હવે મેરેજ સર્ટિફિકેટ માટે ‘લોકેશન’ફરજિયાત: હવે યુગલે રાજકોટની હદમાં જ લગ્ન કર્યા છે તેવું દર્શાવવા ગૂગલ મેપ આપવો પડશે
રાજકોટ મહાપાલિકામાં સૌથી વધુ અરજદારની ભીડ જો કોઈ વિભાગમાં રહેતી હોય તો વેરા, આવાસ બાદ લગ્ન નોંધણી વિભાગમાં રહેતી હશે. કચેરી શરૂ થઈને બંધ ન થાય ત્યાં સુધી આ વિભાગમાં અરજદારોની અવર-જવર સતત જોવા મળે જ છે. લગ્ન કર્યા બાદ મેરેજ સર્ટિફિકેટ જરૂરી હોય યુગલ તેના માટે વારંવાર ધક્કા ખાઈ રહ્યાની સમસ્યા ધ્યાન પર આવતાં તંત્ર દ્વારા હવે મેરેજ સર્ટિફિકેટ મેળવવાની પ્રક્રિયા પણ ઓનલાઈન કરી દેવામાં આવી છે. બજેટમાં જાહેરાત કર્યાના 22 દિવસની અંદર જ 50 લોકોએ મેરેજ સર્ટિફિકેટ મેળવવા માટે ઓનલાઈન અરજી કરી હતી. જ કે ઓનલાઈન સર્ટિફિકેટ માત્રને માત્ર રાજકોટની હદમાં જ લગ્ન થયા હોય તેવા યુગલને મળી શકે તેમ હોવાથી હવે ‘લોકેશન’ ફરજિયાત કરવામાં આવ્યું છે.
આ અંગે આરોગ્ય અધિકારી ડૉ. જયેશ વંકાણીએ જણાવ્યું કે મેરેજ સર્ટિફિકેટ માટે ઓનલાઈન અરજી કરવાની વ્યવસ્થા કરાતાં જ અરજદારો તેનો લાભ લેતા થઈ ગયા છે. અત્યાર સુધીમાં આવી ૫૦થી વધુ અરજી આવી છે જેમાંથી અનેક અરજીઓ એવી પણ મળી હતી જેમાં યુગલના લગ્ન રાજકોટ મહાપાલિકાની હદની બહાર થયા હોવા છતાં સિસ્ટમ દ્વારા આ અરજીનો સ્વીકાર કરી લેવામાં આવ્યો હતો પરંતુ જ્યારે યુગલ સર્ટિફિકેટ લેવા માટે કચેરીએ આવે ત્યારે વેરિફિકેશન દરમિયાન આ પ્રકારની અરજી રિજેક્ટ કરવામાં આવતી હોવાને કારણે અરજદારને ધક્કો થઈ રહ્યો હોય હવે પોર્ટલ ઉપર સુધારો કરી લોકેશનનો વિકલ્પ આપવામાં આવ્યો છે.
હવે યુગલે કંકોત્રીની સાથે જ લગ્ન સ્થળનું ગૂગલ મેપ લોકેશન ફરજિયાત આપવાનું રહેશે. અરજી સબમિટ થયા બાદ યુગલને કચેરીએ સર્ટિફિકેટ લેવા આવવા માટેનો એક સ્લોટ આપવામાં આવશે. આ સમયે હાજર રહ્યા બાદ વેરિફિકેશન કરી તેમને સર્ટિફિકેટ આપી દેવાશે. આમ થવાથી અરજદારોનો સમય પણ બચશે અને ધક્કા પણ ખાવા પડશે નહીં. નવા નિયમ પ્રમાણે લગ્નનું સ્થળ ગૂગલ ઉપર સર્ચ કરી જે તે હોલના લોકેશનનો ફોટો અપલોડ કરવાનો રહેશે. એકંદરે કંકોત્રીમાં જે સ્થળ દર્શાવ્યું હોય તે સ્થળ ગૂગલ મેપ ઉપર શોધવાનું રહેશે.
