અમદાવાદ: મેકડોનાલ્ડમાં મોટી ભૂલ, વેજ બર્ગરને બદલે નોનવેજ મળતા નરોડા શાખા સીલ

અમદાવાદ: ઓર્ડર કર્યું વેજ, પણ થાળીમાં આવ્યું નોનવેજ! અમદાવાદમાં ફરી એક વખત ફાસ્ટ ફૂડ ચેઈનની બેદરકારી સામે આવી છે. નરોડાના મેકડોનાલ્ડમાં ગ્રાહકે વેજ બર્ગર મંગાવ્યું હતું, પરંતુ ડિલિવરીમાં સ્પાઈસી ચિકન બર્ગર આવતા વિવાદ સર્જાયો. મામલો બિચ્યો તો આરોગ્ય તંત્રએ ગંદકી અને ન્યુસન્સના કારણે આખી દુકાન જ સીલ કરી દીધી.

નરોડા મેકડોનાલ્ડમાં વેજને બદલે નોનવેજ, દુકાન સીલ 

અમદાવાદના નરોડા હંસપુરા વિસ્તારમાં આવેલા મેકડોનાલ્ડમાંથી એક ગ્રાહકે ઓનલાઈન વેજ બર્ગરનો ઓર્ડર કર્યો હતો. પરંતુ ડિલિવરીમાં તેને સ્પાઈસી ચિકન બર્ગર મળ્યું. ગ્રાહકે તાત્કાલિક ફરિયાદ કરતા મામલો ઉગ્ર બન્યો.

ફરિયાદ બાદ આરોગ્ય તંત્ર દ્વારા તપાસ કરતા દુકાનના પરિસરમાં ગંદકી અને જાહેર રોડ પર ન્યુસન્સ જોવા મળ્યું. જેના પગલે તંત્રએ તાત્કાલિક અસરથી મેકડોનાલ્ડની આ શાખાને સીલ કરી દીધી છે. CCTV ફૂટેજ પણ તપાસ માટે કબજે કરવામાં આવ્યા છે.

આ પણ વાંચો: નવસારીમાં 64 રસ્તા બંધ, કાવેરી નદીની સપાટી વધતા 15 ગામોને એલર્ટ

4 દિવસમાં ગુજરાતમાં 3 સમાન ઘટના 

આ એકલી ઘટના નથી. છેલ્લા 4 દિવસમાં ગુજરાતમાં ફૂડ ઓર્ડરને લઈને આ પ્રકારની 3 ઘટના સામે આવી છે.

– વડોદરા: 4-5 દિવસ પહેલા નટુભાઈ સર્કલ સ્થિત બાર્બેક્યુ નેશનમાં ગ્રાહકે વેજ બિરયાની મંગાવી હતી. પરંતુ તેને નોનવેજ બિરયાની મળતા ગ્રાહકે રેસ્ટોરન્ટમાં હોબાળો મચાવ્યો હતો.

– અમદાવાદ બોપલ: બોપલના મેકડોનાલ્ડમાં ગ્રાહકે ઓનલાઈન વેજ બર્ગર ઓર્ડર કર્યું હતું. ફરિયાદ કરવા જતા સ્ટાફ દ્વારા ઉદ્ધતાઈભર્યું વર્તન કરવામાં આવ્યું હોવાનો આક્ષેપ છે. સંચાલકોએ ભૂલ સ્વીકારવાની પણ ના પાડી હતી. ગ્રાહકે કીચનમાં વેજ અને નોનવેજ વસ્તુઓ સાથે રાખવામાં આવતી હોવાનો પણ આક્ષેપ કર્યો હતો.

ગ્રાહકોમાં ભારે રોષ, ફૂડ સેફટી પર સવાલ 

સત થઈ રહેલી આ ઘટનાઓથી શાકાહારી ગ્રાહકોમાં ભારે રોષ જોવા મળી રહ્યો છે. લોકોનો આક્ષેપ છે કે ફાસ્ટ ફૂડ ચેઈનોમાં વેજ અને નોનવેજ માટે અલગ કીચન અને અલગ સ્ટાફની વ્યવસ્થા નથી.

આરોગ્ય વિભાગે તમામ ફૂડ જોઈન્ટ્સને સખત સૂચના આપી છે કે વેજ-નોનવેજની ચીજવસ્તુઓ અલગ રાખવામાં આવે અને ઓર્ડર ડિલિવરીમાં કોઈ ભૂલ ન થાય. નિયમોનો ભંગ કરનારાઓ સામે કડક કાર્યવાહી કરવાની ચેતવણી પણ આપી છે.