રાજકોટ રેલવે પોલીસે ગંધપારખુ શ્વાનની મદદથી ગેંગને દબોચી: ઓટોરિક્ષામાં ડીઝલના કેરબાઓની હેરાફેરી થતી, ચાર શખસોને ડીઝલના જથ્થા સાથે ઝડપી લેવાયા
રાજકોટ શહેરમાં લોકો યાર્ડમાં પાર્ક રહેલા રેલવેના ડીઝલ એન્જિનમાંથી ડીઝલ ચોરીના ચાલતા રેકેટનો પર્દાફાશ થયો છે. રેલવે પોલીસે ગંધપારખુ શ્વાનથી ચાર શખસોને પકડી પાડી ૪૯૨ લીટર ડીઝલ તેમજ ડીઝલની હેરાફેરીમાં વપરાતી ઓટોરિક્ષા, ટૂ-વ્હિલર સહિતના વાહનો કબજે કર્યા છે.
રાજકોટ યાર્ડમાં નવ નંબરની લાઈન પર પડેલા એન્જિનમાંથી અંદાજે ૧૫૦૦ લીટર જેવું ડીઝલ ચોરાયાની વિગતોના આધારે રાજકોટ રેલવે પ્રોટેક્શન ફોર્સ, રેલવે રાજ્ય પોલીસે તપાસ હાથ ધરી હતી. સ્થળ પરથી ડીઝલ ચોરાયા ઉપરાંત ડીઝલનો મોટો જથ્થો ઢોળાયો હોય તેમ માટી, જમીન ડીઝલવાળી થઈ ગઈ હતી.
ડીઝલ ચોર ગેંગને પકડવા માટે ગંધપારખુ શ્વાનની મદદ લેવાઈ હતી. શ્વાન એક સ્થળ પર જઈને ઉભો રહેતા પોલીસને ચોક્કસ કડી મળી હતી જે આધારે રેલવે પાછળ રૂખડિયા પરા-૩માં રહેતા ફિરોઝ અયુબભાઈ જામ (ઉ.વ.૩૧), નવાઝ રહીમ ખીરા (ઉ.વ.૨૨) તથા રિક્ષાચાલક જામનગર રોડ પર સ્લમ ક્વાર્ટરમાં રહેતા અબ્દુલ દાઉદભાઈ લંઘા (ઉ.વ.૩૧) અને સ્વામી વિવેકાનંદ નગર ક્વાર્ટર નં.૫૩માં શેરી નં.૩માં રહેતા સૈજાદ ઉંમર (ઉ.વ.૨૯)ને ઉઠાવી લીધા હતા.
પોલીસ દ્વારા ચાર દિવસથી ચલાવાઈ રહેલી તપાસમાં તા.૧૦ના રોજ સ્થળ પર યાર્ડમાંથી ૯૨ લીટર ડીઝલ ભરેલા ચાર કેરબા તેમજ ડીઝલ ઢોળાતા ડીઝલવાળી બે કિલો માટી મળી આવી હતી. આરોપીઓની ધરપકડ કરી પૂછતાછ-તપાસ દરમિયાન ૨૦૦,૨૦૦ લીટરના બે ડીઝલ ભરેલા બે મોટા પીપ મળી આવ્યા હતા તેમજ સાત અન્ય કેરબા અને ડીઝલ કાઢવા માટેની પાઈપ હાથ લાગી હતી. ડીઝલ હેરાફેરીમાં ઉપયોગમાં લેવાતી જી.જે.૦૩-બી.યુ.૧૫૨૫ નંબરની રિક્ષા તથા જી.જે.૧૧-સી.આર.૧૧૪૧ નંરનું એક્ટિવા પોલીસે કબજે લીધું હતું.
રાજકોટ પશ્ચિમ રેલવે વિભાગના રેલવે પ્રોટેક્શન ફોર્સના પીઆઈ કિશનપાલસિંહ, શક્તિસિંહ વાળા, પીએસઆઈ નિકુંજ પટેલ, સ્ટાફના રીતેશ શુક્લા, મધુરાજસિંહ જાડેજા, કાના ભૂવા, રઘુવીર જોગરાણા, પ્રભાત લોખીલ, ડોગસ્કવોડના વિરેન્દ્રસિંહ સહિતની ટીમે ગેંગને પકડી પાડી છે. આ અગાઉ પણ આરોપી છ માસ પૂર્વે સપડાઈ ચૂક્યાનું જાણવા મળે છે. ડીઝલ ચોર ગેંગ દ્વારા લોકો યાર્ડમાં પડેલા એન્જિનમાં ટેન્કમાંથી ડીઝલ ચોરી કરવા માટેની તરકીબ કરાતી હતી. પ્લાસ્ટિકની લાંબી પાઈપ ટેન્કમાં મુકીને ડીઝલ ખેંચતા હતા. ડીઝલ કેરબાઓમાં ભરીને રિક્ષા કે આવા વાહનોમાં હેરફેર કરતા હતા.
રાજકોટ યાર્ડમાં પાર્ક એન્જિનમાં પ્લાસ્ટિકની લાંબી પાઇપથી ડીઝલ કાઢી લેતા હતા
