એલિયન, UFO અંગેની તમામ ગુપ્તફાઇલો જાહેર કરવા ટ્રમ્પનો આદેશ: ગુપ્ત માહિતી જાહેર કર્યાંનો ઓબામા પર આક્ષેપ
અમેરિકાના ભૂતપૂર્વ રાષ્ટ્રપતિ બરાક ઓબામાએ બ્રહ્માંડમાં પરગ્રહવાસી જીવન હોવાની શક્યતા વ્યક્ત કર્યા બાદ રાષ્ટ્રપતિ ડોનાલ્ડ ટ્રમ્પે એલિયન અને યુએફઓ સંબંધિત સરકારી ગુપ્ત દસ્તાવેજો જાહેર કરવાની પ્રક્રિયા શરૂ કરાવવાનો નિર્ણય કર્યો છે. ટ્રમ્પે આ મુદ્દાને “અત્યંત રસપ્રદ અને મહત્વપૂર્ણ” ગણાવ્યો છે.
ઓબામાના નિવેદનથી અમેરિકામાં ફરી એકવાર એલિયન-યુએફઓ ચર્ચાઓ ગાજવા લાગતા રાષ્ટ્રપતિ ડોનાલ્ડ ટ્રમ્પે સોશિયલ મીડિયા પર જાહેરાત કરી કે તેઓ પેન્ટાગન સહિત સંબંધિત તમામ ફેડરલ એજન્સીઓને એલિયન, પરગ્રહવાસી જીવન, અનઆઇડેન્ટિફાઇડ એરિયલ ફેનોમેના (UAP) અને યુએફઓ અંગેના સરકારી દસ્તાવેજો ઓળખી અને જાહેર કરવાની પ્રક્રિયા શરૂ કરવા સૂચના આપશે.
આ પણ વાંચો:તૂટેલા રમકડાં-રૂમાલથી બંધ દ્વાર…80 હજાર વસ્તી સામે માત્ર 14 આંગણવાડી! રાજકોટના કોઠારીયા વિસ્તારમાં બાળકો ભોગવે છે બેદરકારી
ટ્રમ્પે પોતાના સંદેશમાં જણાવ્યું કે આ મુદ્દા અંગે જનતામાં ભારે રસ છે અને સરકાર પાસે રહેલી માહિતી લોકોને ઉપલબ્ધ થવી જોઈએ. તેમણે ખાસ કરીને પેન્ટાગન પ્રમુખ પીટ હેગસેથ અને અન્ય વિભાગોને પ્રક્રિયા શરૂ કરવા કહેવાની વાત કરી.
ટ્રમ્પે સાથે જ ઓબામા પર આક્ષેપ કર્યો કે તેમણે એલિયન અંગે જાહેરમાં બોલીને સંવેદનશીલ માહિતી બહાર પાડી હોવાની શક્યતા છે. ટ્રમ્પના જણાવ્યા મુજબ જો આ નિવેદન ગુપ્ત બ્રિફિંગ આધારિત હોય તો તે રાષ્ટ્રીય સુરક્ષા સાથે જોડાયેલ બાબત બની શકે. જોકે તેમણે કોઈ ચોક્કસ પુરાવા રજૂ કર્યા નથી.
ટ્રમ્પે પત્રકારો સાથેની વાતચીતમાં કહ્યું કે “તેમણે ક્લાસિફાઇડ માહિતીમાંથી વાત લીધી હોય શકે છે અને આવું કરવું યોગ્ય નથી.”
આ સમગ્ર મુદ્દે અમેરિકામાં ફરી એકવાર સરકાર પાસે એલિયન અંગે કેટલી માહિતી છે તે અંગે ચર્ચા તેજ બની છે. છેલ્લા કેટલાક વર્ષોમાં અમેરિકન રક્ષા વિભાગે અજાણી ઉડતી વસ્તુઓ (UFO/UAP) અંગેના કેટલાક વીડિયો અને અહેવાલો જાહેર કર્યા બાદ જનતા અને વૈજ્ઞાનિકોમાં ઉત્સુકતા વધી છે. ટ્રમ્પની જાહેરાતથી હવે વધુ દસ્તાવેજો બહાર આવવાની સંભાવના વ્યક્ત થઈ રહી છે.
ઓબામા એ શું કહ્યું હતું…
ભૂતપૂર્વ રાષ્ટ્રપતિ બરાક ઓબામાએ પોડકાસ્ટ ઇન્ટરવ્યુમાં કહ્યું હતું કે બ્રહ્માંડ એટલું વિશાળ છે કે માનવજાત એકલી હોવાની શક્યતા ઓછી છે. તેમણે સ્પષ્ટ શબ્દોમાં જણાવ્યું હતું કે “એલિયન અસ્તિત્વ ધરાવે છે પરંતુ મેં તેમને જોયા નથી.” ઓબામાએ આગળ કહ્યું હતું કે પોતાના રાષ્ટ્રપતિ કાર્યકાળ દરમિયાન તેમને પૃથ્વી પર પરગ્રહવાસીઓ આવ્યા હોવાનો અથવા માનવો સાથે સંપર્ક કર્યો હોવાનો કોઈ પુરાવો મળ્યો નથી.
તેમણે એ પણ ઉમેર્યું કે એરિયા-51માં એલિયન રાખવામાં આવે છે એવી લોકપ્રચલિત માન્યતાઓ અંગે તેમને કોઈ વિશ્વસનીય માહિતી મળી નથી.
