ગુજરાતના મુખ્યમંત્રી, DyCM, પ્રદેશ ભાજપ અધ્યક્ષ સહિતના દિલ્હીમાં: PM સાથે સ્થાનિક સ્વરાજની ચૂંટણી અંગે કરશે બેઠક
મુખ્યમંત્રી ભૂપેન્દ્ર પટેલ, નાયબ મુખ્યમંત્રી હર્ષ સંઘવી અને પ્રદેશ ભાજપ અધ્યક્ષ જગદીશ વિશ્વકર્માને આજે અચાનક દિલ્હીનું તેડું આવ્યું હતું. આજે સાંજે વડાપ્રધાન સાથે યોજાનાર સ્થાનિક સ્વરાજની ચૂંટણી અંગેની બેઠકમાં ભાગ લેવા તેઓ દિલ્હી ગયા છે.
આધારભૂત સૂત્રોના જણાવ્યા મુજબ વડાપ્રધાને આજે સાંજે અચાનક સ્થાનિક સ્વરાજની ચૂંટણી અંગે બેઠકનું આયોજન કરતા મુખ્યમંત્રી ભૂપેન્દ્ર પટેલ, નાયબ મુખ્યમંત્રી હર્ષ સંઘવી, પ્રદેશ ભાજપ અધ્યક્ષ જગદીશ વિશ્વકર્માને તાકીદે દિલ્હી બોલાવી લેવાયા હતા.
જેના કારણે આ ત્રણેય નેતાઓએ તેમના પૂર્વ નિર્ધારિત કાર્યક્રમો કેન્સલ કરી નાખ્યા હતા. મુખ્યમંત્રી ભૂપેન્દ્ર પટેલ અને નાયબ મુખ્યમંત્રી હર્ષ સંઘવી આજે વિધાનસભાની બીજી બેઠકમાં પ્રશ્નોત્તરી કાળમાં ગેરહાજર રહ્યા હતા. તો ભાજપના પ્રદેશ અધ્યક્ષ વિશ્વકર્માએ તેમના કલોલ સ્વામિનારાયણ યુનિવર્સિટીના પૂર્વ નિર્ધારિત કાર્યક્રમમાં જવાનું મુલત્વી રાખ્યું હતું.
આજની બેઠકમાં સ્થાનિક સ્વરાજની ચૂંટણી ક્યારે યોજવી. તેની ગુજરાત સરકાર અને ગુજરાત ભાજપની શું તૈયારી છે અને તૈયારીના ભાગરૂપે તાકીદે શું શું કામગીરી શરૂ કરવી તે અંગે ચર્ચા વિચારણા હોવાનું આધારભૂત સૂત્રોએ જણાવ્યું હતું. આ બેઠકમાં કેન્દ્રીય ગૃહ મંત્રી અમિત શાહ પણ ઉપસ્થિત રહેવાના હતા તેમ સૂત્રોનું કહેવું છે.
આજની બેઠક બાદ હવે ગુજરાતમાં સ્થાનિક સ્વરાજની ચૂંટણીની જાહેરાત ગમે ત્યારે થઈ શકે છે. અને ચૂંટણી સંભવતઃ મે માસના પ્રથમ કે બીજા સપ્તાહમાં આવી શકે છે તેવું સૂત્રોએ ઉમેર્યું હતું.
