જેમ ઘણા લોકો અઠવાડિયે એક દિવસ મોબાઇલના ઉપવાસ કરે છે તેમ હોર્નનો ઉપવાસ કરવો જરૂરી
સિગ્નલ ઉપર ઉભેલા વાહનચાલકો એટલાં હોર્ન વગાડે છે કે જાણે ગ્રીન લાઇટ થઇ જવાની હોય
આપણા દેશમાં નોઈઝ પોલ્યુશન નું પ્રમાણ ઉચ્ચ સ્તરે જોવા મળી રહ્યું છે. નોઈઝ પોલ્યુશન ( ધ્વની પ્રદૂષણ ) પર કોઈ પ્રકારનો કંટ્રોલ નથી. અમુક જગ્યાએ જેમ કે હોસ્પિટલ,કોર્ટ અને સ્કૂલ પાસે હોર્ન વગાડવાની સખત મનાઈ હોવા છતાં આ કાયદાનો અમલ થતો જોવા મળતો નથી.ઉપરાંત જાહેર માર્ગો પર તો હોર્ન વગાડવાની જાણે હોડ મચી હોય તેવા દ્રશ્યો જોવા મળતા હોય છે અને ખાસ કરીને ટ્રાફિક સિગ્નલો પરતો જાણે હોર્ન વગાડવાની કેમ જાણે હરીફાઈ ચાલી રહી હોય તેવું વાતાવરણ જોવા મળે છે.
આને લગતા ઘણા બધા કાયદાઓ પણ છે. જેનું મોનિટરિગ સેન્ટ્રલ મોટર વ્હીકલ્સ રૂલ્સ એટલે કે સી.એમ.વી.આર કરે છે. મુખ્યત્વે ૧૦૦ ડિબી થી વધુ હોર્ન વગાડવાની મનાઈ છે. એક જ પ્રકારના ટોનવાળા હોર્ન ની જ મંજૂરી હોય છે.મલ્ટી ટોન અને મ્યુઝિકલ હોર્ન વગાડવાની મનાઈ હોય છે. હોન નો ઉપયોગ ફક્ત વોર્નિગ માટે જ કરવાનો હોય છે. આ કાયદાના ભંગ બદલ ૧૦,૦૦૦ સુધીનો દંડ કરવાની પણ જોગવાઈ છે. તેમ છતાં આ જોગવાઈ હેઠળ કેટલા લોકો દંડને પાત્ર થયા છે,તે જાણવું પણ ખૂબ જ જરૂરી છે.જુદી-જુદી જાતના હોર્ન લગાડવા ની પણ એક ફેશન થઈ ગઈ છે. વિદેશોમાં આપણે જ્યારે જઈએ છીએ ત્યારે હોર્ન નો ઉપયોગ ખૂબ જ નહીંવત – ઓછો કે – થતો જ નથી,તેમ કહીએ તો ચાલે.તે પ્રકારનું વાતાવરણ રસ્તા ઉપર જોવા મળે છે. પરંતુ આપણા દેશમાં આ પ્રદૂષણ એટલું બધું ફેલાયું છે કે જેને કંટ્રોલ કરવો અશક્ય બરાબર જ છે.ટ્રાફિક સમસ્યા પણ દિવસે દિવસે વધી રહી છે. આડેધડ પાર્કિગ,પાર્કિગ પ્લેસમાં દબાણ અને રસ્તા ઉપર થતા લારી-ગલ્લાવાળા ના દબાણને કારણે વાહન ચલાવવા માટે ખૂબ જ ઓછી જગ્યા રહેતા, પરિસ્થિતિ એવી થાય છે કે વાહન ચાલકો પણ મુશ્કેલીમાં મુકાઈ છે.આવા સમયે ટ્રાફિક જામની સ્થિતિમાં તો હોર્ન નું પ્રમાણ અતિશય જોવા મળે છે.વધતા જતા વાહનો, ટ્રાફિક સેન્સ ની અછત, રસ્તાઓ પરના દબાણોના કારણે નોઈઝ પોલ્યુશન વધી રહ્યું છે. આના પર કંટ્રોલ કરવો ખૂબ જ જરૂરી છે.જે લોકો વિદેશથી અહીંયા આવે છે તે લોકો આ બધું જોઈને આપણી ખરાબ છાપ લઈને જઈ રહ્યા છે. આ સમસ્યાનો ઉકેલ ફક્ત દરેક વ્યક્તિ મનોમન નક્કી કરે કે બીન જરૂરી હોર્ન ન મારવા. તો એવું બને કે ૫૦% હોર્ન નો ઉપયોગ ઘટી જાય અને કોઈ વ્યક્તિ એવું નક્કી કરે કે શક્ય હોય તેટલા હોર્ન માર્યા વગર જ આજે વાહન ચલાવવું છે. ભલે શરૂઆતમાં તકલીફ પડે, પરંતુ ધીમે-ધીમે પરિસ્થિતિ સુધરી શકે.ફક્ત નક્કી એ કરવાનું છે કે જ્યાં અત્યંત જરૂરી છે ત્યાં જ હું હોર્ન નો ઉપયોગ કરીશ.તો પરિસ્થિતિમાં ઘણો ફેરફાર જોવા મળે. અત્યારે તો ૨૪ કલાક રસ્તાઓ પર આપણને અનેક પ્રકારના હોર્ન વાગતા સાંભળવા મળે છે અને ખાસ કરીને ખૂબ જ આપણી નજીક કોઈ વાહન લાવીને હોર્ન વગાડે ત્યારે આપણને ગુસ્સો પણ આવતો હોય છે.રહેણાંક વિસ્તારમાં પણ જ્યારે આવા વાહન ચાલકો કે જેઓ રસ્તા પર રહેતા લોકો, વડીલો અને દર્દીઓની પરવા કર્યા વગર વિના કારણે જ્યારે હોર્ન વગાડે છે.ત્યારે પરિસ્થિતિ વધારે ખરાબ થાય છે.આ પ્રદૂષણ પર તાત્કાલિક અંકુશ કરવાની જરૂર છે.
અનેક દેશોમાં આપણા જેટલા હોર્ન તો ઠીક પણ બહુ જ જરૂરી હોય ત્યારે હોર્ન મારતા લોકો જોવા મળે છે અને નોઈઝ પોલ્યુશન આપણને ઝીરો જોવા મળે છે. તો જેમ આપણે એક-બે દિવસ કંઈ પણ ખાધા-પીધા વગર ઉપવાસ કરીએ છીએ અથવા તો પ્રવાહી પીને ઉપવાસ કરીએ છીએ અને આપણા શરીરને ફાયદો થતો હોય છે. તેમજ મોબાઇલ ઉપવાસ ની પણ શરૂઆત થઈ છે કે જેનાથી આપણો સ્ક્રીન ટાઈમ ઘટે,આંખોને ફાયદો થાય અને મગજમાં જેવા તેવા વિચારો અને ઘટનાઓ ન ઘૂસે. એવી જ રીતે જો હોર્ન ન મારવાના ઉપવાસ શરૂ કરવામાં આવે તો ૧૦૦% વાયુ પ્રદુષણ ઘટે.જેથી આપણા દેશની છાપ બીજા દેશોમાંથી આવતા લોકો સારી લઈને જાય અને દેશના લોકોને પણ વાયુ પ્રદુષણથી રાહત થાય.
