બિલ્ડરો થયા ખુશખુશાલ: 1 એપ્રિલથી બિલ્ડિંગમાં વધારાના બાંધકામ માટે રૂ.50 લાખથી વધુની ફી ચાર હપ્તે ભરી શકાશે
આજે બુધવારે સાંજે 6 વાગ્યાથી મહાપાલિકાના શાસકોની ટર્મ પૂર્ણ થઈ રહી છે તેના એક દિવસ પહેલાં એટલે કે મંગળવારે સ્પેશિયલ જનરલ બોર્ડ બોલાવી એજન્ડામાં રહેલી 12 ઉપરાંત અરજન્ટ બિઝનેસ સ્વરૂપે રજૂ કરાયેલી બે દરખાસ્તને પણ મંજૂરી આપવામાં આવી હતી.
આ બે પૈકી એક દરખાસ્ત બિલ્ડર્સ લોબીને `રાહત’ આપતી હોય શાસકોએ તેમનું પણ પૂરું `ધ્યાન’ રાખ્યું હતું. દરખાસ્ત મંજૂર થઈ જતાં હવે બિલ્ડર્સ 1 એપ્રિલથી બિલ્ડિંગ પ્રોજેક્ટમાં વધારાનું બાંધકામ કે જેને ફ્લાવર બેડ કહેવામાં આવે છે તેની રૂા.50 લાખથી વધુની ફી હશે તો તેને ચાર હપ્તે ચૂકવી શકશે.
શાસકો દ્વારા મંજૂર કરાયેલી દરખાસ્તમાં જણાવ્યા પ્રમાણે જો ફીની રકમ 50 લાખથી અંદર હશે તો હપ્તાનો લાભ મળશે નહીં. ભરવાપાત્ર ફી 50 લાખથી વધારે હોય તો વધુમાં વધુ ત્રણ-ત્રણ મહિનાના ચાર હપ્તા કરવામાં આવશે. જો કે હપ્તાનો લાભ લેતા પહેલાં બિલ્ડરે ફીની કુલ રકમ પૈકી 25% રકમ ભરપાઈ કરવાની રહેશે.
જો ચેક બાઉન્સ થાય તો વર્ષે 18%ના દરે પેનલ્ટી દર મહિને વસૂલવામાં આવશે. હપ્તાની રકમના પોસ્ટ ડેટેડ ચેક અરજદાર દ્વારા વિકાસ પરવાનગી મેળવતા પહેલાં મહાપાલિકામાં જમા કરાવવાના રહેશે. હપ્તાની સંપૂર્ણ રકમ ભરપાઈ થયા બાદ જ બિલ્ડિંગ યુઝ કમ્પલીશન આપવામાં આવશે.
