રાજકોટ ઈન્ટરનેશનલ એરપોર્ટમાં નિયમની તો ઐસી તૈસી!પાર્કિંગ કોન્ટ્રાકટમાં ખૂલ્લેઆમ ઉઘરાણાં? જાણો શું છે સમગ્ર મામલો
રાજકોટ ઈન્ટરનેશનલ એરપોર્ટ સમયાંતરે કોઈને કોઈ બાબતો કે વિવાદોને લઈને ચર્ચાના ચકડોળે ચડ્યા રાખે છે. હવે ફરી વખત નવો વિવાદ પાર્કિંગ કોન્ટ્રાક્ટમાં નિયમ વિરૂધ્ધ ઉઘરાણાનો ઉભર્યો છે. એરપોર્ટમાં આવતી કાર્સ એક્ઝિટ થાય ત્યારે ટાઈમ લિમિટ (12 મિનિટ) ક્રોસ ન કરી હોય તો પણ ખાનગી કાર પાસેથી 30 અને ટેક્સી હોય તો 40 રૂપિયા પડાવાતા હોવાની બૂમરાણ ઉઠી છે અને આવો વીડિયો પણ વાઈરલ થયો છે.
રાજકોટ એરપોર્ટ પર વીઆઈપી સર્વિસ નામે કોઈ ખાનગી કંપનીનો પાર્કિંગ કોન્ટ્રાક્ટ ચાલે છે. ખાનગી કારને એરપોર્ટ અંદર પિકઅપ-ડ્રોપ માટે 12 મિનિટ સુધી એન્ટ્રી-એક્ઝિટ ફ્રી હોય છે. જો બહાર નીકળતી વેળાએ એક મિનિટ પણ વધુ થાય તો અર્ધો કલાક સુધીના સમયગાળાને 30 રૂપિયા ચાર્જ કોન્ટ્રાક્ટરને આપવો પડે.
જ્યારે ટેક્સી કે કોમર્શિયલ વ્હિકલ્સને અર્ધો કલાકની સમય મર્યાદામાં એન્ટ્રી 40 રૂપિયા ચાર્જથી જ મળતી હોય છે. અંદર જો વધુ સ્ટે રહે તો નિયમ મુજબ વધુ ચાર્જ વસુલવામાં આવે. ખાનગી કે ટેક્સી કાર એન્ટર થાય એટલે ગેઈટ પરથી ટિકિટ (પાસ) લેવાનો રહે છે જે રિટર્નમાં જમા કરાવવો પડે.
પાર્કિંગ કોન્ટ્રાક્ટના કર્મીએ કારધારક પાસે નિયમ વિરૂધ્ધ નાણાં માગ્યા અને તેનો વીડિયો વાઈરલ થયો તેમાં કેબીનમાં વીઆઈપી સર્વિસ નામની કંપનીના ડ્રેસ સાથે બેઠેલો વ્યક્તિ નાણાં માગી રહ્યો છે અને પાછો કબુલી પણ રહ્યો છે કે હા, હજુ 12 મિનિટ નથી થઈ, પૈસા માગ્યા હતા તમે આપ્યા નથી, સામે વ્યક્તિ નિયમ સમજાવે છે તો કહે છે કે કહું છું ને મારાથી ભૂલ થઈ ગઈ. આવા શબ્દો સાથે બન્ને વચ્ચે શાબ્દિક ટપાટપી થાય છે અને એક તબક્કે તો કોન્ટ્રાક્ટ કર્મી સામેવાળા વ્યક્તિનો મોબાઈલ ફોન આંચકવાનો પ્રયાસ કરતો હોય તેવું દેખાય છે. સંભવતઃ તા.27-11ના સવારની જ આ ઘટના છે અને સંબંધિતોને ફરિયાદ પણ કરાઈ છે. જો આવી રીતે ઉઘરાણા થતાં હોય તો નાની-નાની રકમમાં પણ મોં નાખનારાઓને લઈને એરપોર્ટની ઈમેજ ખરડાઈ રહી હોવાનું જાણકારોનું માનવું હશે.
