રાજકોટ સિવિલમાં કેલ્ફર દવા તથા ફિલ્ટર સેટ ઉપલબ્ધ કરાવાની માંગ સાથે પ્લેકાર્ડસ લઇને દેખાવો કરતાં પોલીસે અટકાયતમાં લીધા
સૌરાષ્ટ્રના મુખ્ય સેન્ટર સમી રાજકોટની સિવિલ હોસ્પિટલમાં થેલેસેમિયાના મેજર બાળકો માટે પુરતી દવા ઉપલબ્ધ ન હોવાનું, બ્લડ પણ ન મળતું હોવા સાથે આવા દર્દીઓના દર્દને વાચા આપવા સેવાભાવી વ્યક્તિઓ દ્વારા તંત્રવાહકોને ઢંઢોળવા માટે પ્લેકાર્ડસ સાથે સિવિલ હોસ્પિટલ ચોકમાં દેખાવો કરાતા પોલીસે ટીંગાટોળી કરીને દૂર ખદેડ્યા હતા.
રજૂઆતકર્તાઓનો અવાજ હતો કે સિવિલ હોસ્પિટલમાં થેલેસેમિયા મેજર બાળકોને લોહીની સાથે આવતા વધારાના તત્વોને ઘટાડવા માટે કેલ્ફર નામની દવા આપવામાં આવે છે પરંતુ આ દવા લાંબા સમયથી સિવિલ હોસ્પિટલમાં ઉપલબ્ધ નથી તેમજ બાળકોને ડેસ્ફરાલ ઈન્જેક્શનની જરૂર પડતી હોય છે જે પણ સિવિલમાં ઉપલબ્ધ નથી. આવા બાળકોને દર ૧૫ દિવસે બ્લડ ચડાવવું પડતું હોય છે. જો સામાન્ય (આરસીસી) બ્લહ ચડાવાય તો રિએક્શન આવે અને બાળકની સ્થિતિ બગડે છે. દાતા દ્વારા સિવિલ હોસ્પિટલે બ્લડ ફિલ્ટર કરવાનું એલ.આર. મશીન આપેલું છે. જો કે આ મશીન પણ જેમ ને તેમ જેવું ઉપયોગ થતો નથી. એલ.આર. રક્ત એકત્રિત કરવાની બેગ પણ સિવિલ હોસ્પિટલમાં નથી.
આ પણ વાંચો: સુરેન્દ્રનગર, જૂનાગઢ, મોરબી, અમરેલીના 20 રસ્તાનો વાહન વ્યવહાર હજુ શરૂ નથી થયો
લોહીનો પુરતો પુરવઠો પણ હોતો નથી અને બહારથી દાતાઓ શોધવા પડે છે. કુદરતી પ્રકોપ જેવી આ બિમારીથી બાળકો એક તો શારીરિક રીતે ભારે હેરાન હોય છે અને બીજી તરફ જરૂરી દવા, બ્લડ કે સવલત પણ પ્રાપ્ત થતી ન હોવાની બાળકોની સાથે તેમના પરિવારજનોની હાલત પણ કફોડીબની જાય છે. બાળકોની વ્હારે આવી તંત્રને ઢંઢોળવા આવેદન સાથે સિવિલ હોસ્પિટલ ચોકમાં પ્લેકાર્ડસ બતાવીને દેખાવો કરાયા, એક દેખવકાર દ્વારા ચાર્લિચેપ્લીનનું પાત્ર ભજવાયું. રસ્તા પર બેસી ગયા. પોલીસનો કાફલો દોડી આવ્યો હતો અને વિરોધકર્તાઓને ટીંગાટોળી કરીને અટકાયતમાં લઈ રોડથી દૂર ખસેડ્યા હતા.
