ઑસ્ટ્રેલિયામાં નોકરી મેળવવાના ચક્કરમાં રાજકોટના ડૉક્ટરે 50.75 લાખ ગુમાવ્યા : સાયબર ક્રાઈમ પોલીસ મથકમાં ફરિયાદ
રાજકોટના અટલ સરોવરની સામે સનરાઈઝ પાર્કમાં રહેતા અને ગાંધીનગર ખાતે જીએમઈઆરએસ મેડિકલ કોલેજમાં એમબીબીએસનો અભ્યાસ કરી ઘરબેઠા એએમસી બાય ડૉ.ગુપ્તા નામથી ઓનલાઈન એએમસી પરીક્ષાના ક્લાસિસ ચલાવતા 26 વર્ષીય ડૉક્ટરે ઑસ્ટ્રેલિયાની હોસ્પિટલમાં નોકરી મેળવવાના ચકકરમાં 50.75 લાખ રૂપિયા ગુમાવ્યા હોવાની ફરિયાદ સાયબર ક્રાઈમ પોલીસ મથકમાં નોંધાતાં ચકચાર મચી જવા પામી હતી.
આ અંગે ડૉ.ચિન્મય પ્રકાશભાઈ ત્રિવેદીએ નોંધાવેલી ફરિયાદમાં જણાવ્યું કે તેમણે ઑસ્ટ્રેલિયામાં ઑસ્ટ્રેલિયા મેડિકલ કાઉન્સીલ નામની પરીક્ષા પાસ કરી હતી. આ પરીક્ષા પાસ કર્યા બાદ ઑસ્ટ્રેલિયામાં રોયલ એડિલેડ નામની હોસ્પિટલમાં મેડિકલ રિસર્ચ આસિસ્ટન્ટ માટે જવાનું હતું. પરીક્ષા આપ્યા બાદ પાસ થયેલા વિદ્યાર્થીઓનું એક એએમસી ઑસ્ટ્રેલિયા-2025-ડ્રીમ કમ ટ્રુ નામનું વૉટસએપ ગુપ બનાવવામાં આવ્યું હતું અને ગ્રુપમાં ડૉ.ચિન્મયને પણ એડ કરાયો હતો. આ ગ્રુપમાં રોયલ એડિલેડ હોસ્પિટલમાં જોબ માટે જાહેરાત આવી હતી તેમાં એક મોબાઈલ નંબર લખેલો હોય તેના ઉપર સંપર્ક કરતા ડૉ.જોશુઆ નામના વ્યક્તિ સાથે વાતચીત શરૂ થઈ હતી.
આ પછી ડૉ.જોશુઆએ અલગ-અલગ સમયે પૈસા મેળવ્યા બાદ વિઝા માટે ડેનિયલ નામની વ્યક્તિનો નંબર આપ્યો હતો જેણે પણ ઑસ્ટ્રેલિયાની બેન્કમાં ખાતું ખોલાવવાના નામે 24 લાખ રૂપિયા લઈ લીધા હતા. પૈસા આપ્યા બાદ આગળ કશી જ કાર્યવાહી ન થતાં ડૉ.ચિન્મયે તપાસ કરી હતી જે બદા એવો ખુલાસો થયો હતો કે બેન્કમાં ડૉ.ચિન્મયના નામનું કોઈ એકાઉન્ટ ખુલ્યું નથી અને રોયલ એડિલેડ હોસ્પિટલના નામે વાત કરનાર વ્યક્તિ પણ ફ્રોડ છે. આ અંગેની જાણ થતાં જ ડૉ.ચિન્મયે પોલીસ ફરિયાદ નોંધાવી હતી.
