ગુજરાત ATS અને કોસ્ટગાર્ડ દ્વારા મોટી કાર્યવાહી: પોરબંદરના દરિયામાંથી 200 કિલોથી વધુનું ડ્રગ્સ જપ્ત, ઈરાની કનેક્શન આવ્યું બહાર

ગુજરાત ATS અને ઇન્ડિયન કોસ્ટગાર્ડ દ્વારા મોટી કાર્યવાહી કરવામાં આવી છે. એક મોટા દરિયાઈ નાર્કોટિક્સ વિરોધી ઓપરેશનમાં, ગુજરાત આતંકવાદ વિરોધી ટુકડી (ATS) અને ભારતીય કોસ્ટ ગાર્ડે પોરબંદર દરિયાકાંઠે ડ્રગ્સની હેરાફેરીનો પ્રયાસ નિષ્ફળ બનાવ્યો, જેમાં 200 કિલોથી વધુ શંકાસ્પદ માદક દ્રવ્યોનો જથ્થો જપ્ત કરવામાં આવ્યો છે.

અધિકારીઓના જણાવ્યા અનુસાર, જપ્ત કરાયેલ માલ આજે વધુ તપાસ અને કાનૂની કાર્યવાહી માટે પોરબંદર જેટી પર લાવવામાં આવી રહ્યો છે. ગુજરાત ATS દ્વારા આ દાણચોરીમાં સામેલ બે ઈરાની નાગરિકોની ધરપકડ કરવામાં આવી છે.

અધિકારીઓ ડ્રગ્સના સ્ત્રોત અને હેતુસરના સ્થળને શોધવા તેમજ દાણચોરીના પ્રયાસ સાથે જોડાયેલા કોઈપણ વ્યાપક નેટવર્કને ઓળખવા માટે વધુ પૂછપરછ કરી રહ્યા છે.

આ પણ વાંચો:ટીમ ઈન્ડિયાની વાઇસ કેપ્ટન સ્મૃતિ મંધાના બની ‘ઈન્ડિયન સ્પોર્ટ્સ વુમન ઓફ ધ યર 2025’, આ ખેલાડીઓને પણ મળ્યો એવોર્ડ

ગુપ્ત બાતમીના આધારે મધદરિયે ઓપરેશન, 200 કિલોથી વધુ ડ્રગ્સ જપ્ત

ગુજરાત ATSને મળેલી ચોક્કસ બાતમીના આધારે દરિયાઈ માર્ગે ગુજરાતમાં ઘુસાડવામાં આવનાર મોટા જથ્થાના ડ્રગ્સનો ભાંડો ફોડાયો છે. માહિતી મળતા જ ATSએ ભારતીય કોસ્ટ ગાર્ડની મદદથી મધદરિયે સંયુક્ત સર્ચ ઓપરેશન હાથ ધર્યું હતું. પોરબંદરના દરિયાઈ સીમા વિસ્તારમાં શંકાસ્પદ હિલચાલ કરતી એક બોટને સુરક્ષા એજન્સીઓએ અટકાવી તપાસ હાથ ધરી હતી. તપાસ દરમિયાન બોટમાંથી 200 કિલોથી વધુ નશીલા પદાર્થો મળી આવ્યા હતા.

ઈરાની કનેક્શન બહાર આવ્યું

પ્રાથમિક તપાસમાં સામે આવ્યું છે કે ડ્રગ્સનો આ જથ્થો ઈરાનથી લાવવામાં આવી રહ્યો હતો. બોટમાં સવાર બે ઈરાની નાગરિકોની ધરપકડ કરવામાં આવી છે. આ આરોપીઓ ડ્રગ્સનો જથ્થો ગુજરાતના દરિયાકાંઠે કોને સપુર્દ કરવાના હતા અને આ આંતરરાષ્ટ્રીય રેકેટના તાર ક્યાં સુધી જોડાયેલા છે તે અંગે ATS દ્વારા સઘન પૂછપરછ કરવામાં આવી રહી છે.

છેલ્લા 10 વર્ષમાં 13,939 કરોડનું ડ્રગ્સ જપ્ત

દરિયાઈ માર્ગ પર કડક નજર બાદ હવે રાજ્યમાં ગેરકાયદે સિન્થેટિક ડ્રગ્સ બનાવતી ફેક્ટરીઓ પર પણ કાર્યવાહી તેજ થઈ છે. વર્ષ 2025માં જ ગુજરાતમાંથી 2,240 કરોડ રૂપિયાની કિંમતનું 20,823 કિલો સિન્થેટિક ડ્રગ્સ જપ્ત કરવામાં આવ્યું છે. ખાસ કરીને દક્ષિણ ગુજરાતમાં ચાલતી અડધા ડઝન જેટલી ગેરકાયદે ફેક્ટરીઓનો ભાંડાફોડ થયો હતો.

છેલ્લા 10 વર્ષ દરમિયાન ગુજરાતમાંથી કુલ 13,939 કરોડ રૂપિયાની કિંમતનું અંદાજે 1.74 લાખ કિલો સિન્થેટિક ડ્રગ્સ સુરક્ષા એજન્સીઓ દ્વારા પકડી પાડવામાં આવ્યું છે.