સુરેન્દ્રનગરના કલેક્ટરની EDના દરોડા બાદ કલાકોમાં જ બદલી: નાયબ મામલતદાર ચંદ્રસિંહ મોરી 7 દિવસના રિમાન્ડ પર
સુરેન્દ્રનગર જિલ્લા કલેક્ટર ડો.રાજેન્દ્ર એમ. પટેલને ત્યાં મંગળવારે EDએ હાથ ધરેલી તપાસમાં મોટા ગફલા હાથ લાગ્યાની વાતો ઉભરી છે. EDના દરોડા બાદ કલેક્ટર રાજેન્દ્ર પટેલની કલાકોમાં જ બદલી કરીને જીએડી વિભાગને હવાલે કરી દેવાયા છે. કલેક્ટરનો ચાર્જ ડીડીઓ કે.એસ. યાજ્ઞિકને સોંપાયો છે.
તત્કાલીન કલેક્ટર હજુ ગત ફેબ્રુઆરી માસમાં સુરેન્દ્રનગર મુકાયા હતા. કરોડોના સોલાર પ્રોજેક્ટ મંજૂરી કાંડ કે આવી ગફલતના બેદરકારીમાં છાંટા ઉડ્યાની ચર્ચા છે. કલેક્ટર ઉપરાંત રિમાન્ડ પર રહેલા નાયબ મામલતદાર મોરી, સી.એ. જયરાજસિંહ ઝાલા તથા મયુર ગોહિલ સામે સુરેન્દ્રનગર એસીબીમાં ED દ્વવારા ફરિયાદ નોંધાવાઈ હોવાનું જાણવા મળે છે. હજુ કેટલાક પર સરકાર દ્વવારા સસ્પેન્શનના પગલાં તોડાશે તેવું દેખાઈ રહ્યું છે.
નાયબ મામલતદાર સાત દિવસના રિમાન્ડ પર
સુરેન્દ્રનગર જિલ્લા કલેક્ટર ડો.રાજેન્દ્ર પટેલ તેમજ નાયબ મામલતદાર ચંદ્રસિંહ મોરી (સી.બી.મોરી)ને ત્યાં EDના મંગળવારે પડેલા દરોડાના કેસમાં પ્રથમ દૃષ્ટિએ જ નાયબ મામલતદાર મોરી આરોપી બની ગયા છે. EDએ મોરીની ધરપકડ કરી બુધવારે અમદાવાદની ખાસ અદાલતમાં 14 દિવસના રિમાન્ડની માગણી સાથે મોરીને રજૂ કરતા બન્ને પક્ષેની દલીલો, રજૂઆતો ધ્યાને લઈ અદાલતે મોરીના સાત દિવસના રિમાન્ડ મંજૂર કરી EDને કસ્ટડી સોંપી છે.
EDની ટીમો મંગળવારે વહેલી સવારે સુરેન્દ્રનગરમાં આવી પહોંચી હતી અને કલેક્ટરના બંગલો પર જ છાપો માર્યો હતો. આ ઉપરાંત રેવન્યુ વિભાગનું કામકાજ સંભાળતા નાયબ મામલતદાર ચંદ્રસિંહ મોરીને ત્યાં પણ દરોડો પાડ્યો હતો. મોરીના ઘરેથી EDને 67 લાખથી વધુની રોકડ મળી આવી હતી. આ ઉપરાંત કેટલાક દસ્તાવેજી પુરાવાઓ પણ હાથ લાગ્યા હતા. કલેક્ટરને ત્યાંથી પણ ઘણી ફાઈલો મળી આવી હતી. જમીન સંબંધી ફાઈલો હોવાની વાત છે. સમગ્ર તપાસ પાછળ એવું બહાર આવી રહ્યું છે કે, સુરેન્દ્રનગર જિલ્લામાં મોટા સોલાર પ્રોજેક્ટ છે. ધ્રાંગધ્રા રણકાંઠા વિસ્તાર, લખતર રોડ તલસાણા, પાટડી, માલવણ નજીકની મોટી જમીનોમાં આ પ્રોજેક્ટોને લઈને મોટો આર્થિક ગફલો થયો અને અંદાજે 1500 કરોડ જેવો આંક હોવાની સંભાવના સાથે તપાસ આવી છે.
કલેક્ટરના પી.એ. રવિરાજસિંહ ઝાલા, ક્લાર્ક મયુરસિંહ ગોહિલ તેમજ અન્ય એક સ્થળે એડવોકેટને ત્યાં પણ ED દ્વારા તપાસ કરાઈ છે. એવી વિગતો છે કે વહેલી સવારથી મોડી સાંજ સુધીના સર્ચ ઓપરેશનમાં EDનું ઘણું આપત્તિજનક સાહિત્ય મળ્યું છે. ED દ્વારા અમદાવાદ એસીબીમાં પણ લેખિત ફરિયાદ કરવામાં આવી છે. 67 લાખથી વધુની રોકડ મલતા જ તુરંત જ જ નાયબ મામલતદાર મોરીને EDએ ઉઠાવી લીધા હતા અને અમદાવાદ લઈ ગઈ હતી.
આરોપી મોરીને આજે અમદાવાદની EDની સ્પેશિયલ કોર્ટમાં રિમાન્ડ માટે રજૂ કરાયા હતા. આરંભે અદાલત દ્વારા જે તે સ્થળે કોર્ટમાં કેમ પ્રોડ્યુશ ન કરાયા સહિતના સવાલો સાથે EDનો ઉધડો લેવાયો હતો. ED દ્વારા પણ જરૂરી કારણો રજૂ કરાયા હતા. બન્ને પક્ષે દલીલો બાદ મોરીને આગામી તા.1 જાન્યુઆરી સાંજે પાંચ વાગ્યા સુધી રિમાન્ડ પર સોંપવા હુકમ કરાયો હતો. જો કે હજુ સુધી નાયબ મામલતદાર મોરી સિવાય અન્ય કોઈને પૂછતાછ માટે અમદાવાદ લવાયા નથી કે આવી કોઈ કાર્યવાહી થઈ નથી.
EDએ રિમાન્ડ પેપર્સમાં ક્યાંય કોઇ અધિકારીનો ઉલ્લેખ કર્યો નથી
EDએ મોરીને રિમાન્ડ માટે અદાલતમાં રજૂ કર્યા હતા. મોરી તરફે રોકાયેલા એડવોકેટ નીતિન ગાંધીએ મીડિયાને જણાવ્યા મુજબ રિમાન્ડ પેપરમાં ક્યાંય કોઈ અધિકારી કે કોઈ આવો ઉલ્લેખ કરાયો નથી કે નામ ડિસ્કલોઝ કરાયા નથી. જરૂર પડ્યે વચેટિયા, દલાલ કે આવા સંનિગ્ધો સામે કાર્યવાહી થાય તેવા સંકેતો દર્શાવાયા છે. ED એમદાવાદ એસીબીમાં ફરિયાદ આપી છે. તપાસ સંદર્ભે ED જરૂર પડ્યે સાત દિવસ બાદ વધુ રિમાન્ડ પણ માંગી શકે.
