ફ્લાઇટમાં અન્ય મુસાફરો કે ક્રૂ મેમ્બર સાથે ગેરવર્તણૂક કરનારની ખેર નથી! ઉપદ્રવી મુસાફરો સામે 30 દિવસથી 2 વર્ષ સુધીનો પ્રતિબંધ મૂકાશે
આપણે ત્યાં ઘણી વખત વિમાનમાં મુસાફરો દ્વારા બીજા મુસાફરો કે કૃ મેમ્બર્સ સાથે ગેરવર્તણુક કરવામાં આવે છે અથવા તો પ્રતિબંધ હોવા છતાં ધુમ્રપાન કરવામાં આવે છે. આ પ્રકાના કિસ્સાઓમાં ડાયરેક્ટર જનરલ ઓફ સિવિલ એવિએશને હવે કડકાઈથી કામ લેવાનું નક્કી કર્યું છે. આ પ્રકારના મામલાઓમાં “ઝીરો ટોલરન્સ” નીતિ અપનાવી આવા મુસાફરો પર 30 દિવસથી લઈને 2 વર્ષ કે તેથી વધુ સમય સુધીનો પ્રતિબંધ લાદી શકાય છે તેવું સ્પષ્ટ કર્યું છે. ડીજીસીએ દ્વારા એરલાઇન્સને સ્પષ્ટ SOP બનાવવાની સૂચના આપવામાં આવી છે, જેથી ગંભીર ગુનાઓમાં તાત્કાલિક કાર્યવાહી થઈ શકે
આ સૂચિત નિયમો મુજબ એરલાઇન્સ કંપનીઓ પોતે જ આવા મુસાફરો પર 30 દિવસ સુધીનો તાત્કાલિક ફ્લાઇટ પ્રતિબંધ લાદી શકશે. આ ઉપરાંત ગંભીર પ્રકારના ગુના માટે 2 વર્ષ અથવા અમર્યાદિત ફ્લાઇટ પ્રતિબંધ પણ સામનો કરવો પડશે. નાગરિક ઉડ્ડયન ક્ષેત્રની નિયમનકારી સંસ્થાએ આ નિયમોનો ડ્રાફ્ટ જારી કરી 16 માર્ચ સુધી સંબંધિત પક્ષકારો પાસેથી અભિપ્રાયો મંગાવ્યા છે.
નવા નિયમોના ડ્રાફ્ટમાં ડાયરેક્ટોરેટ જનરલ ઓફ સિવિલ એવિયેશને જણાવ્યું હતું કે વિમાન, મુસાફરો, સંપત્તિની સુરક્ષા માટે ઝીરો ટોલેરન્સ નીતિ અપનાવવામાં આવી છે. વિમાનમાં વ્યવસ્થા અને શિસ્ત જાળવી રાખવા માટે નિયમનો ભંગ કરતાં મુસાફરો સામે કાર્યવાહી કરાશે. નવા નિયમો મુજબ એરલાઇન્સે બેકાબૂ મુસાફરોનો સામનો કરવા અને અને DGCAને આવી ઘટનાઓની જાણ કરવા માટે એક સ્ટાન્ડર્ડ ઓપરેટિંગ પ્રોસિજર બનાવીને તેનો અમલ કરવાનો રહેશે.
એરલાઇને રચેલી સ્વતંત્ર સમિતિ આવા મુસાફરો પર પ્રતિબંધ મૂકવા માટે નિર્ણય કરશે. એરલાઇન સ્વતંત્ર સમિતિમાં કેસ મોકલ્યા વગર સંબંધિત મુસાફર પર વધુમાં વધુ 30 દિવસનો ફ્લાઇટ પ્રતિબંધ મૂકી શકશે. વિમાનમાં ધૂમ્રપાન, સ્થાનિક ઉડાન દરમિયાન દારૂનું સેવન અને ઇમરજન્સી એક્ઝિટનો દુરુપયોગ અથવા લાઇફ જેકેટ સહિત જીવનરક્ષક ઉપકરણોનો અનધિકૃત ઉપયોગ સહિત વિવિધ ઉલ્લંઘનો માટે એરલાઇન આવી કાર્યવાહી કરી શકાય છે.
સૂચિત નિયમો મુજબ ગુનાના પ્રકારના આધારે બેકાબૂ મુસાફરોને ઉડાન પ્રતિબંધનો સામનો કરવો પડશે. લેવન-1 ગુના માટે ત્રણ મહિનાનો, લેવલ-2 ગુના માટે છ મહિના સુધીનો પ્રતિબંધ આવશે. લેવલ-3 અને લેવલ- 3 ગુના માટે ઓછામાં ઓછા બે વર્ષ અથવા કોઇ મર્યાદા વગરનો પ્રતિબંધ લાગુ પડશે. લેવલ-1 ગુનામાં શારીરિક હાવભાવ, મૌખિક સતામણી અથવા દારૂના નશા જેવા વર્તનનો સમાવેશ થાય છે. લેવલ-2 ગુનામાં ધક્કો મારવો, લાત મારવી, અયોગ્ય સ્પર્શ અથવા જાતીય સતામણીનો સમાવેશ થાય છે. લેવલ-2 ગુનામાં વિમાન ઓપરેટિંગ સિસ્ટમને નુકસાન, શારીરિક હિંસા જેવી જીવન માટે જોખમ ઊભું કરતાં વર્તનનો સમાવેશ થાય છે. લેવલ 4માં ફ્લાઇટ ક્રૂ કમ્પાર્ટમેન્ટમાં પ્રવેશ કરવાનો સમાવેશ થાય છે.
