અમદાવાદમાં દીપડાની અફવાઓથી સાવધાન રહેવા વન વિભાગની અપીલ

Wed, July 22 2026

અમદાવાદ શહેરમાં દીપડાના સમાચાર સાથે સોશિયલ મીડિયા પર અફવાઓનું વાવાઝોડું! તા. 20/7/2026ના રોજ ઘુમાની શરણ દીપ સોસાયટીમાં CCTVમાં દીપડો કેદ થતાં વન વિભાગ એક્શનમાં આવ્યું છે. પરંતુ તેની સાથે જ ચાંદખેડાના નકલી રેસ્ક્યુ વીડિયો પણ વાયરલ થયા. જેને લઈને અમદાવાદ સામાજિક વનીકરણ વિભાગે લોકોને અપીલ કરી છે કે ગભરાવાને બદલે સતર્ક રહો અને માત્ર સત્તાવાર માહિતી પર જ ભરોસો કરો.

ઘુમામાં દીપડો CCTVમાં કેદ, વન વિભાગ સજ્જ

તા. 20 જુલાઈ 2026ના રોજ વહેલી સવારે ઘુમાની શરણ દીપ સોસાયટીમાં દીપડો CCTV કેમેરામાં કેદ થયો હતો. તરત જ વન વિભાગની ટીમ ઘટનાસ્થળે દોડી ગઈ હતી.

હાલની સ્થિતિ મુજબ:

આસપાસના વિસ્તારમાં સઘન રેકી હાથ ધરવામાં આવી છે

– દીપડાને પકડવા માટે પાંજરા ગોઠવવામાં આવ્યા છે

– વેટનરી ડૉક્ટર અને રેસ્ક્યુઅરની ટીમ સાથે 20થી વધુ ગાર્ડ/ફોરેસ્ટર તમામ સાધન-સામગ્રી સાથે ત્યાં તૈનાત છે

– DCF અમદાવાદ એટલે કે નાયબ વન સંરક્ષક પોતે પરિસ્થિતિ પર નજર રાખી રહ્યા છે

આ પણ વાંચો: ‘નશા મુક્ત ગુજરાત’ માટે ગુજરાત સરકારનું મોટું પગલું

વન વિભાગની મહત્વની અપીલ: અફવાઓ ન ફેલાવો

DCF અમદાવાદે લોકોને ખાસ વિનંતી કરી છે:

1. અફવાઓ ન ફેલાવો: દીપડો મુખ્યત્વે સાંજ અને રાતના સમયે જ બહાર નીકળે છે. માનવ તેનો કુદરતી ખોરાક નથી.

2. ગભરાવાની જરૂર નથી: પરંતુ સાવચેતી અને સતર્કતા રાખવી જરૂરી છે. ખાસ કરીને બાળકો અને પાલતુ પ્રાણીઓનું ધ્યાન રાખો.

3. માત્ર સત્તાવાર માહિતી જ માનો: સોશિયલ મીડિયા પર ફરતા વીડિયો-ફોટા ચકાસ્યા વિના શેર ન કરો.

ચાંદખેડાનો વાયરલ વીડિયો નકલી નીકળ્યો

વધુમાં વન વિભાગે સ્પષ્ટતા કરી છે કે ગઈકાલે રાત્રે “અમદાવાદના ચાંદખેડામાંથી દીપડો રેસ્ક્યુ થયો” તેવો જે વીડિયો વાયરલ થયો હતો તે સંપૂર્ણ અફવા છે. તે અન્ય કોઈ રાજ્યનો ખૂબ જૂનો વીડિયો છે જેને અમદાવાદના નામે ફરતો કરવામાં આવ્યો છે.

આવા ખોટા વીડિયોથી લોકોમાં બિનજરૂરી ભય ફેલાય છે. તેથી સામાજિક વનીકરણ વિભાગ, અમદાવાદે ફરી અપીલ કરી છે કે આ પ્રકારની અફવાઓથી બચો અને તેને આગળ ન ફેલાવો.