સાલુ આપણા બધા વખતે જ 60ના ને નો-રિપીટ થિયરીના નિયમો યાદ આવે? ગાંઠિયાદાદાઓ કે આવી ગેંગોની પ્રોપર મેડિસિન ગુજસીટોક, વાંચો કાનાફૂસી
ગુજરાતમાં સ્વરાજ્યની ચૂંટણી ગમે ત્યારે જાહેર થશે, હવે કદાચ કલાકો બાકી રહ્યા હોય તેવું કહી શકાય. ચૂંટણીના દિવસો ગાજતા જ એક વ્યક્તિ એક હોદ્દો અથવા તો જેઓ લડવા ઈચ્છુકો હોય તેમને ભાજપ સંગઠનમાં સ્થાનિક કક્ષાએ કોઈને કોઈ નાના હોદ્દા કે જવાબદારી સોંપી દેવાઈ જેથી આવા લડવા ઈચ્છુક મુરતિયાઓના તો જાણે મોતિયા મરી ગયા અથવા તો આશાઓ પર પાણી ઢોળ થઈ ગયું. જ્યારે જેઓ હોદ્દાઓમાંથી બાકાત રહી ગયા તેઓને હાશકારો થયો કે આપણને નથી શમાવાયા એટલે ચૂંટણીમાં ટિકિટ માંગી શકશું અને કદાચ ચાન્સ લાગી પણ જશે. મનમાં લડ્ડુ ફૂટેલા રહેતા ત્યારે હવે એક નવી વાત ગાજી છે કે બે કે ત્રણ વખત લડેલાઓને ટિકિટ નહીં, 60થી ઉપરનાને ટિકિટ નહીં, યુવાઓને પહેલી તક. આ નવી હવાથી જેઓ લડવા ઈચ્છુક છે તેઓની હવા નીકળવા લાગી કે મનમાં એક ડર પેશી ગયો છે કે તો શું હવે આપણો ચાન્સ નહીં લાગે, નો રિપીટ થિયરી આવે અથવા બે-ત્રણ વખત લડેલાઓ કે 60 ઉપરનાને ટિકિટ નહીંનું ગતકડું અમલી બનશે તો આપણે તો કપાયા સમજો. રાજકોટમાં કેટલાક લડવા થનગનતા કે ઘોડા પલાળવા માટે તૈયાર આવા હરખપદૂડા મુરતિયાઓના પણ મોતિયા મરવા લાગ્યા છે કે સાલુ તો તો આપણું પણ પત્તું કપાશે હો. એવો પણ ગણગણાટ કે આંતરિક ઉકળાટ, મનોમન રોષ હશે કે સાલુ એ 60ની પાર થઈ જાય તોય બે-બે, ત્રણ-ત્રણ નહીં ચાર-ચાર વાર ચૂંટણી લડે અને ધાર્યા પદ, ખૂરશીઓ પર બેસી જાય કે ચિપક્યા રહે અને આપણને 60ની ઉંમરનો બાધ… પોતે કરે તો લીલા અને આપણો નંબર આવે ત્યારે જ નિયમ (પાપ લાગવા લાગે) લાગુ પડે ? સાલુ આપણે તો પાર્ટીની પોલિસી હશે તો બીજું કરી પણ શું શકશું ? શનિવારે આપણા એક મંત્રીએ રાજકોટમાં કહ્યું હતું કે, આપણે કાઈકને બેસવાડવા (જીતાડવાય) પણ પડે તો આપણે નાછૂટકે કોઈકને બેસાડવા, ચૂંટાવવા કામે લાગવું પડશે. પાર્ટી લાઈનમાં તો રહેવું જ પડશે ને ?
