હેવન નહીં ‘આફત’નો વરસાદ! સુરતમાં પૂર જેવી સ્થિતિ, હવામાન વિભાગનું રેડ ઍલર્ટ
ગઈકાલથી શરૂ થયેલો વરસાદ આજે સુરત માટે આફત બનીને ત્રાટક્યો. માત્ર 8 કલાકમાં 10 ઇંચ વરસાદ ખાબકતા ડાયમંડ સિટી જળબંબાકાર થઈ ગયું છે. સરથાણા, જકાતનાકા, પાંડેસરા અને લાલદરવાજા સહિત અનેક વિસ્તારોમાં કમરસમા પાણી ભરાયા છે. વાહન વ્યવહાર સંપૂર્ણ ઠપ થઈ ગયો છે અને ફાયર વિભાગે બોટ મારફતે 21 લોકોને સુરક્ષિત રીતે બહાર કાઢ્યા છે. હવામાન વિભાગે સુરત સહિત 8 જિલ્લામાં રેડ ઍલર્ટ જાહેર કર્યું છે.
શહેરમાં પૂર જેવી સ્થિતિ, રસ્તાઓ તળાવ બન્યા
આજે સવારે 6 થી બપોરે 2 વાગ્યા સુધીમાં સુરત સિટીમાં 6.93 ઇંચ વરસાદ નોંધાયો હતો. અવિરત વરસાદના કારણે સરથાણા અને જકાતનાકામાં કમરસમા પાણી ભરાઈ ગયા હતા. પાંડેસરાના શિવમ નગર, કૃષ્ણનગર અને પ્રેમ નગરમાં પણ ઘૂંટણસમા પાણી ફરી વળ્યા હતા. લાલદરવાજા અને પટેલ વાડી વિસ્તાર પણ પાણીમાં ગરકાવ થઈ ગયો હતો. મુખ્ય માર્ગો પર પાણી ભરાતા લોકોને ભારે હાલાકીનો સામનો કરવો પડ્યો.
આ પણ વાંચો: દંતકથારૂપ જોડીને શ્રદ્ધાંજલિ: પરિમલ નથવાણીના હસ્તે ગીરની આઇકોનિક
BRTS-ST બંધ, રેસ્ક્યૂ ઓપરેશન યુદ્ધના ધોરણે
ભારે વરસાદના કારણે સુરતનો સિટી બસ, BRTS અને ST બસ વ્યવહાર સંપૂર્ણ ઠપ થઈ ગયો છે. સર્વોદય બેંક અને રેલવે સ્ટેશનના ગરનાળામાં કમરબૂડ પાણી ભરાઈ જતા ટ્રાફિક અટકી ગયો હતો. પરિસ્થિતિને કાબૂમાં લેવા સુરત મહાનગરપાલિકા અને ફાયર વિભાગની ટીમો તાત્કાલિક એક્શનમાં આવી. ફાયરની ટીમે બોટ તૈનાત કરીને કુલ 21 નાગરિકોને સુરક્ષિત રીતે રેસ્ક્યૂ કર્યા. પાંડેસરાના અસરગ્રસ્ત લોકોને ઓડીસા પ્રાથમિક શાળામાં શિફ્ટ કરીને રહેવા-જમવાની વ્યવસ્થા કરવામાં આવી છે.
આસપાસના જિલ્લાઓમાં પણ ધોધમાર વરસાદ
સુરત ઉપરાંત કામરેજમાં 8.31 ઇંચ, પલસાણામાં 5.94 ઇંચ, નવસારીમાં 5.71 ઇંચ અને ડાંગના સુબિરમાં 5.31 ઇંચ વરસાદ નોંધાયો છે. બારડોલી, જલાલપોર, મહુવા અને વાલોડમાં પણ 4 ઇંચથી વધુ વરસાદથી નદી-નાળા છલકાયા છે.
હવામાન વિભાગનું રેડ ઍલર્ટ
હવામાન વિભાગે આગામી 24 કલાક માટે સુરત, નવસારી, વલસાડ, તાપી, ડાંગ, ભાવનગર, દમણ અને દાદરા નગર હવેલીમાં ભારેથી અતિ ભારે વરસાદનું રેડ ઍલર્ટ જાહેર કર્યું છે. અમરેલી, ગીર સોમનાથ, ભરુચ, નર્મદા અને અમદાવાદ-ગાંધીનગર સહિતના જિલ્લાઓમાં ઓરેન્જ અને યલો ઍલર્ટ આપવામાં આવ્યું છે. માછીમારોને દરિયો ન ખેડવા અને પોર્ટ પર 3 નંબરનું સિગ્નલ લગાડવાની સૂચના આપવામાં આવી છે. વહીવટી તંત્રએ નાગરિકોને બિનજરૂરી બહાર નીકળવા અપીલ કરી છે.
