નવી પ્રવાસન નીતિ: હોટલ બાંધકામ માટે હળવા નિયમો અને ઝડપી મંજુરી! કર પ્રોત્સાહન, લીકર પરમિટમાં છૂટછાટ સહિતના લાભ આપવા કવાયત
પહેલા કોમનવેલ્થ ગેઈમ્સ અને પછી ઓલમ્પિક રમતોત્સવ ગુજરાતમાં આવી રહ્યો છે ત્યારે તેને ધ્યાનમાં રાખીને ગુજરાત સરકાર હાલમાં હોટલ અને પ્રવાસન ઉદ્યોગ માટે નવી નીતિને આખરી ઓપ આપવામાં વ્યસ્ત છે. આ નવી નીતિમાં હોટલ બાંધકામને મંજુરીના ધોરણો હળવા,કર પ્રોત્સાહન, વધારાની એફ.એસ.આઈ.સહિતની છૂટછાટ મળશે તેવું જાણવા મળ્યુ છે. નવી પ્રવાસન નીતિમાં લીકર પરમિટના ધોરણોમાં પણ છૂટછાટ આવી શકે છે.
કોમનવેલ્થ ગેઈમ્સ 2030માં યોજાનાર છે ત્યાર પહેલા હોટલ અને પ્રવાસન નીતિ જાહેર થઇ જાય અને તે મુજબ હોસ્પિટાલિટી સેક્ટરનો વિકાસ થાય તેવી ધારણા રાખીને સરકારે આ નીતિ તૈયાર કરી છે. આ ગેઈમ્સ સંદર્ભે એકલા અમદાવાદમાં જ 60 હજાર જેટલા વધારાના હોટલ રૂમની જરૂર ઉભી થશે તેવી ધારણા છે ત્યારે નવી નીતિ હોટલ બાંધકામને વેગ આપવા માટે પ્રોત્સાહન આપશે.
સુત્રોએ જણાવ્યુ છે કે, આ નીતિને અંતિમ સ્વરૂપ આપતા પહેલા રાજ્ય સરકાર ત્રણ રાજ્યોની પ્રવાસન નીતિનો અભ્યાસ પણ કર્યો
છે.સરકારે આ પહેલા 2021માં હોટલ અને પ્રવાસન નીતિ જાહેર કરી હતી જેની મુદ્દત 2025માં પૂરી થઇ ગઈ છે. આ સમયગાળામાં ધારણા કરતા ઓછી સંખ્યામાં હોટલ બની છે. નવી નીતિમાં હોટલ બાંધકામમાં સબસિડી આપવાને બદલે વધારાની એફ.એસ.આઈ. , કર પ્રોત્સાહન અને વીજ બીલમાં છૂટ જેવા પ્રોત્સાહન જાહેર થઈ શકે છે. સબસિડી આપવાથી રાજ્ય સરકારની તિજોરી ઉપર ભારણ આવે તેમ છે તેથી અન્ય પ્રોત્સાહન આપવા વિચારણા થઇ રહી છે.
હોટલ ઉદ્યોગના જાણકારો એવું માની રહ્યા છે કે, કોમનવેલ્થ ગેઈમ્સ માટે ઓછામાં ઓછી 300 નવી હોટલની જરૂર છે. અને હોટેલ પ્રોજેક્ટ્સ પૂર્ણ થવામાં સામાન્ય રીતે પાંચ વર્ષથી વધુ સમય લાગે છે.હોટલ માટે મંજુરી મેળવવામાં જ 10 થી 12 માસ જેટલો સમય પસાર થઇ જાય છે. આવા સંજોગોમાં મંજુરીની પ્રક્રિયા ઝડપી બનાવવામાં આવશે.
સરકારે 2026-27 ને પ્રવાસન વર્ષ તરીકે જાહેર કર્યું છે અને મુલાકાતીઓને આકર્ષવા માટે “વેડ ઇન ગુજરાત” પહેલ પણ શરૂ કરી છે. આ માટે, તે દારૂ નીતિમાં ધોરણોમાં છૂટછાટ આપવાનું વિચારી રહી છે.કોમનવેલ્થ ગેઈમ્સ પહેલાના કાર્યક્રમોમાં હાજરી આપતા રાષ્ટ્રીય અને આંતરરાષ્ટ્રીય પ્રતિનિધિઓને માટે ગ્રુપ પરમિટ અને કામચલાઉ ઇવેન્ટ-વિશિષ્ટ પરમિટ માટેની દરખાસ્તો પર કામ કરવામાં આવી રહ્યું છે.
