5000ની ઉઘરાણી માટે વ્યાજખોરે મહિલાને જીવતી સળગાવી: મહિલાનું સારવાર દરમિયાન મોત

ગુજરાતમાં વ્યાજખોરોનો આતંક ફરી એક વખત સામે આવ્યો છે. પાટણના ખાલકપુરા વિસ્તારમાં માત્ર ₹5,000ની ઉઘરાણી માટે એક નિર્દયી વ્યાજખોરે 35 વર્ષીય મહિલા પર જ્વલનશીલ પ્રવાહી છાંટીને જીવતી સળગાવી દીધી. ગંભીર રીતે દાઝી ગયેલી મહિલાનું ધારપુર સિવિલ હોસ્પિટલમાં સારવાર દરમિયાન મોત થયું. પોલીસે આરોપી સામે હત્યાનો ગુનો નોંધી તપાસ શરૂ કરી છે.

શું બન્યું? ઘટનાની વિગત 

પાટણના ખાલકપુરામાં રહેતા 35 વર્ષીય પિન્કીબેન પટણીએ ઘરખર્ચ માટે સ્થાનિક વ્યાજખોર બાબુભાઈ રાવળ પાસેથી ₹5,000 વ્યાજે લીધા હતા. પૈસા પરત આપવા માટે પિન્કીબેને થોડા દિવસની મુદત માંગી હતી.

આ સામાન્ય વાતથી ઉશ્કેરાયેલા બાબુભાઈએ પિન્કીબેન પર જ્વલનશીલ પ્રવાહી રેડી દીધું અને દીવાસળી ચાંપી દીધી. આગમાં પિન્કીબેન 90% થી વધુ દાઝી ગયા હતા.

ડાઇંગ ડિક્લેરેશન અને આરોપીની હાલત 

અત્યંત ગંભીર હાલતમાં પિન્કીબેનને તાત્કાલિક ધારપુર સિવિલ હોસ્પિટલ ખસેડવામાં આવ્યા. મોતની નજીક હોવા છતાં તેમણે હિંમત રાખીને પોલીસ સમક્ષ આખી આપવીતી જણાવી. પોલીસે તેમનું ‘ડાઇંગ ડિક્લેરેશન’ નોંધી લીધું છે, જે આ કેસમાં સૌથી મહત્વનો પુરાવો બનશે.

આ પણ વાંચો: વૈશ્વિક તણાવ વચ્ચે સોનાના ભાવમાં ઘટાડો, જાણો 22 કેરેટનો આજનો રેટ

સારવાર દરમિયાન પિન્કીબેનનું મોત નીપજ્યું. નોંધનીય છે કે આરોપી બાબુભાઈ રાવળ પણ આ હુમલા દરમિયાન આશરે 40% દાઝી ગયો હતો. હાલ તે પણ હોસ્પિટલમાં પોલીસ જાપતા હેઠળ સારવાર લઈ રહ્યો છે.

પોલીસ કાર્યવાહી 

પોલીસે શરૂઆતમાં બાબુભાઈ સામે હત્યાના પ્રયાસની કલમ હેઠળ ગુનો નોંધ્યો હતો. પિન્કીબેનના મોત બાદ હવે કેસમાં હત્યાની કલમ ઉમેરવામાં આવી છે અને આગળની કાયદેસરની કાર્યવાહી હાથ ધરવામાં આવી છે.

સમાજ માટે ચિંતાનો વિષય: 

માત્ર ₹5,000 જેવી નજીવી રકમ માટે કોઈનો જીવ લઈ લેવો એ વ્યાજખોરોના વધતા જતા આતંકને દર્શાવે છે. પોલીસે લોકોને અપીલ કરી છે કે જો કોઈ વ્યાજખોરો તમને ત્રાસ આપે તો તરત 100 નંબર પર કે નજીકના પોલીસ સ્ટેશનમાં ફરિયાદ નોંધાવો.