હવે ગમે ત્યારે પીએસઆઇની બદલીનું લિસ્ટ, રાજકોટમાં પીઆઇનો સ્વર આપણે રહી ગયા
રાજ્યમાં પોલીસ ડિપાર્ટમેન્ટમાં સૌથી મોટી બદલીઓ એક સાથે 772 પીઆઈની ત્રણ દિવસ પૂર્વે થઈ. ચૂંટણીની તારીખ પણ હવે માથે ગાજી રહી છે, ગમે ત્યારે ડિક્લેર થશે. હવે એ પૂર્વે ગૃહવિભાગ દ્વારા રાજ્યભરમાં ફરજ બજાવતા સંખ્યાબંધ પીએસઆઈનું પણ લાંબું લિસ્ટ ગમે ત્યારે જાહેર થઈ શકે તેમ છે. પોલીસ બેડામાં જ ગણગણાટ મુજબ આ બદલીઓમાં જેઓના ત્રણ વર્ષ અને જેઓએ માંગી છે તો કોઈ કોઈની ભલામણો હશે કે માગણીઓ હશે તેવા અધિકારીઓનો પણ બદલીના લિસ્ટમાં સમાવેશ કદાચ થઈ શકે. વડાપ્રધાનનો ગુજરાત પ્રવાસ બે દિવસ બાદ જ છે, જેવો આ કાર્યક્રમ પૂર્ણ થશે કે તુરંત જ ચૂંટણીની તારીખ જાહેર થશે. કદાચ રાજકીય પક્ષોને નિયમ મુજબના દિવસોનો જ ગેપ મળી શકશે. એપ્રિલ એન્ડ કે મેના આરંભે ચૂંટણી હશે. આવી વાતો વચ્ચે ફટાફટ બદલીઓનો લીથો નીકળી જાય તે માટે ગાંધીનગરમાં તૈયારીઓ પૂર્ણ થઈ ગઈ હોવાનું અને ગમે ત્યારે પીએસઆઈની સાગમટે બદલીઓનું લાંબુ લિસ્ટ આવી શકે તેવી શક્યતા કે ચર્ચા છે. જેઓ આશ બાંધીને બેઠા છે એવા અનેક પીએસઆઈ પણ બદલીના લીથાની રાહમાં હશે જ. તાજેતરમાં પીઆઈની આવેલી બદલીઓમાં રાજકોટ શહેરના એક સાથે 19 પીઆઈ બદલાયા. લિસ્ટ આવ્યા પૂર્વે હાલમાં બદલીઓમાંથી બાકાત રહી ગયેલા રાજકોટ સિટીના અનેક એવા પીઆઈ હતા કે તેઓ પણ ત્રણ વર્ષનો પિરિયડ પૂર્ણ થઈ ગયો હોય પોતાની બદલી પણ નિશ્ચિત જ હશે તેવું માનીને રાહમાં હતા. આવા રહી ગયેલા પીઆઈનો સ્વર હશે કે આપણે બદલીમાંથી રહી ગયા, જેઓને જ્યાની ઈચ્છા ન્હોતી અથવા તો કોઈક આવા ઉચ્ચસ્તરીય છેડા લાગ્યા હશે ને બદલીઓમાંથી બચી ગયા તેઓ તો મનોમન રાજીના રેડ હશે કે આપણે સચવાઈ ગયા. જ્યારે જેઓને જવું હતું ને કોઈ કારણે રહી ગયા તેઓને એવું ખૂંચ્યું હશે કે સાલુ બદલીમાં આપણું નામ જ બાકાત રહી ગયું !
ગાંઠિયાદાદાઓ કે આવી ગેંગોની પ્રોપર મેડિસિન ગુજસીટોક
રાજકોટ શહેરમાં ગુનેગારોની કમ્મરતોડ એટલે કે શિસ્તમાં રહેવાની સર્વિસ કરતી (શીખ આપતી) ક્રાઈમ બ્રાન્ચમાં જવાનું નામ પડે તો ગુનેગારોના પગ ધ્રુજે છે અથવા તો કોઈને કોઈ છેડા શોધે છે. રાજકોટ ક્રાઈમ ડીસીપી તરીકે જગદીશ બાંગરવા મુકાયા ત્યારથી આ બદલાવ કે ક્રાઈમ બ્રાન્ચનો કરંટ વધુ કઠીન (મજબૂત) બન્યો છે. આરોપીઓને કાયદામાં રહેવાની ટ્રીટમેન્ટ (પોલીસની સ્ટાઈલમાં સલાહ) આપવામાં આવે છે, કહેવાય છે કે ખુદ ક્રાઈમ બ્રાન્ચના મુખિયા એવા ડીસીપી પોતે ગુનેગારોને કાયદેમે રહોગે તો ફાયદોમે રહોગે. ગુનાખોરી એ કોઈ માર્ગ નથી એવા પોલીસની ભૂમિકામાં પાઠ ભણાવે છે જેને લઈને કૂવાના દેડકા જેવા કેટલાય એવા ગુનેગારો કે શેરી-ગલીના ગાંઠિયાદાદાઓમાં સુધાર પણ આવી ગયો હશે કે ક્રાઈમ બ્રાન્ચના પગથિયા ચડવા એથી તો આપણે આપણો રસ્તો જ બદલાવી સારા કામો કરવા લાગીએ અથવા તો સાહેબ છે ત્યાં સુધી શાંતિ પકડી લઈએ. રાજકોટમાં છેલ્લા ચાર માસમાં જ ચાર-ચાર ગેંગો સામે ગુજસીટોક કરાઈ અને ગેંગોને સાફ કરીને જેલમાં પુરી દેવાઈ. રવિવારે વધુ એક આવી શહેરમાં ઉત્પાત મચાવતી અને ક્યારેક તો એકલ-દોકલ પોલીસને પણ કાઠું પડી જાય કે જવાબ ન દે તેવી ભગવતિપરા વિસ્તારની ઈભલા ગેંગને તાત્કાલીકપણે ગુજસીટોકમાં પુરી દેવાઈ છે. ગાંઠિયાદાદાઓ કે આવી ગેંગોની દવા ગુજસીટોક મનાઈ રહી છે. સંગઠિત ગુનાખોરી આરોપ હેઠળ જેલમાં ધકેલાતા આરોપીઓ જ્યારે જેલ મુક્ત થાય ત્યારબાદ આકરી શરતો કે કાયદાના અનુશાસનને ધ્યાને લઈને ગુનો આચરતા વિચારતા થઈ જાય છે. રાજકોટમાં વધુ એક અને પાંચમી ગેંગ સામે ગુજસીટોક થતાં જાણકારોમાં એવી વાતો ગુંજી છે કે શું ક્રાઈમ બ્રાન્ચ કા કરાર જવાબ ? કે ઉપરાણું લેનારાઓને પણ ઈન્ડિકેશન છે ? ક્રાઈમ બ્રાન્ચ જ છે.
