અમદાવાદમાં નશાકારક દવાના કાળા કારોબારનો પર્દાફાશ: ક્રાઈમ બ્રાન્ચથી 800 મીટર દૂર 12 લાખની 3,000 ગોળીઓ જપ્ત, 3 આરોપી ઝડપાયા
ગાંધીનગર સીઆઈડી ક્રાઈમની એન્ટી નાર્કોટિક્સ ટાસ્ક ફોર્સ (ANTF) એ અમદાવાદના રાયખડ વિસ્તારમાં ફિલ્મી ઢબે ઓપરેશન પાર પાડી નશાકારક દવાઓનું મોટું રેકેટ ઝડપી પાડ્યું છે. નવાઈની વાત એ છે કે, આ કાર્યવાહી શહેર ક્રાઈમ બ્રાન્ચની ઓફિસથી માત્ર 800 મીટરના અંતરે કરવામાં આવી હતી.
બાતમીના આધારે વોચ ગોઠવાઈ ANTF ના PSI એમ.એન. આદરેજીયાને ચોક્કસ બાતમી મળી હતી કે જમાલપુરનો ઇમરાન હુસેન ઉર્ફે ‘ફેફડો’ શેખ નશા માટે વપરાતી અલ્પ્રાઝોલમ દવાનો જથ્થો લઈને રાયખડ વિસ્તારમાંથી પસાર થવાનો છે. આ બાતમીના આધારે ટીમે રાયખડ ચાર રસ્તા પાસે વોચ ગોઠવી હતી. આ દરમિયાન એક શંકાસ્પદ રિક્ષાને અટકાવતા તેમાંથી ઇમરાન હુસેન સાથે રિક્ષાચાલક મઝરખાન પઠાણ અને મોહમ્મદ આસિફ મળી આવ્યા હતા.
તપાસમાં શું મળ્યું? રિક્ષાની તલાશી લેતા એક પ્લાસ્ટિકની થેલીમાંથી સફેદ રંગના બોક્સ મળી આવ્યા હતા. જેમાં તપાસ કરતા પ્રતિબંધિત નશાકારક દવાની કેટેગરીમાં આવતી અલ્પ્રાઝોલમ ટેબ્લેટ્સનો જથ્થો મળી આવ્યો હતો.
મેડિકલ સ્ટોરના માલિકની સંડોવણી ઝડપાયેલા આરોપી ઇમરાનની પૂછપરછમાં ચોંકાવનારો ખુલાસો થયો છે. તેણે કબૂલાત કરી કે આ નશાકારક દવાઓ તેણે ચાણક્યપુરી વિસ્તારમાં આવેલા ‘બજરંગ મેડિકલ સ્ટોર’ના માલિક હાર્દિક ઠક્કર પાસેથી માત્ર ૫૦૦૦ રૂપિયામાં ખરીદી હતી. આ દવાઓનો ઉપયોગ ઊંઘ અને નશા માટે કરવામાં આવતો હોવાનું ખુલ્યું છે.
કાયદેસરની કાર્યવાહી ANTF એ આ મામલે ગાયકવાડ હવેલી પોલીસ સ્ટેશનમાં ઇમરાન, મઝરખાન, મોહમ્મદ આસિફ અને મેડિકલ સ્ટોર સંચાલક હાર્દિક ઠક્કર વિરુદ્ધ NDPS એક્ટ હેઠળ ગુનો નોંધી વધુ તપાસ હાથ ધરી છે. આ જથ્થો કોને સપ્લાય કરવાનો હતો અને આ નેટવર્કમાં અન્ય કેટલા લોકો સામેલ છે તે દિશામાં તપાસ તેજ કરવામાં આવી છે.
બજારમાં એક ગોળીની કિંમત ₹400
પોલીસ તપાસમાં બહાર આવ્યું છે કે જપ્ત કરાયેલા દરેક બોક્સમાં 40 સ્ટ્રીપ્સ હતી અને પ્રત્યેક સ્ટ્રીપમાં ૭૫ ગોળીઓ હતી. આમ, કુલ અંદાજે 3000 ટેબ્લેટ્સ મળી આવી હતી. નશાના કાળા બજારમાં એક ગોળી અંદાજે 400 રૂપિયામાં વેચાતી હોય છે, જે મુજબ જપ્ત કરાયેલા કુલ જથ્થાની કિંમત અંદાજે 12 લાખ રૂપિયા આંકવામાં આવી છે.
