી છે. ડોનાલ્ડ ટ્રમ્પ પ્રશાસન દ્વારા H-1B વિઝાધારકોને મળતી રાહતના નિયમોમાં મોટા ફેરફાર કરવાની તૈયારીઓ ચાલી રહી છે, જેના કારણે અમેરિકામાં સ્થાયી થયેલા હજારો ભારતીય પરિવારોની ચિંતા વધી ગઈ છે.

H-1B વિઝાના ૬૦ દિવસના ‘ગ્રેસ પિરિયડ’ નાબૂદ કરવાનો પ્રસ્તાવ

અમેરિકાના હોમલેન્ડ સિક્યોરિટી વિભાગ (DHS) દ્વારા તૈયાર કરાયેલા એક પ્રસ્તાવને વ્હાઇટ હાઉસ દ્વારા કેટલાક સુધારા સાથે મંજૂરી આપવામાં આવી છે. આ પ્રસ્તાવ હેઠળ નોકરી ગુમાવનાર વિદેશી પ્રોફેશનલ્સને હાલમાં મળતો ૬૦ દિવસનો ‘ગ્રેસ પિરિયડ’ (છૂટની મુદત) સંપૂર્ણપણે નાબૂદ કરવામાં આવી શકે છે. જો આ પ્રસ્તાવ કાયદો બનશે, તો નોકરી છૂટતાની સાથે જ ભારતીય IT પ્રોફેશનલ્સને રાતોરાત અમેરિકા છોડવાની ફરજ પડી શકે છે.

ભારતીય પ્રોફેશનલ્સ અને પરિવારો પર સીધી અસર

વર્તમાન નિયમો મુજબ નોકરી જતી વખતે H-1B, L-1 અને O-1 વિઝાધારકોને ૬૦ દિવસનો સમય મળતો હતો, જેમાં તેઓ નવો નોકરીદાતા (Employer) શોધી શકતા હતા અથવા વિઝા સ્ટેટસ બદલી શકતા હતા. H-1B વિઝા મેળવનારાઓમાં ભારતીયોની સંખ્યા સૌથી વધુ હોવાથી આ નિર્ણયની સૌથી માઠી અસર ભારતીય સમુદાય પર પડશે. પૂર્વ સલાહકાર અજય જૈન ભુટોરિયાએ આ પ્રસ્તાવને ‘અમાનવીય’ ગણાવ્યો છે, કારણ કે નવો સ્પોન્સર શોધવા અને કાગળની કામગીરી પૂરી કરવામાં ઘણો સમય લાગે છે.

આ પણ વાંચો: રાહુલ ગાંધીએ ભાજપ-RSS પર સાધ્યું નિશાન: કથિત ‘શુદ્ધિકરણ’ વિવાદ પર FIR નોંધવાની કરી માંગ

આગામી પ્રક્રિયા અને ફેડરલ રજિસ્ટર નોટિફિકેશન

યુએસ સિટિઝનશિપ એન્ડ ઇમિગ્રેશન સર્વિસીસ (USCIS) દ્વારા તૈયાર કરાયેલા આ પ્રસ્તાવને હવે ‘ફેડરલ રજિસ્ટર’માં પ્રકાશિત કરવામાં આવશે. ત્યારબાદ જનતા અને બિઝનેસ લીડર્સ પાસેથી સૂચનો તથા વાંધાઓ મંગાવવામાં આવશે. જ્યાં સુધી આ પ્રક્રિયા પૂરી ન થાય ત્યાં સુધી ૨૦૧૭થી ચાલી આવતી ૬૦ દિવસની વર્તમાન વ્યવસ્થા અમલમાં રહેશે.

અમેરિકાની આ કડક ઇમિગ્રેશન નીતિઓ ભારતીય ટેચીઝ અને તેમના પરિવારના ભવિષ્ય સામે મોટો પ્રશ્નાર્થ ઊભો કરી રહી છે. આગામી સમયમાં આ નિયમ અંતિમ સ્વરૂપ ધારણ કરે છે કે કેમ, તેના પર સૌની નજર રહેશે.