શરદી-ઉધરસ-તાવના કેસ કેમ વધી રહ્યા છે? કારણ: રાજકોટની ‘હવા’ જ ખરાબ! જાણો કયા વિસ્તારની હવા કેવી
રાજકોટમાં અત્યારે ભાગ્યે જ કોઈ એવું ઘર હશે જેમાં એક-બે વ્યક્તિને શરદી-ઉધરસ કે તાવ ન હોય. લોકો આ પ્રકારના રોગને સિઝનલ ગણાવી એન્ટીબાયોટિક દવા લઈ કામ રોળવી લેતાં હોય છે. વાસ્તવિકતા એ છે કે હજુ શિયાળાએ જોઈએ તેવી જમાવટ પણ કરી નથી ત્યાં જ વાયરલ ઈન્ફેક્શનના વધી રહેલા રોગ પાછળ ઠંડી નહીં પરંતુ રાજકોટની ખરાબ હવા જ જવાબદાર હોવાનું સામે આવ્યું છે. શહેરના અનેક વિસ્તારો એવા છે જ્યાં હવામાં એટલી હદે પ્રદૂષણ ભળી ગયું છે કે એક વખત ત્યાંથી પસાર થઈ જાવ એટલે ગળામાં બળતરા, શરદી, કળતર સહિતની તકલીફ થવાનું શરૂ થઈ જ જશે !
શહેરના સોરઠિયાવાડી, ડિલક્સ ચોક, ઢેબર રોડ, ગ્રીનલેન્ડ ચોકડી, જામટાવર સહિતના વિસ્તારોમાં એર ક્વોલિટી ઈન્ડેક્સ મતલબ કે હવાની ગુણવત્તા એટલી ખરાબ છે કે જાણે તે દિલ્હી જે અત્યારે દેશનું સૌથી પ્રદૂષિત શહેર ગણાય છે તેના સાથે હરિફાઈ કરી રહ્યા હોય ! અહીં એક્યુઆઈ (એર ક્વોલિટી ઈન્ડેક્સ) 200થી 300ને પાર જોવા મળ્યો છે. આ ઈન્ડેક્સ આખો દિવસ યથાવત રહેતો નથી પરંતુ ચોક્ક્સ સમય કે જ્યારે વાહનોની અવર-જવર વધુ હોય તેના ધૂમાડાને કારણે પ્રદૂષણમાં વધારો થાય છે. વળી, થોડો સમય બાદ હવાની ગુણવત્તા સુધરી પણ જાય છે.
જ્યારે ત્રિકોણબાગ, મહિલા કોલેજ, રેલવે જંક્શન, જિલ્લા પંચાયત ચોક સહિતના વિસ્તારોમાં હવાનું પ્રમાણ સારું હોવાનું મહાપાલિકાના સૂત્રો પાસેથી જાણવા મળ્યું હતું. ખાસ કરીને જ્યાં આખો દિવસ નાના-મોટા વાહન દોડ્યે રાખતા હોય અને વૃક્ષોનું પ્રમાણ ઓછું હોય ત્યાંની હવા અત્યંત પ્રદૂષિત થઈ જતી હોવાને કારણે અહીંથી પસાર થનારા લોકો `બીમાર’ પડ્યા વગર રહેતા નથી. એવું પણ નથી કે એક વખત આ પ્રકારની હવા શ્વાસમાં જાય એટલે લોકો તુરંત માંદા પડી જાય છે. એકાદ-બે અથવા ત્રણ દિવસ બાદ ખરાબ હવા શ્વાસમાં ગયાની અસર વર્તાય છે અને પછી માંદગી આવે જ છે.
માસ્ક પહેરી રાખવું હિતાવત, વીટામીનયુક્ત ખોરાબ લોઃ ડૉ.જયેશ વકાણી
મહાપાલિકાના આરોગ્ય અધિકારી ડૉ.જયેશ વકાણીએ જણાવ્યું કે પ્રદૂષિત હવાના કણ ફેફસા મારફતે શ્વાસમાં જવાને કારણે એલર્જીક ઉપરાંત વાયરલ રોગ જેવા કે શરદી-ઉધરસ-તાવ થઈ રહ્યા છે. શિયાળો ચાલી રહ્યો હોવા ઉપરાંત વાહનોના સતત પ્રદૂષણને કારણે હવાની ગુણવત્તા ખરાબ થઈ રહી છે ત્યારે તેનાથી બચવા માટે માસ્ક પહેરી રાખવું હિતાવહ છે. આ ઉપરાંત વીટામીન `સી’ સહિતના યુક્ત ખોરાક લેવાથી બીમાર પડવાથી બચી શકાય તેમ છે.
