ઈરાન-ઈઝરાયલ યુદ્ધ: ગૃહ મંત્રાલયની રાજ્યોને હાઇ એલર્ટની સૂચના! ભારતમાં પણ હિંસા ફાટી નીકળવાનો ભય, સુરક્ષા એજન્સીઓ સતર્ક

યુનાઇટેડ સ્ટેટ્સ અને ઇઝરાયેલ દ્વારા ઈરાન પર થયેલા સંયુક્ત લશ્કરી હુમલા અને ઈરાનના સર્વોચ્ચ ધાર્મિક નેતા અયાતોલ્લાહ અલી ખામેનેઈના મોત પછી તેની અસર હવે ભારત સુધી પહોંચવાની આશંકા ઊભી થઈ છે. કેન્દ્રના ગૃહ મંત્રાલયે (MHA) તમામ રાજ્યોને સંભવિત હિંસા અને છૂટક વિરોધ પ્રદર્શન અંગે સતર્ક રહેવા તાત્કાલિક ચેતવણી આપી છે.

કેન્દ્ર સરકારે તમામ રાજ્યના મુખ્ય સચિવો અને પોલીસ મહાનિર્દેશકોને મોકલેલા સંદેશમાં સ્પષ્ટ સૂચના આપી છે કે ઈરાનના સમર્થક તેમજ વિરોધી બંને જૂથોના પ્રદર્શન પર નજર રાખવામાં આવે. ખાસ કરીને ઈરાન, અમેરિકા અને ઇઝરાયેલના દૂતાવાસો અને કાઉન્સ્યુલેટ કચેરીઓ આસપાસ સુરક્ષા વધારવા કહેવામાં આવ્યું છે.

ખામેનેઈના મોતના વિરોધમાં દેશભરના અનેક વિસ્તારોમાં મોટી સંખ્યામાં લોકો રસ્તા પર ઉતર્યા હતા. ઉત્તર પ્રદેશ, જમ્મુ-કાશ્મીર, લદ્દાખ, કર્ણાટક અને દિલ્હી સહિત અનેક શહેરોમાં મુખ્યત્વે શિયા સમુદાય દ્વારા પ્રદર્શન યોજાયા હતા. ગૃહ મંત્રાલયે ઉશ્કેરણીજનક ભાષણ આપતા કટ્ટરપંથી ધાર્મિક પ્રચારકોને ઓળખી કાર્યવાહી કરવા સૂચના આપી છે. “પ્રો-ઈરાન” વિદ્યાર્થી સંગઠનો, સામાજિક-રાજકીય સંગઠનોની પ્રવૃત્તિઓ પર પણ સતત નજર રાખવા જણાવાયું છે.

આ પણ વાંચો :‘વોઈસ ઓફ ડે’એ પૂછયું, ધમકીભર્યા E-MAILના મુળ સુધી પોલીસ કેમ નથી પહોંચી શકતી ? DGPએ કહ્યું-ધમકી આપનારા સુધી પહોંચ્યા છીએ: વિદેશ બને છે ‘નડતર’

કેન્દ્રએ ચેતવણી આપી છે કે સોશિયલ મીડિયા પર ગેરમાહિતી ફેલાવીને હિંસા ભડકાવવાના પ્રયાસો થઈ શકે છે. તેથી ઈરાન તરફી જૂથો તથા આંતરરાષ્ટ્રીય આતંકવાદી સંગઠનોના ઓનલાઈન હેન્ડલ્સ પર મોનિટરિંગ વધારવાનું પણ સૂચન કરવામાં આવ્યું છે.

આતંકવાદી સંગઠનો તરફથી ખતરો

ગૃહ મંત્રાલયના આંકલન મુજબ ઈસ્લામિક સ્ટેટ અને અલ-કાયદા જેવા વૈશ્વિક આતંકવાદી સંગઠનો અથવા શિયા મિલિશિયા જૂથો પરિસ્થિતિનો લાભ લઈ હુમલાનો પ્રયાસ કરી શકે છે. તેથી તમામ સુરક્ષા દળોને ખતરા અંગે સંવેદનશીલ બનાવવાની તેમજ સંવેદનશીલ વિસ્તારોમાં સીસીટીવી, ચેકિંગ અને વિસ્ફોટક પદાર્થો (IED) શોધ અભિયાન તેજ કરવાની સૂચના આપવામાં આવી છે.
સરકારે ખાસ કરીને પશ્ચિમ દેશોના પ્રવાસીઓ આવતા વિસ્તારોમાં સુરક્ષા વધારવા, અફવાઓ અટકાવવા અને કાયદો-વ્યવસ્થા જાળવવા કડક પગલાં લેવા જણાવ્યું છે.

હુમલા ક્યાં થઈ શકે ?

• અમેરિકા અને ઇઝરાયેલના દૂતાવાસ અને કાઉન્સ્યુલેટ
• તેમના અધિકારીઓ, પ્રતિનિધિમંડળ અને વ્યાપારીઓ
• ઈરાનના દૂતાવાસ, સંસ્કૃતિક કેન્દ્રો
• પશ્ચિમ દેશોના પ્રવાસીઓ આવતા હોય તે ટુરિસ્ટ સ્થળો અને રિસોર્ટ
• વ્યાપારિક સંસ્થાઓ અને આંતરરાષ્ટ્રીય હોટેલ
• સિનેગોગ, યહૂદી સમુદાય કેન્દ્રો
• ચાબાડ હાઉસ અને કોશેર દુકાનો