રેશનકાર્ડ ધારકોને ફિંગરપ્રિન્ટને બદલે OTPથી રેશનનું વિતરણ! સર્વર ધાંધિયાના નામે OTPથી વેચાણ વધતા પુરવઠા અધિકારી ચોંક્યા
રાજ્યના અન્ન અને નાગરિક પુરવઠા વિભાગ દ્વારા રાષ્ટ્રીય અન્ન સલામતી કાયદા હેઠળ ગરીબ નાગરિકોને મફતમાં વિતરણ કરવામાં આવતા ઘઉં-ચોખા અને રાહત ભાવે આપવામાં આવતા તેલ, કઠોળની કાળાબજારી અટકાવવા ફિંગરપ્રિન્ટ આધારિત જાહેર વિતરણ વ્યવસ્થા અમલી બનાવી છે.જેમાં વૃદ્ધ વડીલોના કિસ્સામાં ફિંગરપ્રિન્ટ ન આવી શકે તો મોબાઈલ OTP આધારિત વિતરણનો વિકલ્પ પણ આપ્યો છે. જો કે, આમ છતાં રાજકોટ જિલ્લામાં મોટા પ્રમાણમાં મોબાઈલ OTP આધારિત વિતરણ થતું હોવાથી જિલ્લા પુરવઠા અધિકારી દ્વારા જે -જે દુકાનદારો દ્વારા વધુ પ્રમાણમાં OTP આધારિત વિતરણ થાય છે તેવા તાલુકામાં ગુપ્તરાહે તપાસ શરૂ કરવામાં આવી હોવાનું જાણવા મળે છે.
પ્રાપ્ત વિગતો મુજબ રાજકોટ જિલ્લામાં 3.23 લાખથી વધુ રેશનકાર્ડ ધારકો રાષ્ટ્રીય અન્ન સલામતી કાયદા હેઠળ પાત્રતા ધરાવતા હોવાથી જિલ્લામાં દર મહિને લાખો કિલોગ્રામ ઘઉં, ચોખા નિઃશુલ્ક તેમજ ખાંડ, તુવેરદાળ, ચણા, બાજરી અને મીઠું રાહતભાવથી વિતરણ કરવામાં આવે છે. બીજી તરફ અન્ન અને નાગરિક પુરવઠા વિભાગ દ્વારા તમામ રેશનકાર્ડ ધારકોના ફિંગરપ્રિન્ટ મેળવીને જ રેશનિંગનો જથ્થો વિતરણ કરવાની સૂચના છે. સાથે જ વડીલ-વૃદ્ધના કિસ્સામાં ફિંગરપ્રિન્ટ ન આવી શકે તેવા કિસ્સામાં આવા રેશનકાર્ડ ધારકોના નોંધાયેલ મોબાઈલ નંબર પર OTP મોકલી જથ્થો વિતરણ કરવા છૂટ આપવામાં આવી છે.
બીજી તરફ રાજકોટ શહેર-જિલ્લામાં સર્વર ડાઉન રહેતું હોવાના બહાને ફિંગરપ્રિન્ટ આધારિત વિતરણને બદલે મોટા પ્રમાણમાં મોબાઈલ OTP આધારિત વિતરણ કરવામાં આવી રહ્યું હોવાનું સામે આવતા જિલ્લા પુરવઠા અધિકારી ચોકી ઉઠ્યા છે અને તમામ ઝોનલ અધિકારી તેમજ તાલુકા પુરવઠા નાયબ મામલતદારોને OTP આધારિત વિતરણ ઉપર નજર રાખવા સૂચના આપવામાં આવી છે.નોંધનીય છે કે, કેટલાક તાલુકામાં તો 25થી 30 ટકા રેશનકાર્ડ ધારકોને મોબાઈલ OTP આધારિત વિતરણ કરવામાં આવ્યું હોવાથી લગત પુરવઠા નાયબ મામલતદાર દ્વારા પરવાનેદારોને OTP આધારિત વિતરણ બંધ કરવા કડક તાકીદ કરવામાં આવી હોવાનું પણ સામે આવ્યું છે.
OTP આધારિત વિતરણમાં રેન્ડમલી ચેકીંગ કરાશે : ડીએસઓ
રાજકોટ જિલ્લામાં રેશનકાર્ડ ધારકોને ફિંગર પ્રિન્ટને બદલે મોબાઈલ OTP આધારિત વિતરણ અંગે જિલ્લા પુરવઠા અધિકારી અજય ઝાપડાએ જણાવ્યું હતું કે, નિયમ મુજબ માત્રને માત્ર વૃદ્ધ વડીલો કે જેમના ફિંગરપ્રિન્ટ ન આવતા હોય તેવા કિસ્સામાં જ OTP આધારિત વિતરણ કરવા સૂચના આપવમા આવી છે. જો કે, તેમ છતાં વધુ પ્રમાણમાં જ્યાં જ્યાં OTP આધારિત વિતરણ થયું હશે ત્યાં રેન્ડમલી ક્રોસ તપાસ કરવામાં આવશે. સાથે જ તમામ પુરવઠા નાયબ મામલતદારોને OTP આધારિત વિતરણ પણ નજર રાખવા સૂચના આપવામાં આવી હોવાનું જણાવ્યું હતું.
