દુબેજીની સિક્રેટ જર્ની: ચેમ્પિયન્સ ટ્રોફી જીત્યા બાદ ફ્લાઇટ ન મળતા શિવમ ડૂબીએ ટ્રેનમાં કરી મુસાફરી, મોઢું સંતાડીને મુંબઈ પહોંચ્યો
અમદાવાદ નરેન્દ્ર મોદી સ્ટેડિયમમાં એક લાખથી વધુ દર્શકો વચ્ચે “દુબે, દુબે” ના નારા ગુંજ્યાના થોડા કલાકો પછી શિવમ દુબે એક અલગ મિશન પર હતો. ન્યુઝીલેન્ડ સામે ટી-20 વર્લ્ડ કપની અંતિમ ઓવરમાં ત્રણ ચોગ્ગા અને બે છગ્ગા ફટકારીને ભારતને 250 થી વધુ રન સુધી પહોંચાડનાર શિવમ દુબેને મુંબઈ જવા માટે કોઈ ફ્લાઇટ મળી ન હતી. તેણે જે રસ્તો પસંદ કર્યો તે ફિલ્મની સ્ક્રીપ્ટ જેવો હતો.
શિવમ દુબે તેની પત્ની અંજુમ અને એક મિત્ર સાથે અમદાવાદ-મુંબઈ સયાજી એક્સપ્રેસમાં 3-ટાયર એસી કોચમાં મુસાફરી કરી રહ્યા હતા. મુંબઈ જતી બધી ફ્લાઇટ્સ ફૂલ હતી, તેથી દુબેએ ટ્રેન પકડવાનું નક્કી કર્યું કારણ કે તે તેના 4 વર્ષના પુત્ર અયાન અને 2 વર્ષની પુત્રી મહવિશને જોવા માટે ઉત્સુક હતો. પોતાની ઓળખ છુપાવવા માટે, દુબેએ ટોપી, માસ્ક અને આખી બાંયનું ટી-શર્ટ પહેર્યું અને ટ્રેન રવાના થાય તેના પાંચ મિનિટ પહેલા જ કોચમાં પ્રવેશ કર્યો હતો.
ટ્રેનની અંદર ઉપરની બર્થ પર રેલ્વેના ધાબળા નીચે છુપાયેલા દુબે માટે સૌથી મુશ્કેલ ક્ષણ ત્યારે આવી જ્યારે ટિકિટ ચેકર આવ્યો. તેનું નામ જોઈને, ટીસીએ પૂછ્યું કે, “શિવમ દુબે? તે કોણ છે, પેલો ક્રિકેટર?” જો કે દુબેની પત્ની અંજુમે ચતુરાઈથી જવાબ આપ્યો, “ના, ના, તે ક્યાંથી આવશે?” આ સાંભળી ટીસી રવાના થયા હતા. દુબેએ કહ્યું કે તે આઠ કલાકની મુસાફરી દરમિયાન ભીડથી બચવા માટે ઉપરની બર્થ પર જ રહ્યો હતો.
મુંબઈના બોરીવલી સ્ટેશન પર ધોળા દિવસે ઉતરવું દુબે માટે એક મોટો પડકાર હતો. તેમને ડર હતો કે ચાહકો તેમને ઓળખી લેશે અને નાસભાગ મચી શકે છે જેથી તેણે પોલીસની મદદ માંગી હતી. પોલીસને પણ એ જાણીને આશ્ચર્ય થયું કે વર્લ્ડ કપ ચેમ્પિયન ફ્લાઇટ દ્વારા નહીં પણ ટ્રેન દ્વારા આવી રહ્યો છે. પોલીસ સુરક્ષા હેઠળ, દુબે સુરક્ષિત રીતે સ્ટેશનથી બહાર નીકળ્યો અને તેના ઘરે પહોંચ્યો હતો.
