ઈન્સ્ટાગ્રામ થકી થયેલી મિત્રતા દુષ્કર્મ સુધી પહોંચી: મહિલાનું ઘર ભાંગ્યું! આ રીતે ફૂટ્યો ભાંડો, વાંચો શું છે સમગ્ર ઘટના
સોશિયલ મીડિયા પર થયેલી મિત્રતા કેવું ગંભીર પરિણામ આપે છે તે રાજકોટમાં બનેલી એક ઘટના પરથી સામે આવ્યું છે. શહેરના રૈયાગામ નજીક રહેતી મહિલાનો ઈન્સ્ટાગ્રામ મારફતે જૂનાગઢના શખસ સાથે પરિચય થયા બાદ આ પરિચય છેક દુષ્કર્મ સુધી પહોંચી ગયો હતો અને મહિલાનું ઘર ભાંગી જવા સુધીની નોબત આવી પડી હતી. આખરે યુવક ફરી જતાં મહિલાએ પોલીસ ફરિયાદ નોંધાવી હતી.
આ અંગે મહિલાએ યુનિવર્સિટી પોલીસ મથકમાં નોંધાવેલી ફરિયાદમાં જણાવ્યું કે ત્રણેક મહિના પહેલાં તે જૂનાગઢના ભાવિન રતિલાલ મકવાણા સાથે ઈન્સ્ટાગ્રામ થકી સંપર્કમાં આવી હતી. ગત જન્માષ્મી ઉપર ભાવિન રાજકોટ આવ્યો હતો અને બન્ને વચ્ચે મુલાકાત થઈ હતી. એ સમયે મહિલાએ ભાવિનને પોતે પરિણીત હોવાનું અને સંતાનમાં એક પુત્ર-પુત્રી હોવા તેમજ પગથી દિવ્યાંગ હોવાનું જણાવ્યું હતું. આ પછી ભાવિને મહિલાને અપનાવી લેવાનું વચન આપ્યું હતું.
દરમિયાન બીજા દિવસે ભાવિન ફરી મહિલાના ઘેર ગયો હતો. એ સમયે પુત્ર-પુત્રી રમવા માટે નીચે ગયા હતા જ્યારે મહિલાનો પતિ નોકરી પર હોય ઘરમાં કોઈ ન હોવાનો લાભ લઈ ભાવિને લગ્નનું વચન આપીને શરીરસંબંધ બાંધ્યો હતો. આ નવરાત્રિ પહેલાં ભાવિન અને મહિલા એક મિત્રના ઘેર ગયા હતા જ્યાં પણ શરીરસંબંધ બાંધ્યો હતો.
ભાવિને મહિલાનો વિશ્વાસ જીતવા પોતાની માતા સાથે પણ વાતચીત કરાવી હતી. ત્યારબાદ દિવાળી પહેલાં ભાવિન, ફરિયાદી મહિલા, તેમજ પુત્ર-પુત્રી સહિતના અમદાવાદ ગયા હતા જ્યાં રોકાયા હતા. દિવાળી ઉપર ભાવિન, મહિલા, મહિલાનો પતિ સહિતના ઉજ્જૈન ફરવા ગયા હતા જ્યાંથી પરત ફરતી વખતે મહિલાના પતિને શંકા જતાં તેણે ભવિનનો મોબાઈલ ચેક કર્યો હતો જેમાં મહિલા અને ભાવિનના ફોટો જોઈ જતાં માથાકૂટ થઈ હતી.
ત્યારબાદ ઘેર આવી ગયા પછી એક બેઠક મળી હતી જેમાં ભાવિન પણ હાજર હતો. તેણે મહિલાના પતિની હાજરીમાં મહિલાને અપનાવી લેવાની વાત કરી કારમાં જૂનાગઢ લઈ ગયો હતો. જે કે ભાવિનના ઘરના સભ્યોને મહિલા પસંદ ન પડતાં ભાવિન તેના ભાઈને ત્યાં લઈ ગયો હતો અને ત્યાંથી મહિલાએ રાજકોટ પરત જવાનું કહેતા તેને એકલી જૂનાગઢથી રાજકોટ મોકલી દીધી હતી. અહીંથી ફરી જૂનાગઢ મિત્રને ત્યાં ગઈ હતી અને ત્યાંથી ભાવિનના ઘેર જઈ તેના માતા-પિતા, બહેનની હાજરીમાં ભાવિન સાથે લગ્ન કરવાનું કહ્યું હતું પરંતુ તે કશુંજ બોલ્યો ન્હોતો. આટલું ઓછું હોય તેમ મહિલાને તેના પતિએ 7-11-2025ના છૂટાછેડા આપી દેતા તેનું ઘર પણ ભાંગી ગયું હતું. આમ ભાવિન મકવાણા (રહે.જૂનાગઢ)એ લગ્નનું વચન આપી વારંવાર શરીરસંબંધ બાંધતા તેના વિરુદ્ધ ફરિયાદ નોંધાવી હતી.
