ડૉક્ટર શું કરે છે તે જાણવાની ઉત્સુક્તાને કારણે કેમેરો ફિટ કર્યો, પછી જાગી લાલચ! બ્લેકમેઈલિંગ કરી પૈસા કઢાવવા બોગસ પત્રકારોનો સંપર્ક કર્યો
તબીબી ક્ષેત્રને કલંક લાગે તેવું કારસ્તાન તબીબે જ આચરતાં રાજકોટ જ નહીં, બલ્કે આખા ગુજરાતમાં ચકચાર મચી ગઈ હતી. સાધુ વાસવાણી રોડ પર આવેલ ક્લિનિકમાં ચોરીછૂપીથી કેમેરો લગાવી ડૉક્ટરની ‘જાસૂસી’ કર્યા બાદ બોગસ પત્રકારોની ઓથ મેળવી બ્લેક મેઈલિંગ શરૂ કરવાની ફરિયાદ નોંધાતા સાઇબર ક્રાઇમ પોલીસ મથકની ટીમે આરોપી ડૉક્ટર ધરપકડ કરી પૂછપરછ કરતાં ચોંકાવનારી વિગત સામે આવી.
મિત્ર ડૉક્ટર તેની ઓફિસમાં શું કરે છે તે જાણવાની ઉત્સુક્તાને કારણે જ આરોપી ડૉ. કમલ ચમનભાઈ નાંઢાએ (ઉ.વ.32) કેમેરો ફિટ કર્યો હતો. ફૂટેજથી પૈસા મળવાના લાલચે તેને બોગસ પત્રકારોનો સંપર્ક કરવાનું શરૂ કર્યું.
સાઈબર ક્રાઇમ પોલીસ મથકના પીઆઈ જે.એમ. કૈલા સહિતની ટીમે ડૉ. કમલ નાંઢાને ધરપકડ કરી રિમાન્ડ અર્થે કોર્ટમાં રજૂ કરતાં કોર્ટે 1 દિવસના રિમાન્ડ મંજૂર કર્યા.
ફૂટેજ સ્ટોરેજ બાદ ડૉ. કમલ નાંઢાએ વીડિયો પત્રકારોને આપ્યા અને હિરેન મકવાણા, જગદીશ તેરૈયા, ઘનશ્યામ પટેલ, અમિત ઠક્કર, જતીન નથવાણી, ભરત, જીગર સોઢા સહિતના 11 શખ્સોએ ડૉક્ટરને બ્લેક મેઈલિંગ કરવાનું શરૂ કર્યું અને 25 લાખની ખંડણી માંગી. પોલીસે બોગસ પત્રકારો સામે પણ ગુનો દાખલ કર્યો છે, તેની તપાસ ચાલી રહી છે.
