ગુજરાતમાં આગામી 7 દિવસ વરસાદ બોલાવશે ધબધબાટી:, માછીમારોને દરિયો ન ખેડવાની સૂચના: IMDની ચેતવણી
ચોમાસું હવે પૂરા જોશમાં! ગુજરાતમાં એકસાથે 4 હવામાન પ્રણાલીઓ સક્રિય થતાં આગામી એક સપ્તાહ સુધી રાજ્યભરમાં ભારે વરસાદનો ખતરો છે. હવામાન વિભાગે દક્ષિણ ગુજરાત માટે રેડ એલર્ટ અને દરિયાકાંઠે 3 નંબરનું સિગ્નલ લગાવ્યું છે. હાલ રાજ્યમાં સરેરાશથી 29% ઓછો વરસાદ નોંધાયો છે, ત્યારે આ સિસ્ટમો વરસાદની ઘટ પૂરી કરશે તેવી આશા છે.
આગામી 7 દિવસ વરસાદી, 4 સિસ્ટમ એકસાથે સક્રિય
હવામાન વિભાગની આગાહી મુજબ આગામી 7 દિવસ સુધી ગુજરાતમાં વરસાદી માહોલ યથાવત રહેશે.
હાલ સાયક્લોનિક સર્ક્યુલેશન, મોન્સૂન ટ્રફ, વેસ્ટર્ન ડિસ્ટર્બન્સ અને ટ્રફ એમ 4 સિસ્ટમ એકસાથે સક્રિય છે. જેના કારણે રાજ્યના અનેક વિસ્તારોમાં ભારે થી અતિભારે વરસાદની શક્યતા વ્યક્ત કરવામાં આવી છે.
જિલ્લાવાર એલર્ટ: ક્યાં કેવો વરસાદ?
– રેડ એલર્ટ: સુરત, નવસારી, વલસાડ અને દાદરા નગર હવેલીમાં ભારેથી અતિભારે વરસાદની શક્યતા. નીચાણવાળા વિસ્તારોમાં પાણી ભરાવાની ચેતવણી.
– ઓરેન્જ એલર્ટ: ભરૂચ, નર્મદા, તાપી, છોટાઉદેપુર, પંચમહાલ, દાહોદ, મહીસાગર અને અરવલ્લીમાં ભારે વરસાદ સાથે ગાજવીજ અને તેજ પવન.
– યલો એલર્ટ: ગીર સોમનાથ, અમરેલી, ભાવનગર, બોટાદ, અમદાવાદ, આણંદ, વડોદરા, ખેડા, ગાંધીનગર અને સાબરકાંઠામાં હળવાથી મધ્યમ અને કેટલાક સ્થળે ભારે વરસાદ.
થન્ડર સ્ટોર્મ અને દરિયાઈ ચેતવણી
આગામી 5 દિવસ દરમિયાન થન્ડર સ્ટોર્મની આગાહી છે. IMDએ લોકોને ખુલ્લા મેદાન, વૃક્ષો નીચે અને વીજ થાંભલાઓની નજીક ન રહેવાની સલાહ આપી છે. વાહનચાલકોએ પણ સાવચેતી રાખવી.
દરિયાકાંઠા માટે ખાસ સૂચના: દરિયામાં હવામાન ખરાબ રહેવાથી વિવિધ બંદરો પર 3 નંબરનું સિગ્નલ લગાવવામાં આવ્યું છે. માછીમારોને આગામી સૂચના સુધી દરિયો ન ખેડવા અને દરિયામાં રહેલા માછીમારોને સલામત સ્થળે પરત ફરવા જણાવાયું છે.
અત્યાર સુધી કેટલો વરસાદ?
રાજ્યમાં અત્યાર સુધી કુલ 201.9 મીમી વરસાદ નોંધાયો છે. જ્યારે આ સમયગાળાનો સરેરાશ 285.8 મીમી હોવો જોઈએ. એટલે કે હજુ 29% વરસાદની ઘટ છે. આગામી 7 દિવસના વરસાદથી આ ઘટમાં ઘટાડો થવાની શક્યતા છે.
હવામાન વિભાગની અપીલ: લોકોએ સત્તાવાર આગાહી પર નજર રાખવી અને જરૂર વગર ઘરની બહાર ન નીકળવું.
