રાજકોટ ઇન્કમટેક્સની ડિફોલ્ટર સામે લાલ આંખ: 17 કરોડનો ટેક્સ ન ચૂકવતા ફ્લેટ ટાંચમાં,કરોડોનો ટેક્સ વસૂલવા રિકવરી વિભાગનું એક્શન
બાકી રહેલી 17 કરોડની ટેક્સ ડિમાન્ડ સામે આવકવેરા વિભાગે લાલ આંખ કરી છે. રાજકોટ ઇન્કમટેક્સ રિકવરી વિભાગ દ્વારા અંદાજે 17 કરોડ રૂપિયાની બાકી ટેક્સ ડિમાન્ડ સામે કરદાતાની મિલકત ટાંચમાં લેતા ફફડાટ ફેલાયો છે.
આવકવેરા વિભાગ દ્વારા અગાઉ નોટિસ આપવામાં આવી હોવા છતાં બાકી રકમ ભરવામાં નિષ્ફળ રહેલા મોરબીના કરદાતા સામે હવે સીધી કાયદેસરની કાર્યવાહી શરૂ કરવામાં આવી છે.મોરબીમાં રહેતા કરદાતાનો ફ્લેટ જપ્ત કર્યો હોવાનું જાણવા મળ્યું છે.
બાકી રહેલી ટેક્સ ડિમાન્ડ સામે આવકવેરા વિભાગે કડક કાર્યવાહી શરૂ કરી છે. મળતી વિગત મુજબ મોરબીના રવાપર રેસિડન્સીમાં આવેલ સચિનભાઈ ભીમાણીના ફ્લેટને આવકવેરા વિભાગ દ્વારા ટાંચમાં લેવામાં આવ્યો છે.આ કેસ મૂળ જામનગર આવકવેરા વિભાગના જ્યુડિશિયલ હેઠળનો હોય મોરબી વિસ્તાર રાજકોટ રિજીયનમાં આવતો હોવાથી રાજકોટ ઇન્કમટેક્સ રિકવરી વિભાગ દ્વારા આ કાર્યવાહી હાથ ધરવામાં આવી હતી.
આ પણ વાંચો :આશરો આપો કાં સમય આપો, 7 દિવસમાં ક્યાં જઇએ? રાજકોટમાં ડિમોલિશન મામલે ગરમાવો,મહિલાઓએ કહ્યું-નોટિસ મળી ત્યારથી ઘરમાં ચુલા નથી સળગ્યા, સૂતા નથી
રાજકોટ ચીફ કમિશનર સતીશકુમાર ગોયલએ ટેક્સ ડિમાન્ડ ન ચૂકવી હોય એવાં બાકીદારો સામે ત્રીજું નેત્ર ખોલ્યું છે.ઓક્ટોબર મહિનામાં પણ વર્ષ 2018નાં કેસમાં 100 કરોડની ડિમાન્ડ કરદાતા પાસેથી આવકવેરાએ કાઢી હતી.8 વર્ષ બાદ પણ પટેલ ડિફોલ્ટરએ આશરે 100 કરોડથી વધુની રકમ ન ભરી હોવાથી આઈ ટી એ સમન્સ અને નોટિસ ફટકારી હતી.આખરે કરદાતાએ કોઈ જવાબ ન આપતાં રાજકોટ આઈ ટી નાં ટેક્સ રિકવરીની ટીમએ ચીફ કમિશનરનાં માર્ગદર્શન હેઠળ 150 ફૂટ રિંગ રોડ પર આવેલાં બાલાજી હોલ નજીક કદમ એપાર્ટમેન્ટમાં રહેતા પટેલ ડિફોલ્ટરનો લકઝરીયસ ફ્લેટ ટેક્સની રકમ વસૂલવા મિલકત જપ્તી કરી હતી.