બિનસંવેદનશીલ જગ્યાએ જ પોસ્ટિંગ આપવું, પોલીસમાં આવા એવોર્ડનો અમલ થાય છે ખરો ?
રાજ્યમાં પોલીસ વિભાગમાં કોઈ પોલીસકર્મીથી લઈ અધિકારી સુધીના કોઈને કોઈ કોર્ટ કેસ, ફરજ બેદરકારી, દારૂ, જુગાર કે અસામાજિક અથવા તો પોલીસ મેન્યુઅલ વિરોધની પ્રવૃત્તિમાં ક્યાંયને ક્યાંય પ્રત્યક્ષ કે પરોક્ષરૂપે ચોપડે ચડે અથવા ખાતાકીય ઈન્કવાયરીમાં કે કોઈ રડારમાં આવી જાય તો તેઓને કાં તો જિલ્લા બહાર બદલીઓ, હેડક્વાર્ટરમાં મુકી દેવાય અથવા તો સસ્પેન્ડ કરી દેવાતા હોય છે. આવા સસ્પેન્ડેડ કે કોઈ ફરજ બેદરકારીમાં આવી જાય અને ફરી તેઓને પુન: ફરજ માટે નિયુક્તિ કરવામાં આવે કે આવા ઓર્ડર નીકળે ત્યારે આવા ઘણાખરા ઓર્ડર્સમાં ડીજી, ગૃહ કે જે તે અધિકારી દ્વારા સ્પષ્ટ ટાંચ કરાયેલી હોય છે કે બિનસંવેદનશીલ સ્થળે પોસ્ટિંગ આપવું. આવી શરત સાથે જે તે શહેર-જિલ્લામાં ઓર્ડર થતાં હોય છે. ગાંધીનગર લેવલે તો આવા ઓર્ડર કરી દેવાય છે પરંતુ તેનું પાલન જે તે શહેર-જિલ્લાના ઉચ્ચ અધિકારીઓના હાથમાં હોય છે. બિનસંવેદનશીલ જગ્યાએ પોસ્િંગનો અર્થ સામાન્ય રીતે એવો નીકળે કે મહત્વની જગ્યા કે આવી જવાદારીભરી ફરજ ન સોંપવી, પુન: ફરજ પર હાજર થનારા અધિકારીઓ, કર્મીઓને ખરેખર ઉચ્ચસ્તરે થયેલા બિનસંવેદનશીલ જગ્યા પર જ ફરજ આપવી તેવા ઓડરનો અમલ થતો હોય છે કે નહીં કે પછી સ્થાનિકસ્તરે જ ઉચ્ચ અધિકારીઓ ભલે ને ઉપરથી ઓર્ડર થયો હોય મુકવાના તો મારે જ છે ને કોર્ટનો આદેશ હોય કે ગાંધીનગરનો. આવા આદેશનો સ્થાનિકસ્તરે ક્યાંક ક્યાંક ઉલાળિયો કરી દેવાતો હોય છે અને જે બિનસંવેદનશીલ જગ્યાઓ પર જ મુકવાના હોય તેમને જ મહત્વની શાખાઓ કે આવી ખાસ પોિંગ આપી દેવાના હોવાનો ગણગણાટ કે કાનાફૂસી રહ્યા કરે છે કે ઉપરવાળા પણ ઓર્ડર કરીને છૂટી જાય છે પણ મોનિટરિંગ થતું નથી કે આપણા ઓર્ડર્સ ફોલો થાય છે કે નહીં ?
