ટ્રમ્પ પ્રશાસનની કડક ઇમિગ્રેશન નીતિ: ગ્લોબલ ટ્રેનિંગ પ્રોગ્રામના કારણે વિશ્વભરમાં વિઝા ઇન્ટરવ્યૂ પર અચોક્કસ મુદતની રોક

અમેરિકન પ્રમુખ ડોનાલ્ડ ટ્રમ્પના બીજા કાર્યકાળમાં ઇમિગ્રેશન નીતિઓને અત્યંત કડક બનાવવામાં આવી રહી છે. આ જ શૃંખલામાં અમેરિકાની સરકારે વિશ્વભરમાં વિઝા માટે અરજી કરનારા લોકોની ઇન્ટરવ્યૂ એપોઇન્ટમેન્ટ્સ પર હાલ પૂરતી રોક લગાવી દીધી છે, જેના કારણે અમેરિકા જવાનું સપનું સેવતા અરજદારોમાં ચિંતાનું મોજું ફરી વળ્યું છે.

ગ્લોબલ ટ્રેનિંગ પ્રોગ્રામ અને વિઝા સેવાઓમાં ફેરફાર

અમેરિકાના વિદેશ મંત્રાલયના જણાવ્યા અનુસાર, વિશ્વભરના તમામ અમેરિકન દૂતાવાસો અને કોન્સ્યુલેટ્સમાં એક વિશેષ ‘ગ્લોબલ ટ્રેનિંગ પ્રોગ્રામ’ શરૂ કરવામાં આવ્યો છે. આ તાલીમ કાર્યક્રમના કારણે વિઝા સેવાઓનું સમયપત્રક ખોરવાયું છે અને અગાઉથી બુક થયેલી એપોઇન્ટમેન્ટની તારીખો બદલાઈ રહી છે. દૂતાવાસો દ્વારા જે અરજદારોના ઇન્ટરવ્યૂ નક્કી હતા તેમને મેઇલ કરીને તારીખ રદ થયાની અને નવી તારીખ પછીથી ફાળવવામાં આવશે તેવી જાણ કરવામાં આવી રહી છે.

ખાસ તાલીમ પાછળનો મુખ્ય હેતુ અને કડક તપાસ

વિદેશ મંત્રાલયે આ તાલીમનો સમયગાળો હજુ સુધી જાહેર કર્યો નથી, પરંતુ તેના મુખ્ય ઉદ્દેશ્યો સ્પષ્ટ કરી દીધા છે:

સરકારી સહાય પર નિર્ભરતા ચકાસવી: દૂતાવાસના અધિકારીઓને એવા અરજદારોની ઓળખ કરવાની ખાસ તાલીમ આપવામાં આવી રહી છે જેઓ ભવિષ્યમાં અમેરિકામાં સરકારી સહાય કે સબસિડી પર નિર્ભર થઈ શકે.

વધુ કડક તપાસ: વિશ્વભરના તમામ દૂતાવાસોમાં દરેક વિઝા અરજદારની એકસરખી અને અત્યંત કડક પદ્ધતિથી તપાસ થાય તે સુનિશ્ચિત કરવું.

આ પણ વાંચો: સોશિયલ મીડિયા બેન થતાં ઓસ્ટ્રેલિયન બાળકોએ શોધી કાઢ્યો નવો રસ્તો

ગેરકાયદેસર ઇમિગ્રન્ટ્સ પર કાર્યવાહી અને અન્ય કારણો

ડોનાલ્ડ ટ્રમ્પે દેશમાંથી ગેરકાયદેસર ઇમિગ્રન્ટ્સને બહાર કાઢવા માટે વ્યાપક અભિયાન હાથ ધર્યું છે, જેના ભાગરૂપે અનેકના વિઝા અને ગ્રીન કાર્ડ રદ કરવામાં આવી રહ્યા છે. આ અરજીઓ ફગાવવા પાછળ માત્ર કાગળોની ચકાસણી જ નહીં, પરંતુ અરજદારોના અંગત રાજકીય વિચારો અને અગાઉ ઈઝરાયલ-ગાઝા યુદ્ધ દરમિયાન પેલેસ્ટાઇનના સમર્થનમાં થયેલા પ્રદર્શનો જેવા કારણો પણ જવાબદાર ઠરી રહ્યા છે. જો કે, સરકારની આ કડક નીતિઓને હવે કોર્ટમાં પણ પડકારવામાં આવી રહી છે.

અમેરિકન સરકારના આ અચાનક અને કડક નિર્ણયોથી વિઝા અરજદારોની મુશ્કેલીઓમાં મોટો વધારો થયો છે. જ્યાં એક તરફ સરકાર આ પગલાંને આંતરિક સુરક્ષા અને આર્થિક વ્યવસ્થા માટે જરૂરી ગણાવી રહી છે, તો બીજી તરફ આનાથી વૈશ્વિક સ્તરે અરજદારોમાં અનિશ્ચિતતાનું વાતાવરણ ઉભું થયું છે.