BCCIએ તમિલનાડુના રણજી ક્રિકેટરને 1 લાખનો દંડ ફટકારી TNPL પરથી બેન કર્યો
કહેવાય છે કે પ્રેમમાં વ્યક્તિ સમય અને સ્થળનું ભાન ભૂલી જતી હોય છે, પરંતુ ક્રિકેટના મેદાન પર આ ભૂલ એક ખેલાડીને ખૂબ ભારે પડી ગઈ છે. મેચ દરમિયાન ગર્લફ્રેન્ડ સાથે ચેટિંગ કરવાના ચક્કરમાં તમિલનાડુના એક ઉભરતા રણજી ક્રિકેટરને ભારતીય ક્રિકેટ કંટ્રોલ બોર્ડ (BCCI) ની કડક કાર્યવાહીનો સામનો કરવો પડ્યો છે. બોર્ડની એન્ટી કરપ્શન એન્ડ સિક્યુરિટી યુનિટ (ACSU) એ પ્રોટોકોલ ભંગ બદલ ખેલાડી પર 1 લાખ રૂપિયાનો દંડ ફટકાર્યો છે અને તેને ચાલુ ટુર્નામેન્ટમાંથી પણ સસ્પેન્ડ કરી દેવામાં આવ્યો છે.
સમગ્ર મામલો શું હતો?
આ ઘટના તમિલનાડુ પ્રીમિયર લીગ (TNPL) ની એક મેચ દરમિયાન પ્લેયર્સ એન્ડ મેચ ઓફિશિયલ્સ એરિયા (PMOA) માં બની હતી. 26 વર્ષીય આ ડાબોડી બેટ્સમેને ગત રણજી ટ્રોફી સિઝનમાં તમિલનાડુ તરફથી રમતી વખતે શાનદાર પ્રદર્શન કરી બે અડધી સદી ફટકારી હતી. તપાસ ચાલુ હોવાના કારણે હાલ બોર્ડ કે એસોસિએશન દ્વારા આ ખેલાડીની ઓળખ જાહેર કરવામાં આવી નથી.
સૂત્રોના જણાવ્યા અનુસાર, મેચ દરમિયાન આ ખેલાડી ડ્રેસિંગ રૂમમાં બેસીને પોતાની ગર્લફ્રેન્ડને મેસેજ (ટેક્સટ) કરી રહ્યો હતો. જ્યારે એસસીયુ (ACSU) ની ટીમનું ધ્યાન આ તરફ ગયું, ત્યારે તેની પાસેથી અનડિક્લેર કરેલો મોબાઈલ ફોન મળી આવ્યો હતો.
મેચ ફિક્સિંગનો કોઈ આરોપ નહીં, માત્ર પ્રોટોકોલ ભંગ
અધિકારીઓએ સ્પષ્ટપણે જણાવ્યું છે કે આ મામલાનો મેચ ફિક્સિંગ, સટ્ટાબાજી કે ભ્રષ્ટાચાર સાથે કોઈ સંબંધ નથી. ખેલાડી સાથે કોઈ બુકી કે શંકાસ્પદ વ્યક્તિનો સંપર્ક કર્યાની કોઈ માહિતી મળી નથી. જોકે, નિયમોનું ઉલ્લંઘન કરીને પ્રતિબંધિત વિસ્તારમાં મોબાઈલ વાપરવો એ ગંભીર સુરક્ષા ચૂક ગણવામાં આવે છે, જેના કારણે તેને આ સજા મળી છે.
શું છે BCCI નો PMOA નિયમ?
પ્રતિબંધિત વિસ્તાર: PMOA (Players and Match Officials Area) એ મેદાનનો અત્યંત સંવેદનશીલ અને પ્રતિબંધિત વિસ્તાર (જેમ કે ડ્રેસિંગ રૂમ અને ડગઆઉટ) છે.
નિયમોનું પાલન: આ વિસ્તારમાં પ્રવેશતા પહેલા તમામ ખેલાડીઓ અને સપોર્ટ સ્ટાફે પોતાના મોબાઈલ ફોન, સ્માર્ટવોચ કે અન્ય ઇલેક્ટ્રોનિક ઉપકરણો સ્વિચ ઓફ કરીને સુરક્ષા અધિકારીઓ પાસે જમા કરાવવાના હોય છે.
મુખ્ય ઉદ્દેશ્ય: મેચ દરમિયાન બહારની દુનિયા સાથે કોઈ પણ પ્રકારના શંકાસ્પદ સંપર્ક કે ડેટા લીકને અટકાવવાનો આ નિયમનો મુખ્ય હેતુ છે.
કડક પગલાં અને અગાઉના કિસ્સાઓ
ઘટના સામે આવ્યા બાદ તમિલનાડુ ક્રિકેટ એસોસિએશન (TNCA) એ તાત્કાલિક ધોરણે કાર્યવાહી કરીને ખેલાડીને તેની ફ્રેન્ચાઇઝી સ્ક્વોડમાંથી હટાવી દીધો છે અને આગામી તમામ મેચોમાંથી સસ્પેન્ડ કરી દીધો છે.
ઉલ્લેખનીય છે કે, ઇલેક્ટ્રોનિક ડિવાઈસ અને સુરક્ષા મામલે BCCI હવે ખૂબ જ સખત વલણ અપનાવી રહી છે. આ પહેલાં IPL 2026 દરમિયાન પણ આવો જ એક કિસ્સામાં રાજસ્થાન રોયલ્સના ટીમ મેનેજર રોમી ભિંડર ડગઆઉટમાં મોબાઈલ વાપરતા ઝડપાતા તેમના પર પણ 1 લાખ રૂપિયાનો દંડ ફટકારવામાં આવ્યો હતો. પરંતુ તમિલનાડુના આ ખેલાડીના કેસમાં દંડની સાથે ટૂર્નામેન્ટમાંથી પ્રતિબંધ મૂકીને બોર્ડે સ્પષ્ટ સંદેશ આપી દીધો છે કે શિસ્તના ભંગ બાબતે કોઈપણ પ્રકારની ખેલદિલી ચલાવી લેવામાં આવશે નહીં.
