IPLમાં મેચના દિવસે પ્રેક્ટિસ નહીં,એવોર્ડ લેવા સ્લિવલેસ જર્સી-ચપ્પલ નહીં પહેરી શકાય: IPL-2026 માટે BCCIએ બનાવ્યા કડક નિયમ
ભારતીય ક્રિકેટ કંટ્રોલ બોર્ડ (BCCI)એ આઈપીએલ-2026 માટે કડક નિયમ બનાવ્યા છે. હવે મેચના દિવસે ટીમ પ્રેક્ટિસ કરી શકશે નહીં. આ ઉપરાંત ખેલાડીઓના પહેરવેશથી લઈને સ્ટેડિયમમાં ખેલાડીના પરિવારની અવર-જવર સુધી શું કરવું અને શું ન કરવું તેની યાદી તૈયાર કરી છે.
BCCIએ સ્પષ્ટ કર્યું છે કે મેચના દિવસે મુખ્ય મેદાન ઉપર કોઈ પ્રકારની પ્રેક્ટિસ કરી શકાશે નહીં. પ્રેક્ટિસ માટે ટીમોને પ્રેક્ટિસ એરિયામાં બે નેટ અને મુખ્ય સ્કવેર ઉપર રેન્જ હિટિંગ માટે એક સાઈડ વિકેટ અપાશે. મુંબઈના વાનખેડે સ્ટેડિયમ જેવા ગ્રાઉન્ડ પર જો બન્ને ટીમ એક જ સમયે પ્રેક્ટિસ કરે છે તો બન્ને ટીમને બે-બે પીચ અપાશે. આ ઉપરાંત મેચના દિવસે મુખ્ય મેદાન ઉપર કોઈ પણ ખેલાડીનો ફિટનેસ ટેસ્ટ કરી શકાશે નહીં.
પ્રેક્ટિસના દિવસે ખેલાડીઓએ ટીમ બસમાં જ સ્ટેડિયમ પહોંચવું પડશે. જો કે ટીમો બે તબક્કામાં યાત્રા કરી શકે છે. એક મહત્ત્વપૂર્ણ ફેરફાર એવો પણ છે કે ખેલાડી પોતાના પરિવારના સભ્યો સાથે યાત્રા કરી શકશે નહીં. પરિવાર અને મિત્રોએ અલગ વાહનમાં આવવા-જવાનું રહેશે અને તેમને માત્ર હોસ્પિટાલિટી એરિયામાંથી જ પ્રેક્ટિસ જોવાની પરવાનગી અપાશે. મેદાનની અંદર ઓપન નેટસની પરવાનગી સંપૂર્ણ પ્રતિબંધિત કરી દેવાઈ છે.
મેચ દરમિયાન શિસ્ત જાળવી રાખવા માટે પણ નિયમ બનાવાયા છે. ખેલાડીઓને નિર્દેશ અપાયો છે કે તે એલઈડી બોર્ડની દિશામાં બોલન મારે અને ન બોર્ડની સામે બેસે. આ ઉપરાંત ઓરેન્જ અને પર્પલ કેપ ધરાવતા ખેલાડીએ ઓછામાં ઓછી બે ઓવર સુધી કેપ પહેરી રાખવી પડશે. મેચ બાદ પ્રેઝન્ટેશન સેરેમનીમાં સ્લિવલેસ જર્સી અને ચપ્પલ પહેરવા પર પ્રતિબંધ રહેશે.
